ពលរដ្ឋខេត្តពោធិ៍សាត់រិះគន់អាជ្ញាធរមូលដ្ឋានថាមិនអើពើដោះស្រាយជម្លោះដីធ្លី
2015.11.29
មន្ត្រីសង្គមស៊ីវិល និងប្រជាពលរដ្ឋនៅឃុំស្វាយស ស្រុកក្រគរ ខេត្តពោធិ៍សាត់ រិះគន់អាជ្ញាធរមូលដ្ឋាន ថាមិនអើពើដោះស្រាយជម្លោះដីធ្លីជូនពលរដ្ឋក្រីក្រ។ អាជ្ញាធរមូលដ្ឋានបញ្ជាក់ថា បានដោះស្រាយជម្លោះដីធ្លីនេះជាច្រើនលើកច្រើនសាហើយ ដោយមិនគិតពីនិន្នាការនយោបាយ ប៉ុន្តែភាគីទាំងពីរនៅមិនទាន់ស្រុះស្រួលគ្នា។
ប្រជាពលរដ្ឋមួយគ្រួសារនៅភូមិបឹងស្មុក នៃឃុំស្វាយស អះអាងថា អ្នកមានលុយ និងអាងខ្នងបង្អែកម្នាក់ឈ្មោះ គិត ឈីវ និងបុគ្គលពីរនាក់ទៀត ឃុបឃិតគ្នារំលោភយកដីទំហំជាង ៦ហិកតារ (៦,៣០ហិកតារ) របស់គាត់ ដែលមានវិញ្ញាបនបត្រសម្គាល់ម្ចាស់អចលនវត្ថុត្រឹមត្រូវ។ ពួកគាត់ថា ជម្លោះកើតឡើងតាំងពីដើមឆ្នាំ២០១៥ ប៉ុន្តែអាជ្ញាធរមិនសូវអើពើដោះស្រាយ ទំនងជារើសអើងចំពោះអ្នកដែលគាំទ្រនយោបាយប្រឆាំង។
ស្ត្រីវ័យជាង ៣០ឆ្នាំម្នាក់ដែលកំពុងកាន់ប័ណ្ណកម្មសិទ្ធិលើដីមានជម្លោះនេះ លោកស្រី ខ្លឹម វណ្ណា មានប្រសាសន៍នៅថ្ងៃទី២៨ ខែវិច្ឆិកា ថា ម្ដាយក្មេក និងប្ដីប្រពន្ធគាត់ បានត្រួសត្រាយព្រៃនៅចំណុចចេតិយនៃភូមិកម្រែង ឃុំស្វាយស ដើម្បីកាន់កាប់ជាច្រើនឆ្នាំមកហើយ ហើយនៅឆ្នាំ២០១៤ ទើបប្ដីប្រពន្ធគាត់ទទួលបានវិញ្ញាបនបត្រកាន់កាប់ស្របច្បាប់លើដីនោះ។ ក្រោយពីម្ដាយក្មេកគាត់ស្លាប់ភ្លាម ស្រាប់តែមានក្មួយខាងប្ដីឈ្មោះ ញឹក សុភាព មកដណ្ដើមយកដីទាំងអស់ ដោយមាន លោក ហេង ផានិត និងលោក គិត ឈីវ នៅពីក្រោយខ្នង ហើយដាក់គ្រឿងចក្រឈូសដីនោះកាលពីដើមឆ្នាំ២០១៥៖ «ខ្ញុំចង់ឲ្យអាជ្ញាធរគ្រប់ក្រសួងស្ថាប័នទាំងអស់ហ្នឹង ជួយរកយុត្តិធម៌ឲ្យខ្ញុំ កុំឲ្យចេះតែកាន់ជើងបុគ្គលដែលធ្វើខុស ហើយថាល្អ ហើយអ្នកដែលត្រូវ បែរជាថាអាក្រក់។ សូមឲ្យមានភាពយុត្តិធម៌ឲ្យជនក្រីក្រដែលគ្មានលុយសូកប៉ាន់ទៅខាងមន្ត្រីរាជការ ឬអាជ្ញាធរណាម្នាក់។ សូមឲ្យគេមានទឹកចិត្តតស៊ូក្នុងឆាកជីវិតគេគ្រប់ៗគ្នាផង»។
លោកស្រីបញ្ជាក់ថា លោកស្រីជាសកម្មជនគណបក្សសង្គ្រោះជាតិ ប៉ុន្តែបច្ចុប្បន្នគាត់ចង់លះបង់ទៅធ្វើជាពលរដ្ឋសាមញ្ញវិញ ដោយអ្នកភូមិមួយចំនួន និងអាជ្ញាធរមូលដ្ឋានស្អប់ខ្ពើម និងមិនសូវរាប់រក។
វិទ្យុអាស៊ីសេរី មិនអាចរកប្រភពទាក់ទង លោក គិត ឈីវ ដើម្បីឆ្លើយតបនឹងការចោទប្រកាន់នេះបានទេ នៅថ្ងៃទី២៨ ខែវិច្ឆិកា។
ជំទប់ទី១ ជាមេឃុំស្ដីទីនៃឃុំស្វាយស លោក ចាន់ សៃ បញ្ជាក់ថា ជម្លោះដីធ្លីនេះ អាជ្ញាធរឃុំបានសម្រុះសម្រួលគូភាគីពី ៦ ទៅ ៧លើកហើយ ប៉ុន្តែនៅតែមិនត្រូវរ៉ូវគ្នា។ លោកថា ហេតុដែលក្មួយឈ្មោះ ញឹក សុភាព ទាមទារដីនោះ ដោយគេធ្លាប់ទៅធ្វើការនៅថៃ ផ្ញើលុយចិញ្ចឹមម្ដាយក្មេក លោកស្រី ខ្លឹម វណ្ណា ហើយថា នឹងចែកដីនោះទៅឲ្យគេ ប៉ុន្តែមិនបានធ្វើប្លង់កម្មសិទ្ធិ៖ «អត់មានរើសអើងទេក្មួយ ក្មួយឯងត្រូវគិតថា ដីគេមានប្លង់ត្រឹមឃុំត្រឹមអីនេះ គ្រាន់តែអង្វរទេ បើសិនណាជាគេមិនយល់ព្រម យើងអត់ចេះអីច្រើនទេ ព្រោះអីគេមានប្លង់រឹង បើគេមិនចែកមិនដឹងធ្វើម៉េចទេអស់ហើយ»។
មន្ត្រីសម្របសម្រួលនៃសមាគមអាដហុក (ADHOC) ខេត្តពោធិ៍សាត់ លោក ភួង សុធា ថ្លែងថា អាជ្ញាធរមិនសូវអើពើដោះស្រាយរឿងដីធ្លីនេះ ទំនងជាមានការរើសអើងខាងនយោបាយ ដោយ លោកស្រី ខ្លឹម វណ្ណា មាននិន្នាការគាំទ្រគណបក្សក្រៅរដ្ឋាភិបាល។ លោកធ្លាប់ពន្យល់ភាគីម្ចាស់ដីដែលមានប្លង់កម្មសិទ្ធិស្របច្បាប់ ឲ្យរៀបចំឯកសារពាក់ព័ន្ធបន្ថែម មុនលោកអាចជួបអាជ្ញាធរពិភាក្សាដោះស្រាយរឿងនេះ៖ «ជាដំណោះស្រាយ អាជ្ញាធរហៅគាត់មកសម្រុះសម្រួលគ្នា ហើយព្យាយាមឲ្យភាគីដាំស្រូវ (ញឹក សុភាព) ឈប់បង្កបង្កើនផលនៅលើដីហ្នឹងទៅ ហើយបើភាគីហ្នឹងនៅតែផ្គើនទេ ម្ចាស់ដី (លោកស្រី ខ្លឹម វណ្ណា) អាចដាក់ពាក្យបណ្ដឹងទៅតុលាការទៅ»។
យ៉ាងណា ម្ចាស់ដីមានប្លង់កម្មសិទ្ធិស្របច្បាប់ គឺលោកស្រី ខ្លឹម វណ្ណា ថានឹងចែកដីទំហំ ១ហិកតារដល់ភាគីម្ខាងទៀត បើគេយល់ព្រមទទួលយក ហើយលោកស្រីពុំទាន់មានគម្រោងដាក់ពាក្យបណ្ដឹងរឿងដីធ្លីនេះទៅតុលាការទេ ដោយរង់ចាំការដោះស្រាយពីគណៈអភិបាលខេត្តពោធិ៍សាត់ ភូមិបាលស្រុកក្រគរ និងសាលាឃុំស្វាយស ដែលគាត់ធ្លាប់ដាក់លិខិតសុំអន្តរាគមន៍ជាបន្តបន្ទាប់កាលពីពេលកន្លងទៅ៕