ពលរដ្ឋនៅសង្កាត់វិហារហ្លួង ក្រុងសួង ខេត្តត្បូងឃ្មុំ នាំគ្នាប្ដឹងទៅអាជ្ញាធរឲ្យដោះស្រាយសកម្មភាពឈូសឆាយទីកន្លែងកប់សពរបស់អ្នកភូមិ។ ពលរដ្ឋថា ការឈូសឆាយនោះអាចធ្វើទៅបាន គឺដោយសារតែមានការឃុបឃិតជាមួយអាជ្ញាធរភូមិ។ យ៉ាងណា មេភូមិបដិសេធថាខ្លួនមិនបានដឹងរឿងនេះទេ។
ពាក្យបណ្ដឹងរបស់អ្នកភូមិបានប្ដឹងចំពោះឈ្មោះ ឈាង ឈឿន និងបក្ខពួកដែលជាអ្នកពាក់ព័ន្ធផ្ទាល់ ទៅអាជ្ញាធរមានសមត្ថកិច្ចក្រុងសួង នៅថ្ងៃទី១៩ មីនា។
ពលរដ្ឋម្នាក់រស់នៅសង្កាត់វិហារហ្លួង លោក មិត្ត សាមឿន ឲ្យដឹងថា ការឈូសឆាយនោះ គឺបំពានលើបូរណភាពសាកសពម្ដាយរបស់លោក និងអ្នកផ្សេងទៀត។ លោកបន្ថែមថា គោលបំណងរបស់ ឈាង ឈឿន យកគ្រឿងចក្រទៅឈូសឆាយដីត្រពាំង និងកន្លែងកប់សពរបស់ពលរដ្ឋនៅក្នុងភូមិ គឺដើម្បីយកដីលក់ទៅឲ្យអ្នកផ្សេងទៀត ស្របពេលដីនៅទីនោះមានតម្លៃខ្ពស់នាពេលបច្ចុប្បន្ន។ ប្រភពដដែលបន្ថែមថា សកម្មភាពឈូសឆាយ គឺចាប់ផ្ដើមតាំងពីឆ្នាំ២០១៤ ហើយមានការជំទាស់ពីពលរដ្ឋ ទើបសកម្មភាពនោះផ្អាកទៅវិញ៖ «បាទ! ដីតំបន់ហ្នឹងទុកគ្រាន់តម្កល់សពទៅមុខទៀត។ ពីដើមគេធ្លាប់កប់កន្លែងហ្នឹង»។
ដីបរិវេណកប់សពដែលពលរដ្ឋទាមទារឲ្យរក្សាទុកគ្រាន់តម្កល់សពបន្តទៀតនោះ គឺមានទំហំប្រមាណ ៤ហិកតារ។ មកដល់ឆ្នាំ២០១៥ សកម្មភាពឈូសឆាយដីតំបន់ទួលត្រពាំងស្វាយ មានចំនួនពីរលើក។ លើកទី១ កាលពីចុងខែកុម្ភៈ ប៉ះពាល់ផ្នូរសពចំនួន៤ និងលើកទី២ កាលពីថ្ងៃទី១៣ មីនា ប៉ះពាល់ផ្នូរចំនួន ៦ទៀត។
ស្រដៀងគ្នានេះ ពលរដ្ឋម្នាក់ទៀត លោក ហាត ហឿន មានប្រសាសន៍ថា ពលរដ្ឋសម្រេចប្ដឹងទៅអាជ្ញាធរ ទាមទារឲ្យរក្សាទុកដីធ្វើជាកន្លែងបញ្ចុះសពរបស់ពលរដ្ឋតទៅមុខទៀត សុំឲ្យផ្ដន្ទាទោសដល់អ្នកប្រព្រឹត្តិ និងអ្នកពាក់ព័ន្ធទៅតាមផ្លូវច្បាប់ ជាដើម។ លោកបន្តថា កន្លងមកពលរដ្ឋធ្លាប់ប្ដឹងទៅអាជ្ញាធរមូលដ្ឋាន ប៉ុន្តែបញ្ហានៅតែកើតមានដដែល ទើបលោកយល់ថាអាចមានការឃុបឃិតគ្នាជាមួយអាជ្ញាធរភូមិ ពីព្រោះកន្លងមកធ្លាប់មានការលក់ដីតំបន់នោះខ្លះម្តងរួចទៅហើយ៖ «ទើបមេភូមិ និងអនុភូមិបានចុះហត្ថលេខាលក់ម៉ាសារួចមកហើយ ទើប ឈាង ឈឿន ហ៊ានមកយកកន្លែងហ្នឹងទៀត»។
ឆ្លើយតបបញ្ហានេះ មេភូមិថ្នល់ថ្មី លោក ចាប ដុំ មានប្រសាសន៍ថា ខាងលោកមិនបានឃុបឃិតជាមួយពលរដ្ឋឈ្មោះ ឈាង ឈឿន ឲ្យទៅឈូសឆាយលើដីកប់សពនោះទេ។ ផ្ទុយទៅវិញ ពលរដ្ឋរូបនោះបានធ្វើឡើងដោយខ្លួនឯង និងដោយលួចលាក់៖ «អត់ដឹងទេ គេលួចឈូសឆាយលោកគ្រូ។ ដល់ប្រជាជនគេឃើញគេប្ដឹងទៅ ខ្ញុំចុះត្រួតពិនិត្យទៅ ហើយគេឈប់មុនហ្នឹងទៀត»។
យ៉ាងណា វិទ្យុអាស៊ីសេរី នៅមិនអាចស្វែងរកប្រភពទាក់ទងពលរដ្ឋឈ្មោះ ឈាង ឈឿន បានទេនៅថ្ងៃទី១៩ មីនា។
ដោយឡែកចៅសង្កាត់វិហារហ្លួង លោក អ៊ី ឡៃថេង មានប្រសាសន៍ថា លោកក៏មិនបានដឹងពីការឈូសឆាយនោះភ្លាមៗទេ ក្រោយមកទើបលោកដឹងរឿង ហើយក៏បញ្ជូនសមត្ថកិច្ចឲ្យធ្វើការងារនេះ។ លោកថា ដីត្រពាំងក្បែរផ្នូរសព គឺឈ្មោះ ឈាង ឈឿន ធ្លាប់គ្រប់គ្រង ប៉ុន្តែលោកមិនដឹងច្បាស់ថាដីនោះមានលក្ខណៈយ៉ាងណាទេ។ លោកបញ្ជាក់ថា ការឈូសឆាយកន្លែងកប់សពជារឿងមិនត្រឹមត្រូវ ពីព្រោះដីតំបន់នោះគ្មានការលក់ដូរ ចំណែកអាជ្ញាធរក៏មិនបានគាំទ្រសកម្មភាពទាំងនោះដែរ៖ «អានេះជាការលើកឡើងរបស់គាត់ទេ។ តាមពិតកន្លែងកប់សពរួមហ្នឹង គេនៅខាងក្នុងទេ។ អាដីនេះនៅខាងក្រៅ ប៉ុន្តែវាមានផ្នូរព័ទ្ធជុំវិញ»។
បន្ថែមលើការអះអាងរបស់ចៅសង្កាត់វិហារហ្លួង មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តត្បូងឃ្មុំ លោក នាង សុវ៉ាត មានប្រសាសន៍ថា ពលរដ្ឋដែលយកគ្រឿងចក្រទៅឈូសឆាយកន្លែងកប់សពរបស់ពលរដ្ឋនៅក្នុងភូមិ គឺជារឿងខុសច្បាប់ភូមិបាល។ ជាងនេះទៅទៀត អ្នកប្រព្រឹត្តិបែបនេះ បើមានភស្តុតាងជាក់ស្តែងពិតមែន ត្រូវមានទោសតាមច្បាប់ព្រហ្មទណ្ឌ ទាក់ទងការបំផ្លាញទ្រព្យសម្បត្តិអ្នកដទៃ និងម្យ៉ាងទៀត គឺបំពានលើផ្នែកសីលធម៌ សុជីវធម៌ ប្រពៃណី សាសនា ទៀតផង ពីព្រោះគេបានបំផ្លាញកន្លែងជាទីសក្ការៈគោរពបូជារបស់អ្នកភូមិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។