អ្នកស្រុកជាង ៣០គ្រួសារ ប្រឈមនឹងការបណ្ដេញចេញពីភូមិ និងអាចមិនទទួលបានការផ្តល់សេវារដ្ឋបាលពីភូមិឃុំ។ ការគំរាមនេះ បន្ទាប់ពីពលរដ្ឋមិនព្រមធ្វើតាមបញ្ជារបស់អនុប្រធានភូមិម្នាក់ក្នុងខេត្តក្រចេះ។
ខណៈបញ្ជាទៅប្រធានក្រុមឲ្យរៃអង្គាសប្រាក់មួយម៉ឺនរៀលពីអ្នកភូមិមិនបាន អនុប្រធានភូមិក្រសាំង លោក សោ កួង បានយកតួនាទីរបស់ខ្លួនព្រមានកាត់ពលរដ្ឋចេញពីភូមិភ្លាម ក្រោមហេតុផលថា អ្នកភូមិមានមេបក្ខពួកមេកើយថ្មី។ ចំណែកអាជ្ញាធរខេត្តក្រចេះ ថានឹងចាត់ការលើរឿងនេះ។
លោក ខន ស៊ីណិត ជាប្រជាពលរដ្ឋរស់នៅភូមិក្រសាំង ឃុំស្នួល ស្រុកស្នួល ខេត្តក្រចេះ ដែលមានតួនាទីជាប្រធានក្រុម ឲ្យដឹងថា កាលពីថ្ងៃទី១៦ ខែវិច្ឆិកា អនុប្រធានភូមិក្រសាំង លោក សោ កួង បានប្រាប់ឲ្យលោក និងប្រធានក្រុមផ្សេងទៀត ទៅរៃអង្គាសប្រាក់ពីប្រជាពលរដ្ឋក្នុងភូមិមួយគ្រួសារមួយម៉ឺនរៀល ដើម្បីធ្វើបល្ល័ង្កព្រះ។ លោកបន្តថា លោកបដិសេធ ទើបលោកអនុប្រធានភូមិខឹងច្រឡោត និងស្រែកក្ដែងៗថា ពួកលោកមានមេថ្មីផ្សេងទើបមិនស្តាប់បញ្ជារបស់ថ្នាក់ដឹកនាំ៖ «ខ្ញុំហ្នឹងបានប្រាប់គាត់ថា បងអើយបើសិនបើបងដាក់កំណត់មួយគ្រួសារមួយម៉ឺនចឹង គឺពួកខ្ញុំចូលអត់បានទេ ព្រោះអីពួកខ្ញុំសុទ្ធតែអ្នកគ្មានលុយ អ្នកស៊ីឈ្នួលគេទាំងអស់ បើសិនតាមកម្លាំងសទ្ធារបស់គាត់ ប្រហែលជាបានបង»។
ប្រជាពលរដ្ឋចំនួន ២៣០គ្រួសារ ភាគច្រើនមានជីវភាពក្រខ្សត់ និងប្រកបរបរធ្វើស្រែចម្ការស៊ីឈ្នួលដាំដំឡូង និងធ្វើកម្មករក្នុងចម្ការកៅស៊ូ។
ប្រជាពលរដ្ឋមួយរូបទៀតដែលនៅក្នុងហេតុការណ៍នោះដែរ លោកស្រី ថន ស្រីណា និយាយថា លោកអនុប្រធានភូមិបានស្រែកខ្លាំងៗមកក្រុមប្រជាពលរដ្ឋថា ក្រុមប្រជាពលរដ្ឋចង់បះបោរ ទើបមិនស្តាប់តាមលោក។ លោកស្រី ថន ស្រីណា បន្តថា លោក សោ កួង ថាចាប់ពីពេលនេះតទៅ លោកលែងដឹងឮរឿងពលរដ្ឋក្នុងភូមិនេះហើយ៖ «ខ្ញុំស្តាប់គាត់ គាត់និយាយឮៗ គាត់ថាកាត់ចោល អត់ទទួលស្គាល់ អ្ហែងមានរឿងអីកុំប៉ះអញ អញលែងដឹងឮហើយ ថ្ងៃណាយើងទុក្ខធុរៈរត់រកគាត់អ៊ីចឹងទៅ គាត់អត់ទទួលដឹងឮ»។
ប្រជាពលរដ្ឋបញ្ជាក់ថា ជារឿយៗនៅពេលដែលអនុប្រធានភូមិ លោក សោ កួង ស្រវឹងស្រា លោកតែងតែនិយាយផ្លែផ្កាទៅប្រជាពលរដ្ឋថា ពួកគេមានមេកើយថ្មី និងមានបក្សថ្មី។
យ៉ាងណាក៏ដោយ លោក សោ កួង បានឆ្លើយតបចំពោះការចោទប្រកាន់ថា លោកពិតជាបានចាត់តាំងមេក្រុមរៃអង្គាសប្រាក់ ប៉ុន្តែលោកមិនបានដាក់កំហិតថាមួយគ្រួសារត្រូវរៃប្រាក់មួយម៉ឺនរៀលទេ។ លោកអនុប្រធានភូមិ បដិសេធការចោទប្រកាន់ថាលោកកាត់ពលរដ្ឋចេញពីភូមិ ប៉ុន្តែលោកបានព្រមានកាត់ប្រធានក្រុមចេញពីតួនាទីភូមិមែន៖ «ជាសិទ្ធិរបស់គេ គេចង់ថាម៉េចថាទៅ គេចោទប្រកាន់ម៉េចចោទទៅ ប៉ុន្តែឲ្យច្បាស់លាស់ផង មុននឹងចោទប្រកាន់ខ្ញុំហ្នឹងណា។ ធម្មតាខ្ញុំជាអ្នកដឹកនាំភូមិមួយដែរ។ យើងមានការឆេវឆាវបន្តិចដែរ មិនមែនថាខ្ញុំមិនឆេវឆាវទេបាទ ដូចថា គេមិនសូវស្តាប់បង្គាប់ចឹងណា យើងបញ្ជាទៅគេធ្វើមិនដឹងធ្វើមិនឮ ធ្វើហី ធ្វើព្រងើយ»។
ក្រោយកើតរឿងនេះ ក្រុមប្រជាពលរដ្ឋជាង ៣០គ្រួសារ បាននាំគ្នាដាក់ពាក្យបណ្ដឹងទៅលោកមេឃុំស្នួល ដើម្បីរកដំណោះស្រាយ និងទាមទារឲ្យឃុំប្ដូរអនុប្រធានភូមិចេញ។
លោក វ៉ាន ឌឿន មេឃុំស្នួល ស្រុកស្នួល ខេត្តក្រចេះ បន្ទាប់ពីទទួលបានពាក្យបណ្ដឹងពីក្រុមប្រជាពលរដ្ឋ ឲ្យដឹងថា លោកនឹងកោះហៅក្រុមប្រឹក្សាឃុំប្រជុំ និងស៊ើបអង្កេត។ លោកថា ក្នុងករណីរកឃើញដូចជាប្រជាពលរដ្ឋចោទប្រកាន់មែននោះ ឃុំនឹងដកតំណែងលោកអនុប្រធានភូមិចេញពីតួនាទី។
អភិបាលរងខេត្តក្រចេះ លោក ខាន់ ចំណាន មិនទាន់បានជ្រាបរឿងនេះនៅឡើយទេ ប៉ុន្តែលោកថា អនុប្រធានភូមិគ្មានសិទ្ធិកាត់ប្រជាពលរដ្ឋចេញឡើយ។ លោកថា លោកនឹងបញ្ជាឲ្យអភិបាលស្រុក ចុះស៊ើបអង្កេតរឿងនេះ៖ «យើងខ្ញុំនឹងធ្វើការស៊ើបអង្កេតសួរនាំរឿងនេះ ជួនកាលកើតចេញពីបុគ្គលខ្លួនគាត់ម្នាក់ ដែលគាត់ខឹងសម្បាបុគ្គល គ្រួសារអីណាមួយគាត់អាចនិយាយលើសលួសចឹងទៅ»។
ភូមិក្រសាំង ជាភូមិទើបបង្កើតថ្មីកាលពីឆ្នាំ២០០៨។ ពលរដ្ឋរស់នៅក្នុងភូមិនេះ ទើបតែមានសិទ្ធិគ្រប់គ្រាន់ក្នុងការកាន់កាប់ និងអាស្រ័យផលលើដីធ្លី កាលពីខែឧសភា ឆ្នាំ២០១៤ បន្ទាប់ពីក្រុមអ្នកភូមិទៅទាមទារតវ៉ាសុំប្លង់កម្មសិទ្ធិដីធ្លីនៅភ្នំពេញ ដល់មុខផ្ទះលោកនាយករដ្ឋមន្ត្រី ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។