អាជ្ញាធរ និងប្រជាពលរដ្ឋភូមិព្រែកជីក ឃុំជីខក្រោម ស្រុកស្រែអំបិល ខេត្តកោះកុង ទាមទារឲ្យរដ្ឋាភិបាលចេញលិខិតកាន់កាប់ដីលំនៅឋានបណ្ដោះអាសន្ន ខណៈដីចម្ការ និងដីស្រែ ស្ថិតក្នុងដីចម្ការអំពៅ។
ការទាមទារនេះ បានធ្វើឡើងនៅថ្ងៃទី១០ ខែមករា ឆ្នាំ២០១៤ នៅគ្រាដែលមានប្រជាពលរដ្ឋជាច្រើនគ្រួសារកំពុងខ្វះខាតថវិកាសម្រាប់ចំណាយក្នុងគ្រួសារ ដោយសារគ្មានចំណូលពីផលដំណាំ មានតែដីផ្ទះដែលអាចដាក់បញ្ចាំ ដើម្បីខ្ចីប្រាក់ពីស្ថាប័នមីក្រូហិរញ្ញវត្ថុ។
អ្នកភូមិព្រែកជីក លោក ជី លាង ឲ្យដឹងថា ដីផ្ទះគាត់ទំហំប្រមាណ ៣០ម៉ែត្របួនជ្រុង មិនអាចយកទៅធ្វើអីក្រៅពីរស់នៅប៉ុណ្ណោះ ព្រោះដី និងផ្ទះលក់មិនចេញ ដាក់បញ្ចាំក៏មិនបាន៖ «អាជ្ញាធរយើងហ្នឹង ឲ្យគាត់បញ្ជាក់ពីដីខ្ញុំអ៊ីចឹងៗ ដូចថាទំហំប៉ុន្មានៗអ៊ីចឹង ដើម្បីងាយស្រួលដល់ខ្ញុំចង់ខ្ចីលុយអីខាងស្ថាប័នហិរញ្ញវត្ថុអីហ្នឹង ខ្ញុំយកមកប្រកបមុខរបរខ្ញុំ»។
ស្ត្រីអាយុ ៥២ឆ្នាំ ឈ្មោះ ស៊ុន រ៉ាន់ ឲ្យដឹងថា ប្តីគាត់ពិការ ឯកូនជាប់បាក់ឌុប គ្មានការងារធ្វើ មិនមានលុយបង់រៀនមហាវិទ្យាល័យ ទើបគាត់ចង់បញ្ចាំដីភូមិទៅស្ថាប័នមីក្រូហិរញ្ញវត្ថុ យកលុយខ្ចីបានទៅដោះស្រាយបញ្ហា។ ប៉ុន្តែ អាជ្ញាធរភូមិឃុំ មិនអាចចេញលិខិតបញ្ជាក់ឲ្យឡើយ បើទោះបីដីផ្ទះមិនពាក់ព័ន្ធក្រុមហ៊ុនដាំអំពៅក៏ដោយ។ ស្ត្រីនោះអះអាងថា ដីអ្នកខ្លះជាប់ក្នុងប្លង់មន្ត្រីធំដែលគេទិញលក់ដីគ្នាគេឯណោះទេ តែមកគូសប្លង់យកដោយដីប្រជាពលរដ្ឋ នាំឲ្យពាក់ព័ន្ធកើតជម្លោះឡើងតុលាការ៖ «ចង់បានលិខិតបញ្ជាក់ថា ដីនេះជាដីរបស់ខ្ញុំពិតប្រាកដអ៊ីចឹង។ ដីលំនៅឋានក៏មិនទាន់មាន ខ្ញុំវារងគ្រោះច្រើនណាស់»។
ស្ត្រីឈ្មោះ តឹង ឈីវ ថ្លែងថា គាត់លំបាកណាស់ក្នុងការបញ្ជាក់ប័ណ្ណដី ដើម្បីខ្ចីលុយ ព្រោះមេភូមិគេចមិនព្រមចេញលិខិតកាន់កាប់ដីផ្ទះឲ្យអ្នកភូមិឡើយ។ ប៉ុន្តែនៅពេលបោះឆ្នោត អ្នកភូមិទៅបោះឆ្នោត តែអ្នកភូមិនៅតែរងនូវការចោទថា រស់នៅមិនស្របច្បាប់ទៅវិញ។
លោក រតនា អះអាងថា អ្នកភូមិព្រែកជីក មិនយល់ពីវិធានការរបស់អាជ្ញាធរកម្ពុជា ឡើយ ព្រោះអ្នករស់នៅផ្ទាល់បែរជាគ្មានសិទ្ធិលើដីផ្ទះ និងរងនូវការចោទថា រស់នៅមិនស្របច្បាប់។ តែក្រុមហ៊ុនមកពីបរទេសសោះ បែរជាមានសិទ្ធិវិនិយោគលើដីប្រជាពលរដ្ឋកំពុងប្រមូលផលដាំដុះ ទើបប្រជាពលរដ្ឋតវ៉ាសុំប័ណ្ណកាន់កាប់ដីផ្ទះនេះ ដើម្បីដាក់បញ្ចាំខ្ចីលុយប្រើការ។
មេភូមិព្រែកជីក លោក ហា នូ បញ្ជាក់ថា គាត់ និងអ្នកភូមិគ្មានសិទ្ធិដូចគ្នាក្នុងការប្រើប្រាស់ដីផ្ទះ។ លោកថា ម្នាក់ៗជំពាក់គេវ័ណ្ឌក ដោយសារគ្មានចំណូលពីផលដំណាំផង ហើយក៏មិនអាចដាក់បញ្ចាំដីផ្ទះបានទៀត។ លោកថា ភូមិខ្លះក្នុងឃុំជីខលើ និងឃុំជីខក្រោម ដីពលរដ្ឋបានរស់នៅស្ថិតក្នុងប្លង់ទិញលក់របស់អ្នកផ្សេងទៅទៀត។ ប្រជាពលរដ្ឋបានឡើងតុលាការច្រើនលើក នៅតែរឿងដីនោះកាត់សេចក្តីមិនដាច់ស្រេច ទើបពលរដ្ឋទាំងជាង ៧០គ្រួសារ មានរូបគាត់ និងប្រជាពលរដ្ឋក្នុងភូមិគ្មានប័ណ្ណកាន់កាប់ដីលំនៅឋានទាំងអស់គ្នា ដើម្បីប្រើប្រាស់ដោះស្រាយបញ្ហាផ្សេងៗ៖ «ជាមេភូមិហ្នឹង បានតែមេភូមិត្រួតត្រាប្រជាជន បើអារឿងទឹកដី វាមិនដឹងសោះ មិនដឹងអ្នកណាកាត់តាំងស្មើណា ខ្ញុំអត់បានដឹង»។
វិទ្យុអាស៊ីសេរី មិនអាចទាក់ទង លោក ជា នាង មន្ត្រីសុរិយោដី ស្រុកស្រែអំបិល ជម្រាបសួរអំពីការផ្តល់ប័ណ្ណកម្មសិទ្ធិដីលំនៅឋាននៅឃុំជីខក្រោម បានទេនៅថ្ងៃសុក្រ ទី១០ ខែមករា ឆ្នាំ២០១៤។
មន្ត្រីសម្របសម្រួលអង្គការលីកាដូ (Licadho) ខេត្តកោះកុង លោក អ៊ិន គង់ជិត ឲ្យដឹងថា តាមច្បាប់ភូមិបាល ពលរដ្ឋដែលគាត់តាំងលំនៅជាង ២០ឆ្នាំ មានសៀវភៅស្នាក់នៅ មានកាតសម្គាល់ខ្លួន មានឈ្មោះក្នុងបញ្ជីបោះឆ្នោត ហើយបានបោះឆ្នោតរាល់លើក គឺពួកគាត់រស់នៅស្របច្បាប់ ដែលរដ្ឋាភិបាលអាចចេញប័ណ្ណកាន់កាប់ដីឲ្យហើយ។
អភិបាលរងខេត្តកោះកុង លោក អ៊ុន ឆាលី ពន្យល់ថា ដីកំពុងមានជម្លោះ មិនអាចឲ្យពលរដ្ឋទទួលបានប័ណ្ណដីទេ។ លោកមិនដឹងថា ដីនៅភូមិព្រែកជីក នោះកំពុងមានជម្លោះដី ឬអត់ នៅតុលាការ តែអ្នកកំពុងរស់នៅផ្ទាល់ គឺមានសិទ្ធិលើដីនោះហើយ។ លោកថា ការសម្រេចវាស់វែងដើម្បីផ្តល់ប័ណ្ណកាន់កាប់ដីនោះ គឺមន្ត្រីសុរិយោដីមូលដ្ឋាន ទើបដឹងច្បាស់ជាងអាជ្ញាធរខេត្ត៖ «យើងមើលច្បាប់ភូមិបាលមើល យើងអនុវត្តតាមនីតិវិធីច្បាប់ភូមិបាលទៅ គាត់រស់នៅជាក់ស្តែងរបស់គាត់ មានផ្ទះសម្បែង មានដំណាំរបស់គាត់ អាហ្នឹងយើងធ្វើតាមនីតិវិធីច្បាប់ទៅការវាស់វែងហ្នឹង មានអ្នកណាមិននេះឲ្យគាត់»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។