ប្រជាពលរដ្ឋជាង ៣០នាក់ នៅស្រុកវាលវែង ខេត្តពោធិ៍សាត់ នាំគ្នាតវ៉ានៅខាងមុខតុលាការខេត្តនេះ ទាមទារឲ្យដោះលែងស្ត្រីម្នាក់ដែលកម្លាំងសមត្ថកិច្ចចម្រុះចាប់ខ្លួន កាលពីថ្ងៃទី១២ ខែកុម្ភៈ ទាក់ទងនឹងរឿងដីធ្លី។ កាលណោះ គឺក្រុមអាជ្ញាធរបានប្រើរូបភាពនៃការបណ្ដេញចេញដោយអារជើងសសររំលំ និងដុតផ្ទះសម្បែងប្រជាពលរដ្ឋ។
មន្ត្រីសិទ្ធិមនុស្ស បានចាត់ទុកថា ករណីនេះ គឺជារឿងរំលោភសិទ្ធិមនុស្សធ្ងន់ធ្ងរ ដោយសារតែមានការដុតបំផ្លាញផ្ទះរបស់ប្រជាពលរដ្ឋ ហើយចាប់ខ្លួនពួកគាត់ទៀត។
ប្រជាពលរដ្ឋរស់នៅភូមិចម្ការចេក ឃុំក្រពើពីរ នៅថ្ងៃទី១៣ ខែកុម្ភៈ បានកាន់បដាពាក្យស្លោកស្ទើរគ្រប់ដៃ និងស្រែកទាមទារឲ្យដោះលែងស្ត្រីម្នាក់ឈ្មោះ ស៊ិន សៀន អាយុ ៤៧ឆ្នាំ និងស្នើឲ្យបញ្ឈប់សកម្មភាពដុតបំផ្លាញផ្ទះ ឬចាប់ខ្លួនប្រជាពលរដ្ឋដាក់គុក ក្រោមហេតុផលថា ពួកគាត់រស់នៅលើដីរដ្ឋ។
ប្រជាពលរដ្ឋម្នាក់ លោក ស៊ឹម វណ្ណី មានប្រសាសន៍ថា ប្រជាពលរដ្ឋចំនួន ១២៥គ្រួសារ កំពុងតែគ្មានទីជម្រក និងប្រឈមបញ្ហាជាច្រើនទៀត បន្ទាប់ពីកម្លាំងសមត្ថកិច្ចចម្រុះដឹកនាំដោយព្រះរាជអាជ្ញារងខេត្តពោធិ៍សាត់ លោក ប៉ង់ ចាន់សុយុទ្ធារ៉ា ចុះបណ្ដេញប្រជាពលរដ្ឋចេញពីដីធ្លីពួកគាត់កំពុងរស់នៅដោយបង្ខំ កាលពីព្រឹកថ្ងៃទី១២ ខែកុម្ភៈ៖ «មន្ត្រីគ្រប់ស្ថាប័នសុំឲ្យដោះលែង អ្នកស្រី ស៊ិន សៀន ចាប់ពីពេលនេះម៉ោងនេះតទៅ ហើយសូមឲ្យទទួលស្គាល់ខ្មែរផង ឲ្យចុះសិទ្ធិកាន់កាប់ដីធ្លីចាប់ពីពេលនេះតទៅ។ ឈប់ដុតបំផ្លាញតទៅទៀត សុទ្ធតែឈាមជ័ររបស់ខ្មែរទេ ពូជសាសន៍ខ្មែរតែមួយទេបង»។
ឆ្លើយតបនឹងបញ្ហានេះ ព្រះរាជអាជ្ញារងអមសាលាដំបូងខេត្តពោធិ៍សាត់ លោក ប៉ង់ ចាន់សុយុទ្ធារ៉ា បញ្ជាក់ថា ការបណ្ដេញពលរដ្ឋចេញពីលំនៅឋាននេះ មិនមែនជាការអនុវត្តសាលក្រមអ្វីឡើយ ក៏ប៉ុន្តែ វាគឺជាវិធានរដ្ឋបាលរបស់អាជ្ញាធរខេត្ត ក្នុងការទប់ស្កាត់បទល្មើសកាប់រានដីព្រៃរបស់រដ្ឋ។ លោកបន្តថា នៅក្នុងសកម្មភាពនោះ សមត្ថកិច្ចបានឃាត់ខ្លួនស្ត្រីម្នាក់មែន និងមានមនុស្សជាច្រើននាក់ផ្សេងទៀតនឹងត្រូវអនុវត្តនៅពេលក្រោយ ទាក់ទងនឹងសកម្មភាពកាប់រានដីព្រៃរបស់រដ្ឋ៖ «ដីវានៅកណ្ដាលព្រៃហ្នឹង ហើយព្រៃវារុំព័ទ្ធជិតហ្នឹង ហើយនាំគ្នាទៅរានចំកណ្ដាលព្រៃហ្នឹងណា៎។ អាហ្នឹងបទល្មើសជាក់ស្ដែង យើងអាចឃាត់ខ្លួនបាន។ ខ្ញុំអត់ដឹងដែរ ខ្ញុំបញ្ជូនចេញទៅបាត់ហើយ ដឹងនៅចៅក្រមណាចាត់ចែង»។
វិទ្យុអាស៊ីសេរី មិនអាចទាក់ទងអភិបាលរងខេត្តពោធិ៍សាត់ ទទួលបន្ទុកដោះស្រាយទំនាស់ដីធ្លី លោក សួន រិន្ទឌី ដើម្បីសុំការអត្ថាធិប្បាយបន្ថែមជុំវិញបញ្ហានេះបានទេ នៅថ្ងៃទី១៣ ខែកុម្ភៈ។
ទោះជាយ៉ាងណា ក្រុមប្រជាពលរដ្ឋបញ្ជាក់ថា អាជ្ញាធរ និងកម្លាំងសមត្ថកិច្ចចម្រុះ បានបណ្ដេញអ្នកភូមិចេញដោយបង្ខំជាបន្តបន្ទាប់ តាំងពីខែកក្កដា ឆ្នាំ២០១២ ចំនួនបីដងរួចមកហើយ ក្នុងរូបភាពអារជើងសសររំលំ និងដុតផ្ទះចោល។ កាលពីដំបូងឡើយ មានប្រជាពលរដ្ឋចំនួន ១៨៥គ្រួសារ បានទទួលរងនូវផលប៉ះពាល់ ហើយបច្ចុប្បន្ននៅសល់ចំនួន ១២៥គ្រួសារ។
មន្ត្រីសម្របសម្រួលសមាគមអាដហុក (Adhoc) ប្រចាំខេត្តពោធិ៍សាត់ លោក ភួង សុធា ថ្លែងថា ក្រោយចុះទៅដល់មូលដ្ឋានផ្ទាល់ និងបានសាកសួរទៅលើប្រជាពលរដ្ឋមួយចំនួនឲ្យដឹងថា អ្នកភូមិត្រូវបានអាជ្ញាធរដោះដូរដីឲ្យទៅរស់នៅកន្លែងថ្មី ដែលមានចម្ងាយប្រមាណជា ១០គីឡូម៉ែត្រពីទីតាំងដែលគាត់កំពុងតែរស់នៅនេះ ក៏ប៉ុន្តែពួកគាត់បានចូលមករស់នៅ និងកាន់កាប់កន្លែងចាស់វិញ ដោយសារនៅទីនោះពុំមានហេដ្ឋារចនាសម្ព័ន្ធ និងដីគ្មានជីជាតិសម្រាប់បង្កបង្កើនផលឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។