មជ្ឈមណ្ឌលអភិវឌ្ឍន៍យោធិនពិការ៣១៧ ដែលសង់លើផ្ទៃដីរាប់ពាន់ហិកតារ នៅភូមិស្នាសង្គ្រាម ស្រុកប្រាសាទបាគង ខេត្តសៀមរាប កើតមានដោយសារអាជ្ញាធរដកហូតយកដីកម្មសិទ្ធិរបស់ប្រជាពលរដ្ឋ ៣២គ្រួសាររយៈពេលច្រើនឆ្នាំមកហើយ។
កាលពីខែសីហា កន្លងទៅ អភិបាលខេត្តសៀមរាប ធ្លាប់បានសរសេរលិខិតមួយច្បាប់ ផ្ញើជូនរដ្ឋលេខាធិការក្រសួងការពារជាតិ និងជាប្រធានគណៈកម្មការសាងសង់មជ្ឈមណ្ឌលអភិវឌ្ឍន៍យោធិនពិការនោះ ឱ្យជួយដោះស្រាយគោលនយោបាយសំណងជូនប្រជាពលរដ្ឋចំនួន ៣២គ្រួសារឡើងវិញ។
ក៏ប៉ុន្តែ ចាប់តាំងពីអាជ្ញាធរខេត្តស្នើសុំឱ្យដោះស្រាយដីធ្លីនោះ ស្រាប់តែមានក្រុមឈ្មួញខ្លះនាំគ្នាទៅវាស់ដីដែលកំពុងតែទាមទារនោះ លក់ទៅឱ្យអ្នកផ្សេង។
ប្រជាពលរដ្ឋនៅភូមិស្នាសង្គ្រាម ស្រុកប្រាសាទបាគង ជិត ៤០គ្រួសារ បាននាំគ្នាឡើងមកសាលាខេត្តសៀមរាប ជាថ្មី ដោយសារតែរឿងរដ្ឋដកហូតយកដីធ្លីរបស់ពួកគេ ហើយមិនទាន់បានដោះស្រាយដីសងវិញនៅឡើយ។
ក្រុមអ្នកភូមិ ទាមទារឱ្យអាជ្ញាធរខេត្តសៀមរាប ត្រូវតែដោះស្រាយ និងបញ្ឈប់សកម្មភាពរបស់ឈ្មួញខ្លះ ដែលនាំគ្នាទៅវាស់ដីធ្លីលក់ នៅពេលដែលអាជ្ញាធរកំពុងតែស្នើសុំទៅក្រសួងការពារជាតិ ឱ្យដោះស្រាយរឿងគោលនយោបាយដីធ្លីសងអ្នកភូមិវិញនោះ។
តំណាងអ្នកភូមិស្នាសង្គ្រាម គឺលោក រស់ សំអុល។ លោកមានប្រសាសន៍ថា រូបលោក និងអ្នកភូមិ បានស្នើសុំអភិបាលខេត្តឱ្យជួយដោះស្រាយទំនាស់ដីធ្លីនៅចំណុចខាងជើងភ្នំតាពុធ ដែលជាប់ពាក់ព័ន្ធនឹងដីកាលេខ០៨៥ ហើយក៏ជាប់ពាក់ព័ន្ធនឹងការសាងសង់មជ្ឈមណ្ឌលយោធិនពិការ៣១៧។ ក្រោយមក ដីនោះមិនដឹងជាមានការដោះដូរយ៉ាងម៉េច ក៏ធ្លាក់ទៅក្នុងការកាន់កាប់របស់ លោក សៅ រ៉ានី ហើយកាលពីពេលថ្មីៗមានការវាស់វែងលក់ដូរ។
តំណាងអ្នកភូមិស្នាសង្គ្រាម បញ្ជាក់ទៀតថា កាលពីថ្ងៃទី២១ ខែសីហា កន្លងទៅ អភិបាលខេត្តសៀមរាប បានធ្វើសំណើមួយទៅក្រសួងការពារជាតិ ឱ្យដោះស្រាយគោលនយោបាយដីធ្លីជូនប្រជាពលរដ្ឋវិញ ក៏ប៉ុន្តែស្របពេលដែលសំណើនោះមិនទាន់ឆ្លើយតបយ៉ាងណាផង បែរជាដីដែលសម្រាប់ដោះស្រាយជូនពួកគាត់នៅម្ដុំភ្នំតាពុធ នោះ ត្រូវក្រុមឈ្មួញចុះវាស់វែងលក់ទៅហើយ៖ «ក្រោយពីខ្ញុំបានគោលការណ៍របស់ខេត្តហ្នឹង ស្រាប់តែមានឈ្មួញដើរវាស់ដើរអីលក់គ្រប់តែកន្លែងអ៊ីចឹង។ ខ្ញុំដាក់លិខិតសុំឱ្យអាជ្ញាធរទប់ស្កាត់សកម្មភាពរំលោភដីធ្លីហ្នឹង ហើយទប់ស្កាត់ការចេញប័ណ្ណផ្ដល់កម្មសិទ្ធិឱ្យអ្នកទិញ និងអ្នកលក់នៅលើដីជម្លោះជាមួយប្រជាពលរដ្ឋ។ ហើយម្យ៉ាងទៀត ក៏ខ្ញុំសំណូមពរឱ្យអភិបាលខេត្ត គាត់ចុះមកដោះស្រាយ និងវាស់វែងធ្វើប្លង់ឱ្យប្រជាពលរដ្ឋ»។
អាជ្ញាធរស្រុកប្រាសាទបាគង ឱ្យដឹងថា ប្រជាពលរដ្ឋនៅភូមិស្នាសង្គ្រាម ឃុំបល្ល័ង្ក ចំនួន ៣២គ្រួសារ បានប៉ះពាល់ដីធ្លីទំហំប្រមាណ ៦០ហិកតារ ដោយសាររដ្ឋាភិបាលបង្កើតមជ្ឈមណ្ឌលអភិវឌ្ឍន៍យោធិនពិការ៣១៧ ជាច្រើនឆ្នាំមកហើយ។
កាលពីថ្ងៃទី២៨ ខែសីហា កន្លងទៅ អ្នកភូមិស្នាសង្គ្រាម ជិត ៣០នាក់ បានលើកគ្នាមកសាលាខេត្តសៀមរាប ម្ដងមកហើយ ដើម្បីទាមទារឱ្យអាជ្ញាធរខេត្តសៀមរាប ពន្លឿនការដោះស្រាយសំណងដីធ្លីមកឱ្យពួកគាត់វិញឱ្យឆាប់រហ័ស។
កាលពីថ្ងៃទី១៧ ខែតុលា កន្លងទៅ មន្ត្រីសាលាខេត្តសៀមរាប បានជួបប្រជុំជាមួយអ្នកភូមិស្នាសង្គ្រាម ម្ដងទៀត ដើម្បីស្វែងរកការដោះស្រាយរឿងនោះ។
ជំនួយការអភិបាលខេត្តសៀមរាប លោក សុខ ថុល មានប្រសាសន៍ថា អភិបាលខេត្តកំពុងស្នើសុំគោលការណ៍ដោះស្រាយដីធ្លីជូនប្រជាពលរដ្ឋ ១៩គ្រួសារ ដែលប៉ះពាល់ដោយការសាងសង់មជ្ឈមណ្ឌលជនពិការនោះ ហើយចំណែកប្រជាពលរដ្ឋជាច្រើនគ្រួសារទៀតដែលកំពុងមានបញ្ហាទំនាស់ដីធ្លីជាមួយ លោក សៅ រ៉ានី នោះ គឺអាជ្ញាធរគ្រោងនឹងចុះពិនិត្យនៅសប្ដាហ៍ខាងមុខ៖ «ឯកឧត្តមអភិបាលខេត្ត គាត់ចាត់អភិបាលរងម្នាក់ ឯកឧត្តម ស៊ិន រុន គាត់អ្នកទទួលបន្ទុកដឹកនាំដោះស្រាយរឿងហ្នឹង ហើយប្រហែលជាថ្ងៃច័ន្ទ អីហ្នឹងចុះទៅត្រួតពិនិត្យហើយ។ ក្រុមការងារពិនិត្យហ្នឹងបើសិនជារកឃើញការពាក់ព័ន្ធ ថាមានការចុះទៅវាស់ដីប៉ះពាល់ប្រជាពលរដ្ឋអី អាហ្នឹងគណៈកម្មការពិនិត្យ និងដោះស្រាយ សម្របសម្រួលជាក់ស្ដែង»។
ទោះយ៉ាងណា ក្រុមអង្គការសិទ្ធិមនុស្សក្រៅរដ្ឋាភិបាល ដែលតាមឃ្លាំមើលរឿងនោះ បានរិះគន់ថា អាជ្ញាធរខេត្តសៀមរាប ហាក់ដូចជាដោះស្រាយបញ្ហាយឺតយ៉ាវមិនទាន់ដំណើរប្រែប្រួលនៃសាច់រឿងនោះទេ។
អ្នកស៊ើបអង្កេតសមាគមការពារសិទ្ធិមនុស្សអាដហុក (adhoc) លោក សួស ណារិន បានហៅការដោះស្រាយរបស់អាជ្ញាធរខេត្តសៀមរាប ជុំវិញរឿងដីធ្លីជាមួយមជ្ឈមណ្ឌលជនពិការ៣១៧ នោះថាគឺបានត្រឹមតែសន្យា ដោយមិនមានអ្វីច្បាស់លាស់ឱ្យប្រជាពលរដ្ឋសង្ឃឹមនៅឡើយ។ លោក សួស ណារិន រិះគន់ថា នៅពេលប្រជាពលរដ្ឋលើកគ្នាមកតវ៉ានៅមុខសាលាខេត្តនោះ គឺមិនដែលឃើញអភិបាលខេត្តរងណាចេញមុខមកដោះស្រាយទេ ឃើញតែថ្នាក់នាយខុទ្ទកាល័យរងសាលាខេត្តមកទទួល។ បញ្ហានេះ លោកព្រួយបារម្ភខ្លាចក្រែងអភិបាលខេត្តមិនដែលទទួលបានព័ត៌មានផង៖ «យើងមើលទៅឃើញថាវាជាការអូសបន្លាយ ដែលធ្វើឈ្មួញដែលជាអ្នកមានអំណាច ចេះតែមកយកដីពីប្រជាពលរដ្ឋលក់ ដោយមិនមានការដោះស្រាយ»។
ចំណែកអ្នកសម្របសម្រួលអង្គការសិទ្ធិមនុស្សលីកាដូ (LICADHO) ខេត្តសៀមរាប លោក នូ ពុទ្ធិ មានប្រសាសន៍ថា លោកឃើញក្រុមការងាររបស់សាលាខេត្តសៀមរាប តែងចេញមកទទួលយកញត្តិរបស់ប្រជាពលរដ្ឋដែលទាមទាររឿងដីនោះ ហើយអភិបាលខេត្តក៏តែងតែសន្យានឹងដោះស្រាយ ក៏ប៉ុន្តែចំពោះវិធានការដោះស្រាយពិតប្រាកដនោះ គឺមិនទាន់ឃើញមានយ៉ាងណា ចំណែកពេលវេលាទៀតសោត ក៏មិនច្បាស់លាស់៖ «ប៉ុន្តែចំពោះរឿងពេលវេលារឿងអីហ្នឹង មិនទាន់បានដាក់ជាក់លាក់នៅឡើយទេ។ ហើយខ្ញុំក៏បានស្នើសុំឱ្យក្រុមការងារចេញសេចក្តីណែនាំមួយ ដើម្បីទប់ស្កាត់ដំណើរការទិញលក់ដីមិនទាន់ដោះស្រាយទំនាស់ចប់សព្វគ្រប់នៅឡើយនោះ។ អាដីទំនាស់ដែលលក់អ៊ីចឹងវាមិនត្រូវ វានាំឱ្យស្មុគស្មាញទៅដល់អ្នកដែលគាំទ្រទៅលើសកម្មភាពលក់ទិញនោះផងដែរ»។
អ្នកភូមិស្នាសង្គ្រាម ព្រមានថា គេទុករយៈពេលជាងមួយខែទៀត ដើម្បីឱ្យអាជ្ញាធរខេត្តសៀមរាប ដោះស្រាយរឿងនេះឱ្យសមស្រប បើពុំនោះទេ បន្ទាប់ពីអ្នកភូមិច្រូតកាត់ផលស្រូវរួចរាល់ គឺពួកគេនឹងប្រមូលគ្នាឡើងទៅតវ៉ាដល់ខុទ្ទកាល័យលោកនាយករដ្ឋមន្ត្រីនៅឯទីក្រុងភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។