តំណាង និងប្រជាពលរដ្ឋរស់នៅចំណុច១០៤ ឬចំណុចឃ្នាងនៃភូមិដំណាក់អំពិល ឃុំក្រាំងស្គារ បានប្រាប់វិទ្យុអាស៊ីសេរី ឲ្យដឹងនៅថ្ងៃទី១៩ ខែធ្នូ ថា ពួកគាត់នឹងនាំគ្នាផ្ដិតមេដៃដាក់ជូនអង្គការលីកាដូ (Licadho) និងសមាគមអាដហុក (Adhoc) ប្រចាំខេត្តកំពង់ឆ្នាំង ក្នុងពេលឆាប់ៗខាងមុខ ដើម្បីឲ្យជួយដោះស្រាយវិបត្តិដីធ្លីដែលបានអូសបន្លាយអស់រយៈពេលជិត ១៣ឆ្នាំមកហើយនោះ។
តំណាងសហគមន៍ឃុំក្រាំងស្គារ លោក ម៉ែន ស៊ឺន មានប្រសាសន៍ថា ក្រុមប្រជាពលរដ្ឋហាក់អស់ជំនឿលើអាជ្ញាធរក្នុងការដោះស្រាយបញ្ហាដីធ្លី ពីព្រោះបណ្ដឹងរបស់ពួកគាត់ជាច្រើនករណីមិនត្រូវបានគេយកចិត្តទុកដាក់ ឬដោះស្រាយឲ្យបានលទ្ធផលអ្វីឡើយ ទើបពេលនេះពួកគាត់ងាកមករកសង្គមស៊ីវិល ដើម្បីឲ្យជួយវិញម្ដង៖ «ខ្ញុំក៏បានសួរពីគោលបំណងរបស់គាត់ បើមានផលប៉ះពាល់អ៊ីចឹង តើពួកគាត់នឹងធ្វើយ៉ាងម៉េចទៀតទៅថ្ងៃខាងមុខ? គាត់ក៏ព្រមព្រៀងថានឹងផ្ដិតមេដៃប្ដឹងទៅស្ថាប័ននានាដែលពាក់ព័ន្ធ»។
ចំណែកប្រជាពលរដ្ឋម្នាក់ទៀតរស់នៅចំណុចឃ្នាង បានថ្លែងទាំងភាពភ័យខ្លាចថា ប្រជាពលរដ្ឋចំនួន ៤៨គ្រួសារ បានត្រៀមខ្លួនរួចជាស្រេចក្នុងការផ្ដិតមេដៃ ហើយនៅមានគ្រួសាររស់នៅក្នុងភូមិដំណាក់អំពិល ជាច្រើនគ្រួសារផ្សេងទៀត ក៏នឹងចូលមកផ្ដិតដែរ។ លោកបន្តថា ជម្លោះដីធ្លីរវាងប្រជាពលរដ្ឋជាមួយនឹងក្រុមហ៊ុន ភាពីមិច និងទីបញ្ជាការកងកាំភ្លើងធំនៃកងយោធពលខេមរភូមិន្ទ បានផ្ទុះឡើងខ្លាំងនៅអំឡុងឆ្នាំ២០០៦ ហើយក្រុមអ្នកភូមិត្រូវបានគេហាមឃាត់មិនឲ្យចូលទៅធ្វើស្រែចម្ការ និងទទួលរងនូវការគំរាមកំហែងជាបន្តបន្ទាប់តាំងពីពេលនោះមក។
វិទ្យុអាស៊ីសេរី មិនអាចទាក់ទងអគ្គមេបញ្ជាការកងកាំភ្លើងធំ និងតំណាងក្រុមហ៊ុន ភាពីមិច ដើម្បីសុំការអត្ថាធិប្បាយជុំវិញបញ្ហានេះបានទេ នៅថ្ងៃទី១៩ ខែធ្នូ។
ទោះជាយ៉ាងណា អភិបាលរងខេត្តកំពង់ឆ្នាំង ទទួលបន្ទុកដោះស្រាយទំនាស់ដីធ្លី លោក ចេង ញ៉ាន់ មានប្រសាសន៍ថា បច្ចុប្បន្នក្រុមហ៊ុន ភាពីមិច ពុំមានសកម្មភាពអ្វីដែលធ្វើឲ្យប៉ះពាល់ដល់ដីរបស់ប្រជាពលរដ្ឋក្នុងខេត្តកំពង់ឆ្នាំង ឡើយ។ ចំណែកផ្ទៃដីដែលខាងទីបញ្ជាការកងកាំភ្លើងធំបានបោះបង្គោលប៉ះចំដីពលរដ្ឋនោះ គឺគេដោះដូរឲ្យចេញមកផ្នែកខាងក្រៅ និងបានវាស់វែងជូនពួកគាត់បានមួយចំនួនធំហើយ៖ «ដូរគាត់ចេញមកខាងក្រៅ ហើយពេលយុវជនចូលទៅហ្នឹងក៏បានពិភាក្សាគ្នាវាស់ដីឲ្យកម្លាំងកាំភ្លើងធំ អគ្គបញ្ជាការហ្នឹង ហើយសល់ប៉ុន្មានដែលពាក់ព័ន្ធនឹងប្រជាពលរដ្ឋ ឲ្យគាត់ចេញមកខាងក្រៅ យើងវាស់វែងបែងចែកនៅខាងក្រៅដែលស្ថិតនៅក្នុងដីរបស់ក្រុមហ៊ុន ភាពីមិច ហ្នឹង»។
លោកបញ្ជាក់ថា កាលពីដើមខែធ្នូ ឆ្នាំ២០១៣ ក្រុមនិស្សិតវាស់វែងដីធ្លីជំហានទី៣របស់លោកនាយករដ្ឋមន្ត្រី ហ៊ុន សែន បានធ្វើសកម្មភាពវាស់វែងដីធ្លីជូនប្រជាពលរដ្ឋទៅលើស្រុកចំនួន៣ គឺស្រុកទឹកផុស ស្រុករលាប្អៀរ និងស្រុកសាមគ្គីមានជ័យ។ ដោយឡែកនៅស្រុកទឹកផុស ក្រុមនិស្សិតកំពុងតែធ្វើសកម្មភាពវាស់វែងបង្ហើយដីដែលមានបញ្ហានៅក្នុងឃុំចោងម៉ោង បន្ទាប់ពីនោះ នឹងចុះទៅដល់ឃុំក្រាំងស្គារ តែម្ដង។
មន្ត្រីសម្របសម្រួលសមាគមអាដហុក (Adhoc) ប្រចាំខេត្តកំពង់ឆ្នាំង លោក សំ ច័ន្ចគា មានប្រសាសន៍ថា ប្រសិនបើមានពាក្យបណ្ដឹងរបស់ប្រជាពលរដ្ឋចូលមកកាន់សមាគម លោកនឹងចុះស៊ើបអង្កេតករណីនេះផ្ទាល់ ហើយជំរុញឲ្យអាជ្ញាធរពន្លឿននីតិវិធីនៃការដោះស្រាយជូនពួកគាត់៖ «ជារឿងល្អណាស់នៅពេលដែលអាជ្ញាធរហាក់ដូចជាមិនអើពើក្នុងការដោះស្រាយបញ្ហាឲ្យគាត់ៗអាចស្នើសុំមកខាងអង្គការក្រៅរដ្ឋាភិបាល ដើម្បីជំរុញអាជ្ញាធរឲ្យជួយចាត់ការ»។
ក្រុមប្រជាពលរដ្ឋបញ្ជាក់ថា នៅខែកុម្ភៈ ឆ្នាំ២០១៣ ក្រុមកម្មកររបស់ក្រុមហ៊ុន ភាពីមិច បានដើរបាញ់ថ្នាំក្រហមសម្គាល់ព្រំប្រទល់ដីចាប់ពីខាងលិចសាលាស្រុកទឹកផុស រហូតមកដល់សាលាឃុំឈើតុំ ក្នុងខេត្តពោធិ៍សាត់។ ចំណែកខាងទីបញ្ជាការកងកាំភ្លើងធំនៃកងយោធពលខេមរភូមិន្ទវិញ បានដាំបង្គោលថ្មជាច្រើនដើម ចាប់ពីចំណុចភូមិស្លាត រហូតដល់ចំណុចឃ្នាង នៃភូមិដំណាក់អំពិល។ ការបាញ់ថ្នាំ និងបោះបង្គោលនេះ បានចូលទៅក្នុងដីរបស់ប្រជាពលរដ្ឋជាច្រើនកន្លែង ក៏ប៉ុន្តែពួកគាត់នៅមិនទាន់ដឹងច្បាស់ថា ផ្ទៃដីប៉ះពាល់សរុបពិតប្រាកដមានចំនួនប៉ុន្មាននៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។