ពលរដ្ឋជាង ២០គ្រួសារ នៅឃុំជីខក្រោម ស្រុកស្រែអំបិល លើកគ្នាទៅតវ៉ានៅតុលាការខេត្តកោះកុង សុំកុំឲ្យអនុវត្តសាលក្រមលេខ ២០៧ឃ ចុះថ្ងៃទី១៦ ខែមិថុនា ឆ្នាំ២០០៩ របស់ក្រុមហ៊ុន ហេង ហ៊ុយ ដែលបានប៉ះពាល់ដីប្រជាពលរដ្ឋនៅភូមិព្រែកជីក។
ការតវ៉ានៅថ្ងៃទី២៩ ខែឧសភា ធ្វើឡើងនៅគ្រាដែលប្រជាពលរដ្ឋ ៥នាក់ នៅភូមិព្រែកជីក ត្រូវតុលាការខេត្តកោះកុង ហៅទៅផ្សះផ្សាក្នុងកិច្ចសន្យាបែងចែកដីពួកគាត់ នៅឃុំជីខក្រោម ផ្តល់ទៅឲ្យឃុំជីខលើ ដែលក្រុមហ៊ុន ហេង ហ៊ុយ ឈ្នះក្តីក្នុងសាលក្រមលេខ ២០៧ឃ នោះ។
ប្រជាពលរដ្ឋភូមិព្រែកជីក លោកស្រី ឈុន រ៉ាន់ អាយុ ៥២ឆ្នាំ ថ្លែងថា ក្រុមហ៊ុន ហេង ហ៊ុយ ឈ្នះក្តីនៅភូមិឈូក ឃុំជីខលើ តែមកវាតយកដីអ្នកភូមិព្រែកជីក ឃុំជីខក្រោម ទៅវិញ។ លោកស្រីបន្តថា នៅខែតុលា ឆ្នាំ២០១០ ក្រុមហ៊ុន ហេង ហ៊ុយ មកឈូសយកដីគាត់ដែលមានដាំកៅស៊ូ និងដំណាំហូបផ្លែទំហំ ៥ហិកតារ ហើយក្រុមហ៊ុនបានទុកដីឲ្យគាត់តែ ១ហិកតារ សម្រាប់សង់ផ្ទះ និងដាំដំណាំ។ គាត់តវ៉ាច្រើនដង ស្រាប់តែក្រុមហ៊ុន ហេង ហ៊ុយ នោះមកធ្វើកិច្ចសន្យាសុំបែងចែកដីគាត់ ៥ហិកតារ តែគាត់មិនព្រម ក្រុមហ៊ុនបានប្ដឹងគាត់ទៅតុលាការ៖ «យកសំបុត្រមក កោះហៅឡើងតុលាការ ហើយគេថា បើយើងមិនសម្រួល គេនឹងហៅ។ ពេលនោះខ្ញុំឈឺទៀត ណាមួយប្ដីខ្ញុំពិការទៀត ហើយខ្ញុំរកលុយរកអីមកអត់បាន ខ្ញុំវាមានបញ្ហាអីចឹង ហើយក៏ខ្ញុំសុំគេសម្រួលសិនទៅ»។
លោកស្រី ផាវ ញ៉ឹង នៅភូមិព្រែកជីក ដែរ ថ្លែងថា ក្រុមហ៊ុន ហេង ហ៊ុយ ឈ្នះក្តីនៅឃុំជីខលើ ដែលនៅក្បែរឃុំជីខក្រោម។ ក្រុមហ៊ុនមិនយកដីឃុំជីខលើ ទេ តែមកវាតយកដីដល់ឃុំជីខក្រោម ប៉ះពាល់ដីប្រជាពលរដ្ឋភូមិព្រែកជីក ជាង ២០គ្រួសារ មានទំហំជាង ៥៨ហិកតារ។ នៅថ្ងៃទី២៩ ខែឧសភា តុលាការខេត្តកោះកុង ហៅប្រជាពលរដ្ឋដែលក្រុមហ៊ុន ហេង ហ៊ុយ វាតយកដីនោះមកផ្សះផ្សា ដើម្បីបែងចែកដី តែអ្នកភូមិមិនសុខចិត្ត និងសុំឲ្យតុលាការពន្យារការផ្សះផ្សា ១០ថ្ងៃសិន៖ «តែពួកខ្ញុំ បើមិនតវ៉ា ពួកខ្ញុំប្រឈមនឹងការអត់មានដីរស់នៅ ហើយអីចឹងពួកខ្ញុំមិនអស់សង្ឃឹមទេ។ ក្នុងការតវ៉ា ពួកខ្ញុំនៅតែតស៊ូតវ៉ាតស៊ូទាមទាររកដំណោះស្រាយ ស្នើសុំគ្រប់ស្ថាប័នដែលពាក់ព័ន្ធ ហើយថ្ងៃមុនក៏ពួកយើងបានដាក់ពាក្យទៅខុទ្ទកាល័យសម្ដេចដែរ ស្នើសុំឲ្យលោកជួយបញ្ជូនក្រុមនិស្សិតចុះវាស់វែងដីតាមប្រសាសន៍សម្តេចនាយករដ្ឋមន្ត្រី ហ៊ុន សែន»។
វិទ្យុអាស៊ីសេរី មិនអាចទាក់ទងលោក ហេង ហ៊ុយ ប្រធានក្រុមហ៊ុន ហេង ហ៊ុយ ដើម្បីឆ្លើយតបទៅនឹងការចោទពីប្រជាពលរដ្ឋភូមិព្រែកជីក បាននៅឡើយនៅថ្ងៃទី២៩ ខែឧសភា។
មេឃុំជីខក្រោម លោក ឆន ម៉ុន ថ្លែងថា ជម្លោះដីរវាងពលរដ្ឋក្នុងឃុំនេះជាមួយក្រុមហ៊ុន ហេង ហ៊ុយ បានកើតឡើងតាំងពីឆ្នាំ២០០៩ មុនគាត់ចូលកាន់តំណែង។ ប៉ុន្តែ នៅឆ្នាំ២០១០ ក្រសួងមហាផ្ទៃ បានបែងចែកព្រំប្រទល់ដីឃុំជីខលើ និងឃុំជីខក្រោម ហើយដីជម្លោះនោះពាក់ព័ន្ធភូមិព្រែកជីក នៅក្នុងឃុំជីខក្រោម។ អាជ្ញាធរឃុំមិនទាន់ដឹងថា តើក្រសួងមហាផ្ទៃ កំណត់ព្រំប្រទល់ដីរបស់ឃុំជីខក្រោម ពីត្រឹមណាដល់ទៅត្រឹមណានៅឡើយ។
មន្ត្រីសម្របសម្រួល សមាគមការពារសិទ្ធិមនុស្សអាដហុក (Adhoc) ខេត្តកោះកុង លោក នាង បូរាទីណូ ថ្លែងថា ក្រសួងមហាផ្ទៃ បានបែងចែកកំណត់ព្រំដីរួចហើយ ដូច្នេះ បើមន្ត្រីអនុវត្តសាលក្រម ២០៧ឃ ខុសដែនកំណត់ដីឃុំ សមាគមនេះនឹងជួយការពារសិទ្ធិប្រជាពលរដ្ឋ៖ «ហើយអង្គការសង្គមស៊ីវិល នៅតែទទូចស្នើសុំ គឺធ្វើយ៉ាងណាមានការដោះស្រាយដោយសន្តិវិធី ដោយមានការព្រមព្រៀងពីគូភាគីទាំងសងខាងដោយសន្តិវិធី»។
អ្នកភូមិ បានឲ្យដឹងថា គាត់ព្រួយបារម្ភអំពីការកោះហៅរបស់តុលាការខេត្តកោះកុង ដែលអ្នកភូមិសុំពន្យារការផ្សះផ្សា ១០ថ្ងៃនោះ ប្រសិនបើមានការអនុវត្តសាលក្រមឆ្នាំ២០០៩ លេខ ២០៧ឃ រឹបយកដីគាត់នោះ អ្នកភូមិជាង ២០គ្រួសារ នឹងគ្មានកន្លែងរស់នៅ ហើយនិងដីដាំដុះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។