ប៉ុន្តែ ប្រជាពលរដ្ឋមិនជឿថា ការអញ្ជើញនោះជាការអប់រំទេ បែរជាគិតថា អាចជាការចាប់ឃុំ ឬជម្រិតទារលុយជាដើម ទើបអ្នកស្រុកលើកគ្នាមកតវ៉ារួមនៅមុខការិយាល័យខណ្ឌរដ្ឋបាលជលផលខេត្តតាកែវ។
ប្រជាពលរដ្ឋឃុំកំពង់ក្រសាំង ស្រុកបូរីជលសារ ខេត្តតាកែវ ជិត ១០០នាក់ លើកគ្នាទៅតវ៉ានៅមុខការិយាល័យខណ្ឌរដ្ឋបាលជលផលខេត្ត នៅព្រឹកថ្ងៃទី១៣ ខែធ្នូ សុំដោះស្រាយជម្លោះដីព្រៃលិចទឹក។
ប្រជាពលរដ្ឋមកពីភូមិក្តុលជ្រុំ ឃុំកំពង់ក្រសាំង លោក សៅ មឿន ថ្លែងថា មន្ត្រីជលផលខេត្តតាកែវ បានអញ្ជើញពួកគាត់ ៣នាក់ មានរូបគាត់ លោក វី ចាន់ និងលោក សុន រុំ ដើម្បីមកបំភ្លឺរឿងដាំដុះលើដីក្នុងឡូត៍លេខ១។ លោកថា ដីអ្នកភូមិដាំស្រូវក្នុង១គ្រួសារ គឺក្បាល ៣០ម៉ែត្រ បណ្តោយតាមទឹកស្រក។ ក្នុង១ឆ្នាំដាំស្រូវបានតែម្តងគត់ ព្រោះនៅទីនោះ ៦ខែលិចទឹក ៦ខែគោក។ នៅពេលទឹកស្រក ពួកគាត់នាំគ្នាដាំស្រូវប្រាំង។ តែមន្ត្រីជលផលកោះហៅពួកគាត់ ៣នាក់ មកកាន់ការិយាល័យគេ ទើបអ្នកស្រុកលើកគ្នាមកជាមួយ ព្រោះខ្លាចហៅមកទារលុយ ឬចាប់ខ្លួន៖ «អ្នកខ្លះភ្ជួរ អ្នកខ្លះកាប់ ជាប់ ១០០ហិកតារហ្នឹង ធ្វើបណ្ដើរអីបណ្ដើរដល់រហូតឥឡូវហ្នឹង កាត់ស្មៅស្រែពន្លិចទឹកអីហើយហ្នឹង បម្រុងទៅធ្វើ តែមន្ត្រីជលផលហាមឃាត់មិនឲ្យធ្វើទៀត»។
អ្នកភូមិសង្គមមានជ័យ ឃុំកំពង់ក្រសាំង លោក វី ចាន់ ឲ្យដឹងថា គាត់រស់នៅ និងដាំស្រូវប្រាំងនៅក្នុងដីជាប់ឡូត៍លេខ១ តាំងពីឆ្នាំ១៩៩៧ មក។ នៅឆ្នាំ២០០៦ ពួកគាត់ត្រូវមន្ត្រីជលផលហាមដាំដុះ និងតាមចាប់ដាក់ឃុំ។ នៅឆ្នាំ២០០៧ តំបន់គាត់ដាំស្រូវនោះបែរជាមានលើកស្លាកអភិរក្សសត្វក្រៀល។ នៅឆ្នាំ២០១២ ក្រោយពីនាយករដ្ឋមន្ត្រី ហ៊ុន សែន កាត់ឡូត៍លេខ១ មកឲ្យប្រជាពលរដ្ឋរកនេសាទបានប្រជាពលរដ្ឋខ្មែរ និងខ្មែរកម្ពុជាក្រោមដែលមិនមានដីដាំដុះ ក៏នាំគ្នាទៅសង់ផ្ទះ ៩៤ខ្នង លើដីធ្លាប់ដាំដុះនោះ។ ប៉ុន្តែ មន្ត្រីជលផលបានទៅដុតបំផ្លាញផ្ទះនោះចោលទាំងស្រុង។ នៅឆ្នាំ២០១៣ ក្រោយពីទឹកស្រក ពួកគាត់នាំគ្នាចុះដាំស្រូវប្រាំង ក៏ត្រូវបានមន្ត្រីជលផលកោះហៅមកការិយាល័យតែម្តង៖ «ឆ្នាំនេះក៏ខ្ញុំត្រូវតែទៅ ព្រោះស្រូវ ព្រោះអីកនខ្ញុំមិនដេកនៅចាំពេលវេលាទៀតទេ»។
នាយរងខណ្ឌរដ្ឋបាលជលផល លោក សៅ កុសល ពន្យល់ថា ប្រជាពលរដ្ឋ ៣នាក់ ដែលខណ្ឌរដ្ឋបាលជលផលអញ្ជើញឲ្យមកការិយាល័យនេះដើម្បីអប់រំ កុំឲ្យគាត់កាប់រានដីអភិរក្សសត្វក្រៀល និងព្រៃលិចទឹកតទៅទៀត។ លោកថា ប្រជាពលរដ្ឋឃុំកំពង់ក្រសាំង បារម្ភខ្លាចមានការចាប់ខ្លួនដោយមិនដឹងថា ការអញ្ជើញឲ្យមកនោះបែរជាទទួលការអប់រំកុំឲ្យកាប់ព្រៃលិចទឹក ចូលក្នុងដែនអភិរក្សសត្វទេ។ លោកថា ក្រោយពីអ្នកភូមិបានឡើងមកដល់ការិយាល័យនេះ ប្រជាពលរដ្ឋបានឆ្លៀតដាក់លិខិតស្នើសុំបែងចែកព្រំដីច្បាស់លាស់រវាងដីប្រជាពលរដ្ឋ និងដីអភិរក្សសត្វក្រៀល។
លោក សៅ កុសល៖ «មានតំបន់ដែលយើងត្រូវការពារនោះ គឺគេចែកជា ៣តំបន់។ ព្រំប្រទល់តំបន់ការពារមាន ៨.៣០៥ហិកតារ ព្រំប្រទល់តំបន់ស្នូលមាន ៩១៩ហិកតារ។ កន្លែងនោះ គឺជាកន្លែងអភិរក្សសត្វក្រៀល អ៊ីចឹងមានប្រជាពលរដ្ឋគាត់ចូលទៅកាប់ព្រៃលិចទឹកហ្នឹង ដូច្នេះខាងខ្ញុំហ្នឹងក៏បានអញ្ជើញពួកគាត់មកចំនួន ៣នាក់ ដើម្បីឲ្យគាត់ធ្វើកិច្ចសន្យាឈប់រានព្រៃលិចទឹកហ្នឹងតទៅទៀត ក៏ប៉ុន្តែ មិនដឹងជាយ៉ាងម៉េចដែរ គាត់លើកគ្នាមកច្រើនអ៊ីចឹង គាត់មកសុំតវ៉ា គាត់ថាខ្លាចពួកខ្ញុំហ្នឹង បើសិនជាអញ្ជើញគាត់មកហ្នឹង ខ្លាចមានការចាប់ខ្លួនចាប់អី ក៏ប៉ុន្តែធាតុពិត ខ្ញុំអត់មានការចាប់ខ្លួនអីទេ គឺថាខ្ញុំចង់ណែនាំគាត់ឲ្យស្គាល់ពីអ្វីទៅដែលហៅថាតំបន់ការពារតំបន់អភិរក្ស»។
ក្រុមប្រឹក្សាខេត្តតាកែវ លោក ម៉ៅ សុផល ឲ្យដឹងថា ពលរដ្ឋភាគច្រើនដែលកើតក្រោយឆ្នាំ១៩៩៣ មិនមានចំណែកដីដាំដុះទេ។ ពួកគេរស់នៅជាមួយឪពុកម្តាយ ហើយមានគ្រួសារខ្លះ ឪពុកម្តាយបានលក់ដីអស់ ក៏លើកគ្នាមកនៅលើដីដែលស្ថិតក្នុងភាពមិនទាន់មានអ្នកគ្រប់គ្រងច្បាស់លាស់ ទើបមានបញ្ហាជម្លោះដីធ្លីកើតឡើង។ ប៉ុន្តែចំពោះប្រជាពលរដ្ឋនៅឃុំកំពង់ក្រសាំង ពួកគាត់បានរស់នៅ និងដាំដុះស្រូវប្រាំងជិត ២០ឆ្នាំកន្លងមកហើយ គួរតែរដ្ឋាភិបាល និងអាជ្ញាធរខេត្តតាកែវ ទុកដីនោះឲ្យគាត់បានដាំដុះចិញ្ចឹមជីវិត ព្រោះការប្រើប្រាស់ដីនោះបានតែ ៤ខែនៃការដាំស្រូវប្រាំង។
មន្ត្រីខណ្ឌរដ្ឋបាលជលផល លោក សៅ កុសល ឲ្យដឹងថា ការអភិរក្សតំបន់សត្វក្រៀលនោះ គឺអភិរក្សស្មៅអភិរក្សកន្លែងត្រីបន្តពូជ និងជីវចម្រុះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។