តំណាងប្រជាពលរដ្ឋ លោក ប៊ុន ខាំហ្វន មានប្រសាសន៍បញ្ជាក់ថា អ្នកភូមិបានយល់តាមការសន្យានេះ ប៉ុន្តែប្រសិនជាការសន្យាដើម្បីអូសបន្លាយពេលវេលាតទៅទៀត ពួកគាត់នឹងដាក់ពាក្យប្ដឹងករណីនេះដាក់ជូនអាជ្ញាធរខេត្ត៖ «គេហៅចូលទៅកន្លែងគេសិន អារឿងមកបិទរបងផ្លូវគោក្របីប្រជាជនរស់នៅណា! ខ្ញុំរាយការណ៍ប្រាប់គេអស់ហើយព្រឹកមិញនេះ»។
កាលពីសប្ដាហ៍មុន មន្ត្រីឃ្លាំមើលសិទ្ធិមនុស្សអាដហុក (Adhoc) ខេត្តរតនគិរី បានចុះអង្កេតសេចក្តីរាយការណ៍ចោទប្រកាន់របស់ប្រជាពលរដ្ឋ សង្កេតឃើញថា ដីដែលម្ចាស់រោងចក្រហ៊ុមព័ទ្ធរបងនោះ មួយផ្នែកជាដីសម្រាប់សង់លំនៅឋាន ដីស្រែ និងទួលចិញ្ចឹមសត្វរបស់អ្នកភូមិដែលឋិតនៅជាប់បរិវេណរោងចក្រកែច្នៃ។ ដីទាំងអស់នោះ អ្នកភូមិចាត់ទុកថា ជាដីត្រៀមបម្រុងរបស់ពលរដ្ឋ ហើយត្រូវក្រុមហ៊ុនហ៊ុមព័ទ្ធរបងបិទផ្លូវមិនឲ្យប្រជាពលរដ្ឋចេញចូលបាន។
អភិបាលស្រុកកូនមុំ លោក លឿង ចាន់ធៀង ថ្លែងបញ្ជាក់ថា លោកនឹងចាត់មន្ត្រីចុះស៊ើបអង្កេតអ្វីដែលប្រជាពលរដ្ឋបានតវ៉ានេះ។ លោកបន្តថា អាជ្ញាធរស្រុកនឹងធ្វើរបាយការណ៍សុំគោលការណ៍សម្រេចពីអាជ្ញាធរខេត្ត ក្រោយពេលការស៊ើបអង្កេតបានបញ្ចប់៖ «យើងអត់ទាន់មានការដោះស្រាយទេ យើងចុះស៊ើបអង្កេតមិនទាន់បានកំណត់ទេ។ នៅពេលយើងកំណត់ យើងធ្វើរបាយការណ៍ឡើងមកខេត្តហើយ»។
មេឃុំស្រែអង្ក្រង លោក ឈឹម សុឃឹម កន្លងទៅនេះ បានចាត់ទុកថា ម្ចាស់រោងចក្រកែច្នៃឈើមានចេតនារំលោភយកដីប្រជាពលរដ្ឋ។ លោកអះអាងថា កន្លងទៅនេះក្រុមហ៊ុន ហ័ងអាញ់ អណ្ដូងមាស (Hoang Anh Andong Meas) បានកាត់ចេញដី ១០ហិកតារពីដីសម្បទានប្រគល់មកប្រជាពលរដ្ឋទុកជាដីត្រៀមបម្រុងសហគមន៍ ប៉ុន្តែម្ចាស់រោងចក្រកែច្នៃឈើនៅតែបំពាន៖ «អត់ត្រឹមត្រូវទេ បើគាត់យកអស់រកកន្លែងគ្នាដើរគ្មាន ហើយមិនឲ្យយើងចូលទៀតដោយមានព័ទ្ធដែកស័ង្កសីតែម្តង។ ក្រុមហ៊ុន ហ័ងអាញ់ លំផាត់ គាត់អត់បានយក គាត់បានប្រគល់មកខាងពួកខ្ញុំវិញ។ ខ្ញុំមានកំណត់ហេតុត្រឹមត្រូវ ប៉ុន្តែគាត់អត់គោរព គាត់ចេញពីសាលាឃុំទៅ គាត់បញ្ជាឲ្យកម្មករធ្វើតែម្តង។ អ៊ីចឹង ខ្ញុំធ្វើពាក្យដាក់ទៅស្រុក ប៉ុន្តែស្រុកមិនទាន់បានចុះមកដោះស្រាយ»។
មន្ត្រីសម្របសម្រួលសមាគមអាដហុក ខេត្តរតនគិរី លោក ឆាយ ធី បានកត់សម្គាល់ថា ពីរលើករួចមកហើយដែលប្រជាពលរដ្ឋបានមកសុំកិច្ចអន្តរាគមន៍ពីមន្ត្រីសិទ្ធិមនុស្ស។ លោកបន្តថា សមាគមលោកបានត្រៀមរៀបចំពាក្យបណ្ដឹងជូនប្រជាពលរដ្ឋ ដើម្បីដាក់ជូនអាជ្ញាធរខេត្ត ប្រសិនអាជ្ញាធរឃុំស្រុកនៅតែអូសបន្លាយពេលវេលាដោះស្រាយបញ្ហាជូនប្រជាពលរដ្ឋ៖ «គាត់ឡើងមកខាងអាជ្ញាធរខេត្ត ដើម្បីជំរុញឲ្យថ្នាក់ស្រុកថ្នាក់ឃុំពន្លឿនដោះស្រាយឲ្យពួកគាត់ឲ្យបានឆាប់ៗ»។
យ៉ាងនេះក្តី មន្ត្រីស្រុកកូនមុំ មួយរូបសុំមិនបញ្ចេញឈ្មោះ ឲ្យដឹងថា ដីដែលក្រុមហ៊ុនកែច្នៃឈើហ៊ុមរបងព័ទ្ធយក គឺជាដីដែលប្រជាពលរដ្ឋប្រើប្រាស់សម្រាប់ជាទីទួលសុវត្ថិភាព ជម្លៀសសត្វពាហនៈនៅគ្រាមានទឹកជំនន់ទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។