ប្រជាពលរដ្ឋនៅតាមបណ្ដាស្រុកមួយចំនួននៃខេត្តព្រះវិហារ កំពុងព្រួយបារម្ភខ្លាចបាត់បង់ដីស្រែ និងចម្ការនៅពេលខាងមុខមិនយូរប៉ុន្មានទៀតនេះ។
ការព្រួយបារម្ភ គឺនៅស្របពេលដែលមានក្រុមហ៊ុនរុករករ៉ែខ្លះ និងក្រុមហ៊ុនសម្បទានដីសេដ្ឋកិច្ចខ្លះ កំពុងចូលទៅបម្រុងកាន់កាប់លើដីដែលប្រជាពលរដ្ឋធ្លាប់គ្រប់គ្រងជាយូរមកហើយ។
បុរសម្នាក់ជាអ្នកភូមិថ្នល់កោង នៃឃុំរំដោះ ស្រុករវៀង គាត់បានមានប្រសាសន៍ថា គាត់ និងអ្នកភូមិជាច្រើនទៀត កំពុងមានកង្វល់ខ្លាចបាត់បង់ដីចម្ការបន្ទាប់ពីក្រុមហ៊ុនមួយឈ្មោះ ធី.ភី.ប៊ី-ធីវី ឌីវេឡុបមែន (T.P.B-TV Development) បានទទួលអាជ្ញាប័ណ្ណអណ្ដូងរ៉ែលើផ្ទៃដីជិត ១.៣០០ហិកតារ ហើយបានទៅរុករករ៉ែនៅជិតភូមិរបស់គាត់។ ក្រុមហ៊ុននោះបានពង្រីកផ្ទៃដីចូលដល់ភូមិ ដែលនឹងធ្វើឱ្យប៉ះពាល់ដល់ដីចម្ការជាច្រើនហិកតារ៖ «គោលការណ៍របស់គេមកស្រាវជ្រាវរករ៉ែក្រោមដីទេ ប៉ុន្តែដល់ក្រោយមកនេះ ក៏សុំទិញដីចម្ការពីប្រជាពលរដ្ឋតម្លៃ ១.០០០ដុល្លារ ក្នុង១ហិកតារ។ ដល់ប្រជាពលរដ្ឋមិនព្រម ឥឡូវឡើងដល់ ២.០០០ដុល្លារ។ ២ពាន់ដុល្លារ ក៏ប្រជាពលរដ្ឋមិនលក់ដែរ ប៉ុន្តែក្រុមហ៊ុននេះមានអំណាចឱ្យប៉ូលិសប៉ុស្តិ៍ ហើយនិងអាជ្ញាធរភូមិឃុំហ្នឹង ការពារដីហ្នឹងមិនឱ្យប្រជាពលរដ្ឋភ្ជួរដី ឬក៏ជម្រះ ក៏មិនឱ្យធ្វើ ដោយថាដីនោះ គឺជាដីរបស់ក្រុមហ៊ុន។ ប៉ុន្តែ ដីនោះ គឺប្រជាពលរដ្ឋបានកាន់កាប់អាស្រ័យផលជាង ១០ឆ្នាំមកហើយ»។
ចំណែកនៅឯភូមិត្រពាំងខ្ជែង ឃុំស្ដៅ ស្រុកសង្គមថ្មី ក្រុមអ្នកភូមិបានអះអាងថា មានក្រុមហ៊ុនមួយឈ្មោះ ឌីស្ទីង ហាវវេសត៍ (Distinct Harvest) កំពុងចូលទៅបម្រុងដាំកៅស៊ូនៅទីនោះ ដែលអាចនឹងប៉ះពាល់ដីកម្មសិទ្ធិរបស់ប្រជាពលរដ្ឋប្រមាណ ៥០ហិកតារ។
មន្ត្រីផ្នែកតស៊ូមតិរបស់អង្គការពន្លកខ្មែរ ក្នុងខេត្តព្រះវិហារ លោក ប៉ិក សោភ័ណ បានកត់សម្គាល់ឃើញថា បន្ទាប់ពីក្រោយការបោះឆ្នោតជ្រើសរើសតំណាងរាស្ត្រអាណត្តិទី៥ បានកន្លងផុតទៅរយៈពេល ៥ខែមកនេះ គឺជម្លោះដីធ្លីចាស់ៗដែលស្ងប់ស្ងាត់ទៅហើយនោះ ក៏បានងើបឡើងវិញ រួមជាមួយនឹងទំនាស់ដីធ្លីថ្មីៗជាមួយក្រុមហ៊ុនកំពុងកើតឡើងជាច្រើនករណីទៀត៖ «ដូចនៅខាងស្រយង់ ស្រុកគូលែន ឥឡូវក្រុមហ៊ុនសិលាដាមិច កំពុងតែបោះបង្គោលចូលក្នុងដីប្រជាពលរដ្ឋដែលបានវាស់វែង កំណត់ដោយក្រុមនិស្សិតកាលពីឆ្នាំ២០១២ ទៅនេះ ហើយនិងក្រុមហ៊ុន អេហ្វ.ភី ម៉ាឡេស៊ី ហើយនិងក្រុមហ៊ុន ហ៊ូ ហេវិន។ ខ្ញុំមើលជាដុំៗ បញ្ហាធំ គឺនៅខាងស្រុកឆែប មានប៉ះពាល់ជាមួយក្រុមហ៊ុន រួយហ្វេង ហើយនៅខាងស្រុកត្បែងមានជ័យ ប៉ះពាល់ជាមួយក្រុមហ៊ុនឡានហ្វេង នៅខាងឃុំប្រមេ។ ចំណែកនៅខាងស្រុកជ័យសែន គឺនៅតែប៉ះពាល់ជាមួយក្រុមហ៊ុន ហេង ណុង ហេង យូ ដដែល»។
លោក ប៉ិក សោភ័ណ បានឱ្យដឹងថា រាល់ទំនាស់ដីធ្លីជាច្រើនកន្លែង និងច្រើនស្រុកនេះ គឺនៅមិនទាន់មានការដោះស្រាយឱ្យសមរម្យនៅឡើយ។
វិទ្យុអាស៊ីសេរី មិនអាចទាក់ទងអភិបាលខេត្តព្រះវិហារ លោក អ៊ុំ ម៉ារ៉ា ដើម្បីសុំការពន្យល់ជុំវិញរឿងនោះបានថាយ៉ាងណានៅឡើយ ដោយសារតែលោកមិនទទួលទូរស័ព្ទ។
អ្នកសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តព្រះវិហារ លោក ឡោ ច័ន្ទ បានមានប្រសាសន៍ថា លោកព្រួយបារម្ភចំពោះបញ្ហាទំនាស់ដីធ្លីដែលចេះតែកើតមានច្រើនឡើងៗនៅខេត្តព្រះវិហារ ហើយមិនទាន់មានការដោះស្រាយសមរម្យទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។