ស្ត្រី​ម្នាក់​​ត្រូវ​ឈ្មួញ​ដី​និង​បក្សពួក​៤​នាក់​ព្រួត​វាយ​នៅ​ខេត្ត​កំពត​

ដោយ វ៉ាន វណ្ណដេត
2017-09-14
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ស្ត្រី​ឈ្មោះ ឆែម ក្មាន់ រស់​នៅ​ភូមិ​ព្រៃពាយ ឃុំ​ត្រពាំងភ្លាំង ដែល​ចោទ​ថា​​ឈ្មួញ​ដី​ឈ្មោះ ហ៊ាង គន្ធី និង​បក្សពួក​ព្រួត​វាយ​ឲ្យ​របួស សម្រាក​ព្យាបាល​នៅ​មន្ទីរពេទ្យ​បង្អែក​ខេត្ត​កំពត នៅ​ថ្ងៃ​ទី​១៤ កញ្ញា ឆ្នាំ​២០១៧។
ស្ត្រី​ឈ្មោះ ឆែម ក្មាន់ រស់​នៅ​ភូមិ​ព្រៃពាយ ឃុំ​ត្រពាំងភ្លាំង ដែល​ចោទ​ថា​​ឈ្មួញ​ដី​ឈ្មោះ ហ៊ាង គន្ធី និង​បក្សពួក​ព្រួត​វាយ​ឲ្យ​របួស សម្រាក​ព្យាបាល​នៅ​មន្ទីរពេទ្យ​បង្អែក​ខេត្ត​កំពត នៅ​ថ្ងៃ​ទី​១៤ កញ្ញា ឆ្នាំ​២០១៧។
Photo: ADHOC

លោកស្រី ឆែម ក្មាន់ រស់​នៅ​ភូមិ​ព្រៃពាយ ឃុំ​ត្រពាំងភ្លាំង ដែល​ត្រូវ​ឈ្មួញ​ដី​ឈ្មោះ ហ៊ាង គន្ធី និង​បក្សពួក ៤​នាក់​ទៀត បាន​ព្រួត​វាយ​នៅ​ថ្ងៃ​ទី​១៤ ខែ​កញ្ញា កំពុង​សម្រាក​ព្យាបាល​នៅ​មន្ទីរពេទ្យ​បង្អែក​ខែត្រ​កំពត។

ស្ត្រី​រូប​នោះ​អះអាង​ថា មូលហេតុ​ដែល​នាំ​ឲ្យ​បក្សពួក​របស់​ឈ្មួញ​ដី ឈ្មោះ ហ៊ាង គន្ធី វាយ​លោកស្រី​គឺ​ដោយសារ​ការ​គុំកួន​ដែល​អ្នកស្រី និង​អ្នកភូមិ​ព្រៃពាយ ឃុំ​ត្រពាំងភ្លាំង ស្រុក​ឈូក ខេត្ត​កំពត នាំ​គ្នា​តវ៉ា និង​ប្ដឹង​ឈ្មួញ​ដី​នោះ​ថា បាន​ដណ្ដើមយក​ដី​អ្នក​ភូមិ។ លោកស្រី ឆែម ក្មាន់ អះអាង​ថា បច្ចុប្បន្ន​លោកស្រី​រង​របួស​ក្បាល​ធ្ងន់ធ្ងរ និង​ត្រូវ​បាន​ក្រុម​គ្រួសារ​បញ្ជូន​ទៅ​កាន់​មន្ទីរពេទ្យ​បង្អែក​ខែត្រ​ជា​បន្ទាន់។

លោកស្រី ឆែម ក្មាន់៖ «វា​ឲ្យ​កូន​ចៅ​ខ្ញុំ​ហៅ​ឲ្យ​មក​ជួប​វា ហើយ​ខ្ញុំ​ថា ទៅ​ធ្វើ​អី ខ្ញុំ​ទៅ​រក​កូន​ហ្នឹង នៅ​តែ​រុញ​ខ្នង​ខ្ញុំ ខ្ញុំ​ថា​ទៅ​រក​កូន នៅ​តែ​រុញ​ខ្នង​ខ្ញុំ មក​ជួប​អ៊ំ មក​ជួប​ជំទាវ​វា​ហ្នឹង ដល់​ពេល​ខ្ញុំ​មក​ដល់ មក​តាម​​ទៅ មក​ដល់​ជំទាវ​ហ្នឹង​ថា អ្ងែង​ទៅ​ប្ដឹង​អញ ទៅ​ប្ដឹង​អញ​យក​ដី។ ខ្ញុំ​ថា ខ្ញុំ​អត់​ប្ដឹង​ទេ​អ៊ំ ខ្ញុំ​ទៅ​រក​កូន ខ្ញុំ​បាត់​កូន។ ដល់​ហើយ វា​អត់​និយាយ​ច្រើន វា​ទាញ​ក្បាល​ខ្ញុំ​វ៉ៃ​យកៗ បួន​ប្រាំ​នាក់ អង្គរក្ស វា​ស្រីៗ ប្រុស​២ ...ជំទាវ ហ៊ាង គន្ធី ហ្នឹង វ៉ៃ​ខ្ញុំ​ផ្ទាល់​ហ្មង ខ្ញុំ​ឈឺ​ចាប់​មាំ​ណាស់ អយុត្តិធម៌​ម្ល៉ឹងៗ រស់​ម៉េច​ទៅ​ខ្មែរ»

​ឈ្មួញ​ដី​ឈ្មោះ ហ៊ាង គន្ធី ដែល​ភូមិ​ស្គាល់​ងារ​ជា​ជំទាវ តែង​រង​ការ​ចោទ​ពី​អ្នក​ភូមិ​ព្រៃពាយ ថា​បាន​ប្រើ​អំពើ​ហិង្សា​ដាក់​ពួកគាត់ ដោយ​វាយ​​ធ្វើ​បាប និង​ដុត​ផ្ទះ​អ្នក​ភូមិ​គ្មាន​ញញើត​ច្បាប់​ឡើយ ដើម្បី​បង្ខំ​ឲ្យ​ពលរដ្ឋ​ចាកចេញ​ពី​ដី ហើយ​យក​ដី​ពលរដ្ឋ​ទៅ​លក់​ឲ្យ​ក្រុមហ៊ុន​ជប៉ុន ឈ្មោះ អេម៉ារីអូ ហ្សូណាន់ ម៉ារីន ខបភើរ៉េសិន (Emario Shonan Marine Corporation Ltd.) របស់​ជប៉ុន ដើម្បី​វិនិយោគ​ដំណាំ​ម្រេច​កំពត។

បច្ចុប្បន្ន​មាន​ដី​រាប់​ពាន់​ហិកតារ ត្រូវ​អ្នក​ភូមិ​អះអាង​ថា កំពុង​ស្ថិត​ក្នុង​ដៃ​ឈ្មួញ​កាន់កាប់​ដោយ​យក​លេស​ថា ដើម្បី​អភិវឌ្ឍ​ដាំ​ដំណាំ​ម្រេច​កំពត ខណៈ​ដែល​អ្នកភូមិ​ព្រៃពាយ មួយ​ចំនួន​រត់​ចោល​ផ្ទះ​ព្រោះ​តែ​ខ្លាច​ការ​បង្ក្រាប​របស់​ឈ្មួញ​ដី​ដែល​មាន​អំណាច។ អ្នក​ភូមិ​ត្រពាំងភ្លាំង ហាក់​អស់​សង្ឃឹម​ចំពោះ​អាជ្ញាធរ ខណៈ​តុលាការ​ខេត្ត​កំពត បាន​ចេញ​ដីកា​កោះ​អ្នក​ភូមិ​ជា​បន្តបន្ទាប់ ក្រោម​បទ​ថា បាន​ប្រើ​ហិង្សា​ដាក់​ក្រុមហ៊ុន។

​សាច់ញាតិ​ម្នាក់​របស់​លោកស្រី ឆែម ក្មាន់ ថ្លែង​ប្រាប់​អាស៊ីសេរី ដោយ​មិន​ហ៊ាន​បញ្ចេញ​ឈ្មោះ​ថា ពួកគាត់​មិន​ហ៊ាន​ទៅ​ផ្ទះ​វិញ​ទេ ដោយសារ​ខ្លាច​មាន​ការ​គុំកួន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល