យុវជនមួយក្រុមនៃអង្គការកម្មវិធីអភិវឌ្ឍន៍ធនធានយុវជន ហៅកាត់ជាភាសាអង់គ្លេសថា វាយអឌីភី (YRDP) នៅថ្ងៃទី៤ វិច្ឆិកា បានចុះទៅជួបសមាជិកសហគមន៍ជម្លោះដីធ្លីមកពីបណ្ដាខេត្ត ដែលកំពុងស្នាក់នៅវត្តក្ដីចាស់ ឋិតក្នុងសង្កាត់ជ្រោយចង្វារ ខណ្ឌជ្រោយចង្វារ ដើម្បីស្វែងយល់ពីឫសគល់នៃបញ្ហាដែលនាំឲ្យមានវិបត្តិដីធ្លី។
បុគ្គលិកផ្នែកបណ្ដុះបណ្ដាលនៃអង្គការវាយអឌីភី លោក ប្រាក់ សុភ័ណ ថ្លែងថា យុវជនជាង ១០នាក់ មកពីសាកលវិទ្យាល័យនានា បន្ទាប់ពីបានបញ្ចប់វគ្គសិក្សានៅអង្គការវាយអឌីភី បាននាំគ្នាចុះជួបជាមួយប្រជាពលរដ្ឋមកពីខេត្ត ដែលមកស្នាក់នៅក្នុងវត្តដើម្បីស្វែងរកកិច្ចអន្តរាគមន៍ដីធ្លី។ លោកថា ការចុះស្វែងយល់ពីបញ្ហារបស់ពលរដ្ឋនៅពេលនេះ គឺនាំឲ្យយុវជនបានដឹងពីទិដ្ឋភាពមួយជ្រុងទៀត ដែលកំពុងកើតមាននៅក្នុងសង្គម។ លោកបញ្ជាក់ថា ការនាំឲ្យយុវជនឃើញពីបញ្ហាដូច្នេះ គឺជាការដាស់អារម្មណ៍ឲ្យពួកគេគិតពីតួនាទីរបស់ខ្លួន ដើម្បីឆ្លើយតបនូវបញ្ហានានាក្នុងសង្គម។
លោក ប្រាក់ សុភ័ណ៖ «យុវជន ឬក៏ពលរដ្ឋ គឺត្រូវតែជាមនុស្សម្នាក់ដែលមានលក្ខណៈសម្បត្តិពេញលេញ នៅក្នុងការយល់ដឹងអំពីបញ្ហាទាំងនៅសាលា ក៏ដូចជាបញ្ហាសង្គម បន្ទាប់ពីយើងរៀនតែទ្រឹស្ដីនៅក្នុងស្ថាប័ន នៅក្នុងបន្ទប់ ក៏ដូចជានៅតាមសាលារៀន វាមិនគ្រប់គ្រាន់ទេ។ វាទាល់តែឲ្យយុវជនទៅជួបជាមួយនឹងទីតាំង ជាមួយនឹងតំបន់សហគមន៍ដែលមានបញ្ហាប្រឈមអ៊ីចឹង ទើបគាត់ដឹងថាក្រៅពីការអភិវឌ្ឍរីកចម្រើន វាមានបញ្ហាផ្សេងៗទៀតដែលកើតឡើងនៅប្រទេសយើង ដែលថ្នាក់ដឹកនាំរដ្ឋាភិបាល ក៏ដូចជាមហាជនទូទៅ ត្រូវតែផ្ដោតការយកចិត្តទុកដាក់លើបញ្ហាហ្នឹង។ មានអ្នកខ្លះទៅ គាត់ឆ្លើយតបជាវិជ្ជមានថា គាត់មានគម្រោងបង្កើតជាក្រុមខ្លួនគាត់ផ្ទាល់ ជាក្រុមយុវជនស្ម័គ្រចិត្ត ដើម្បីធ្វើការនៅក្នុងសង្គម។ ខ្ញុំពិតជារីករាយនៅពេលឮសំឡេងអ៊ីចឹងៗ»។
ក្រុមយុវជនដែលទើបបានរៀនចប់វគ្គមួយស្ដីពីការអភិវឌ្ឍខ្លួនឯង នៅអង្គការវាយអឌីភី បាននាំគ្នាចុះទៅសាកសួរ និងកត់ត្រាចំណុចបញ្ហារបស់ពលរដ្ឋមានវិបត្តិដីធ្លីដោយផ្ទាល់។ ពលរដ្ឋប្រមាណ ២០០នាក់ មកពីតំបន់បឹងប្រាំ ស្រុកបវេល មកពីស្រុកគាស់ក្រឡ ខេត្តបាត់ដំបង និងមួយចំនួនមកពីខេត្តពោធិ៍សាត់ កំពុងស្នាក់នៅវត្តក្ដីចាស់ ដើម្បីរង់ចាំកិច្ចអន្តរាគមន៍បញ្ចប់ជម្លោះ ដែលពួកគាត់បានស្នើសុំឲ្យស្ថាប័នថ្នាក់ជាតិដោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។