មន្ត្រីអ្នកស៊ើបអង្កេតបញ្ហាទំនាស់ដីធ្លីនៃសមាគម អាដហុក លោក អ៊ូច ឡេង ថ្លែងថា បន្ទាប់មានការចាប់ឃុំ លោក វ៉ន វ៉ុន មក អ្នកភូមិមានចំនួនកាន់តែច្រើនឡើងជាង ២០០នាក់ មានទាំងព្រះសង្ឃ ២អង្គផង ចូលរួមតវ៉ានៅមុខតុលាការខេត្តកណ្ដាល សុំឲ្យដោះលែង។ លោក អ៊ូច ឡេង បញ្ជាក់ថា អ្នកភូមិក៏សុំឲ្យក្រុមហ៊ុន ហេង អភិវឌ្ឍន៍ បញ្ឈប់ការបណ្ដេញព្រះសង្ឃពីវត្តទួលតាម៉ក់ និងសុំឲ្យបញ្ឈប់ការតាមចាប់តំណាងប្រជាពលរដ្ឋ ២នាក់ទៀត រួមមានឈ្មោះ ជា ហ៊ី និង អឿន យ៉ាន ដែលបច្ចុប្បន្នកំពុងរត់គេចខ្លួន។
ប្រធានក្រុមហ៊ុន ហេង អភិវឌ្ឍន៍ លោកស្រី សៀង ចាន់ហេង មានប្រសាសន៍ប្រាប់វិទ្យុអាស៊ីសេរី កាលពីថ្ងៃច័ន្ទថា គាត់មានប័ណ្ណកម្មសិទ្ធិត្រឹមត្រូវកាន់កាប់ដីនោះ និងថា ក្រុមហ៊ុន ហេង អភិវឌ្ឍន៍ មិនបានរំលោភដីអ្នកភូមិនោះទេ ប៉ុន្តែថា អ្នកភូមិទេដែលលួចយកដីក្រុមហ៊ុន។ អ្នកភូមិអះអាងថា ដីជម្លោះនោះមានទំហំ ១០.០៤៤ហិកតារ លាតសន្ធឹងកាត់ ៧ឃុំ និង ២ស្រុក នៅខេត្តកណ្ដាល ពាក់ព័ន្ធប្រជាពលរដ្ឋខ្មែរចំនួន ២.៦៧៦គ្រួសារ។ អ្នកភូមិបានប្ដឹងទៅតុលាការខេត្តកណ្ដាល ហើយតុលាការខេត្តបានកាត់ក្តីឲ្យប្រជាពលរដ្ឋឈ្នះក្តី ២លើករួចមកហើយ កាលពីឆ្នាំ២០០៦ និង ២០០៧៕