ពលរដ្ឋចោទមេបញ្ជាការយោធាថារំលោភយកដីចម្ការពួកគាត់
h080812sr.mp3
អនុប្រធានសហគមន៍ លោក ក្រោះ សុខ មានប្រសាសន៍បញ្ជាក់ថា កាលពីខែឧសភា កន្លងទៅ មេបញ្ជាការយោធាស្រុកពេជ្រាដា គឺលោក យ៉ាំ ផ្យន បានបញ្ជាឲ្យកងទាហានចូលទៅដោតបង្គោលទង់ជាតិ និងសង់រោងប្រក់សំពត់កៅស៊ូលើដីដែលមានផលដំឡូងប្រជាពលរដ្ឋ នៅតំបន់ភ្នំប៉្លេគួង ក្នុងឃុំប៊ូស្រា ក្នុងគោលបំណងយកដីប្រជាពលរដ្ឋនៅតំបន់នោះប្រមាណ១០គ្រួសារ ដែលបានកាប់ឆ្ការរានព្រៃដាំដំណាំ។
លោកបន្តថា ក្រុមយោធានោះមិនមានឯកសារអ្វីបញ្ជាក់ថាពួកគេចូលមកបោះទីតាំងនោះ តើមានការអនុញ្ញាតិពីស្ថាប័នណានោះឡើយ៖ «ទាហានស្រុកពេជ្រាដា យើងហ្នឹង មេបញ្ជាការគាត់ដាក់បន្ទាយលើចម្ការប្រជាពលរដ្ឋ តាមពិតកន្លែងហ្នឹង ចម្ការប្រជាពលរដ្ឋដាំដំឡូង។ ឥឡូវហ្នឹង ទាហានហ្នឹងគេដាក់ផ្ទះជាន់លើដំឡូងអ៊ីចឹង»។
វិទ្យុអាស៊ីសេរី នៅថ្ងៃពុធ ទី៨ ខែសីហា មិនអាចទាក់ទងមេបញ្ជាការស្រុកពេជ្រាដា លោក យ៉ាំ ផ្យន សុំអធិប្បាយជុំវិញសេចក្តីចោទប្រកាន់របស់ប្រជាពលរដ្ឋសហគមន៍នោះបានទេ។
ប្រធានភូមិឡាម៉េះ លោក គុយ សុមាលី មានប្រសាសន៍បញ្ជាក់ថា កាលពីថ្ងៃអង្គារ កន្លងទៅ អាជ្ញាធរឃុំប៊ូស្រា និងអាជ្ញាធរស្រុកពេជ្រាដា បានអញ្ជើញប្រជាពលរដ្ឋម្ចាស់ដីពាក់ព័ន្ធមកពិភាក្សាគ្នាដោះស្រាយបញ្ហានេះ ប៉ុន្តែមន្ត្រីអាជ្ញាធរស្រុកអវត្តមាន។ លោកបន្តថា ដីនោះជាដីចម្ការប្រជាពលរដ្ឋបានដាំដុះដំណាំជាក់ស្ដែង ហើយក្រុមនិស្សិតកំពុងតែធ្វើការវាស់វែងដីនៅតំបន់នោះ ដើម្បីផ្តល់កម្មសិទ្ធិជូនប្រជាពលរដ្ឋ៖ «ថាឲ្យខ្ញុំហ្នឹង ធ្វើកំណត់ហេតុ។ គាត់ឲ្យ ក៏ឲ្យគេផ្ដិតមេដៃ មិនឲ្យ ក៏ឲ្យគេផ្ដិតមេដៃ អ៊ីចឹង ប្រជាជនមិនព្រមផ្ដិតទេ ប៉ុន្តែខ្ញុំធ្វើកំណត់ហេតុមួយដែរ ដាក់ថាដីប្រជាពលរដ្ឋ គឺអត់ឲ្យទេ»។
អភិបាលស្រុកពេជ្រាដា លោក នួន សារ៉ន បានបញ្ជាក់ថា គោលការណ៍របស់អាជ្ញាធរស្រុក គឺមានគម្រោងប្តូរទីតាំងបញ្ជាការដ្ឋានយោធាស្រុក និងទីតាំងអង្គភាពជំនាញមួយចំនួនទៀត ដើម្បីអភិវឌ្ឍទីតាំងបំពេញការងាររបស់កងកម្លាំង និងស្ថាប័នផ្សេងទៀត ក្នុងស្រុកនេះ។ លោកបន្តថា បានណែនាំមិនឲ្យប៉ះពាល់ដីប្រជាពលរដ្ឋនោះទេ ចំពោះការប្ដូរទីតាំងនេះ៖ «ប៉ះដីប្រជាពលរដ្ឋ យើងក៏មិនឲ្យដែរ ថាធ្វើសំណើកុំឲ្យប៉ះដីប្រជាពលរដ្ឋ ព្រោះយើងយកមកនេះ មិនមែនស្នើឯកជនទេ គឺស្នើឲ្យទៅរដ្ឋ។ បាទ! ចាំមើលខ្ញុំចាំស្តាប់របាយការណ៍ផ្នែកសឹករងរាយការណ៍មកខ្ញុំវិញសិន»។
អ្នកសម្របសម្រួលសមាគមអាដហុក (ADHOC) ខេត្តមណ្ឌលគិរី លោក គល់ មីឌី មានប្រសាសន៍បញ្ជាក់ថា ការអង្កេតជំហានដំបូងរបស់សមាគមអាដហុក រកឃើញថា ក្រុមយោធាមិនមានឯកសារជាក់លាក់ក្នុងការចូលទៅបោះទីតាំងលើដីប្រជាពលរដ្ឋ ដើម្បីយកទៅបម្រើការងារសាធារណៈនោះទេ។
លោកអំពាវនាវសុំឲ្យអាជ្ញាធរស្រុក ដោះស្រាយប្រគល់ដីជូនប្រជាពលរដ្ឋវិញ៖ «បើយោងទៅលើច្បាប់អស្សាមិករណ៍ ត្រូវតែមានគណៈកម្មការមួយដើម្បីវាយតម្លៃលើការដកហូត ដែលមានសំណងសមរម្យ និងយុត្តិធម៌ ប្រសិនការដកហូតនោះពិតជាបម្រើផលប្រយោជន៍សាធារណៈមែន។ អ្វីដែលយើងមើលឃើញ វាអត់មានការបង្ហាញពិតជាដកហូតដើម្បីប្រយោជន៍សាធារណៈទេ វាជាការរំលោភច្បាប់ទាំងស្រុងហើយ»។
យ៉ាងនេះក្តី នៅព្រឹកថ្ងៃពុធ ទី៨ ខែសីហា នេះ ប្រជាពលរដ្ឋសហគមន៍៣៦គ្រួសារ បានជួបប្រជុំគ្នា និងបានឯកភាពគ្នាថា មិនយល់ព្រមប្រគល់ដីនោះដល់ក្រុមយោធានោះឡើយ ពីព្រោះដីនោះប្រជាពលរដ្ឋគ្រោងនឹងស្នើសុំចុះបញ្ជីដីធ្លីជាកម្មសិទ្ធិសមូហភាពសហគមន៍ នៅពេលខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
