សាលាដំបូងរាជធានីភ្នំពេញ បើកសវនាការលើសំណុំរឿង លោក វន់ ពៅ និងមនុស្ស ២២នាក់ផ្សេងទៀតនៅថ្ងៃទី៦ ឧសភា និងសម្រេចបន្តបើកសវនាការនៅថ្ងៃទី២០ ខែឧសភា ទៀត។ ការសម្រេចនេះ ធ្វើឡើងបន្ទាប់ពីឆ្មាំពន្ធនាគារ បានស្នើសុំចៅក្រមយកជនជាប់ចោទត្រឡប់ទៅពន្ធនាគារវិញ និងបន្ទាប់តុលាការបានបើកសវនាការសាកសួរលើជនជាប់ចោទមួយចំនួន។
ជនជាប់ចោទទាំង ២៣នាក់ ត្រូវបានបញ្ជូនចូលក្នុងសាលាដំបូងរាជធានីភ្នំពេញ ពីព្រឹកព្រលឹមថ្ងៃទី៦ ខែឧសភា ទាំងសម្លៀកបំពាក់ពិរុទ្ធជន។ នៅព្រឹកនេះ សាលាដំបូងរាជធានីភ្នំពេញ បានបើកសវនាការចំនួន ៣បន្ទប់សវនាការ។ បន្ទប់ទី១ ជម្រះរឿងក្តីរបស់ លោក វន់ ពៅ និងមនុស្ស ៩នាក់នៅរោងចក្រ យ៉ាក ជីន។ បន្ទប់ទី២ ជម្រះរឿងក្តីនៅផ្លូវវ៉េងស្រេង។ ចំណែកបន្ទប់ទី៣ គឺបើកសវនាការជម្រះរឿងក្តីហិង្សានៅស្ទឹងមានជ័យ។
ក្នុងបន្ទប់សវនាការទី១ ដែលជាកន្លែងជម្រះក្តីក្នុងសំណុំរឿង លោក វន់ ពៅ និងមនុស្ស ៩នាក់ផ្សេងទៀត។ សវនាការនេះ សាកសួរជនជាប់ចោទចំនួន ៣នាក់បន្ថែមទៀត ដោយសវនាការលើកទី១បានសួរជនជាប់ចោទ ៤នាក់រួចហើយនោះ។ ជនជាប់ចោទទាំងបីនាក់ បានប្រាប់អង្គសវនាការថា ពួកគេមិនជាប់ពាក់ព័ន្ធនឹងការបំផ្លាញទ្រព្យសម្បត្តិឯកជន និងសាធារណៈនៅរោងចក្រយ៉ាក ជីន នោះឡើយ។ ជនជាប់សង្ស័យ ២នាក់ដំបូង តុលាការចំណាយពេលសាកសួរមួយព្រឹកពេញ ហើយសំណួរភាគច្រើនជាសំណួរដដែលៗ និងត្រូវសង្គមស៊ីវិលវាយតម្លៃថា ជាសំណួរដាក់បន្ទុកលើជនសង្ស័យ។
ក្រៅពីសាកសួរអង្គហេតុផ្ទាល់ខ្លួនរបស់ជនជាប់ចោទម្នាក់ៗ តំណាងអយ្យការ និងចៅក្រម បានព្យាយាមសួរដេញដោលជនជាប់ចោទពីសកម្មភាព និងតួនាទីរបស់ លោក វន់ ពៅ ក្នុងពេលកើតហេតុ កាលពីថ្ងៃទី២ ខែមករា។ ប៉ុន្តែ ជនជាប់ចោទបានឆ្លើយថា ពួកគេមិនបានស្គាល់ លោក វន់ ពៅ ពីដំបូងទេ។
តំណាងអយ្យការ លោកព្រះរាជអាជ្ញារង លី សុផាណា បានបង្ហាញភស្តុតាងថ្មីមួយជារូបថតមួយសន្លឹក បញ្ជាក់ពីវត្តមានរបស់ជនជាប់ម្នាក់ឈ្មោះ សុគន្ធសម្បត្តិ ពិសិដ្ឋ នៅមុខរោងចក្រ យ៉ាក ជីន។ ជនជាប់ចោទ សុគន្ធសម្បត្តិ ពិសិដ្ឋ បានថ្លែងថា រូបគាត់មានតួនាទីជាអ្នកឃ្លាំមើលសិទ្ធិមនុស្សរបស់អង្គការក្រៅរដ្ឋាភិបាលមួយ។ ហើយលោកទទួលស្គាល់ថានេះជារូបថតរបស់លោកពិតមែន តែលោកសង្ស័យរូបថតនេះ ត្រូវបានគេកាត់ត ដើម្បីដាក់បន្ទុករូបលោក។ លោកក៏បញ្ជាក់ក្នុងសវនាការថា លោកមិនទុកចិត្តនឹងរបៀបធ្វើការរបស់សមត្ថកិច្ចនោះដែរ។
ឆ្លើយតបចំពោះតំណាងអយ្យការ លោក លី សុផាណា ប្រាប់ថា រូបថតនេះពិតជាក់ស្តែងមិនមានកែច្នៃឡើយ។ ចំណែកឯចៅក្រម លោក កែ មុន្នី បានបញ្ជាក់ប្រាប់ជនជាប់ចោទថា ព្រះរាជអាជ្ញាមិនមានប្រយោជន៍អ្វីដែលយករូបថតនេះទៅកែច្នៃនោះទេ ព្រោះព្រះរាជអាជ្ញាជាអ្នកកាន់ច្បាប់ស្រាប់។
នៅពេលដែលតំណាងអយ្យការ និងចៅក្រម និយាយព្រមគ្នាពីភាពត្រឹមត្រូវនៃការអនុវត្តការងាររបស់សមត្ថកិច្ចនោះ ជនជាប់ចោទ សុគន្ធសម្បត្តិ ពិសិដ្ឋ បានសួរទៅចៅក្រមពីរបៀបធ្វើការរបស់ស្ថាប័នអយ្យការ ដែលបានបង្វែរបទចោទមកលើរូបខ្លួនពីបទចោទប្រើប្រាស់ហិង្សា ទៅជាញុះញង់ឲ្យប្រើហិង្សា និងសួរពីទោសទណ្ឌរបស់កងទាហានឆត្រយោង៩១១ ដែលបានវាយដំរូបលោកនៅថ្ងៃចាប់ខ្លួនទាល់តែបាក់ដៃឆ្វេង រហូតដល់ស្វិតដៃ និងឈានទៅពិការភាពទៀតផង។ ចំពោះករណីនេះ ចៅក្រមបានតបវិញ ដោយបង្គាប់អោយតំណាងអយ្យការអានខ្លឹមសារច្បាប់ ដែលបានចែងនីតិវិធីបំពេញការងាររបស់ចៅក្រម និងសិទ្ធិរបស់ជនជាប់ចោទ។ ខ្លឹមសារច្បាប់នោះចែងថា ចៅក្រមមិនជម្រះរឿងក្តីណាផ្សេងក្រៅពីបណ្ដឹងឡើយ ហើយជនជាប់ចោទមានសិទ្ធិឆ្លើយ ឬមិនឆ្លើយចំពោះរាល់សំណួរទាំងឡាយដែលចោទមកលើខ្លួន។
នៅពេលដែលសវនាការកំពុងដំណើរការក្តៅគគុក ឆ្មាំគុកបានស្នើទៅចៅក្រមផ្អាកសវនាការ ដើម្បីសុវត្ថិភាពជនជាប់ចោទ។ ចៅក្រមក៏បានយល់ព្រមតាមឆ្មាំគុកតែម្តងទៅ។ នៅមុនពេលដែលចេញពីសវនាការ ជនជាប់ចោទមួយចំនួនបានក្រឡេកឃើញទាហានឆត្រយោង៩១១ ដែលបានប្រើប្រាស់ហិង្សាលើពួកគេ។ ជនជាប់ចោទម្នាក់បាននិយាយទៅកាន់ទាហាននោះថា ពួកលោកឯងនឹងទទួលកម្មពៀរពីការវាយធ្វើបាបពួកខ្ញុំ។ ទាហានទាំងនោះមុខឡើងស្លាំង និងមិនបានតបទៅកាន់ជនជាប់ចោទទាំងនោះឡើយ។
ចំពោះសវនាការនៅបន្ទប់ទី២វិញ ចៅក្រមបានសាកសួរជនជាប់ចោទទាំង ១៣នាក់ និងបានសួរសាក្សី២នាក់។ ហើយចៅក្រមទាំងពីរបន្ទប់ បានសម្រេចលើករឿងក្តីទាំងពីរនេះទៅបើកសវនាការបន្តនៅថ្ងៃទី២០ ឧសភា ដូចគ្នា។ ចំពោះបន្ទប់សវនាការទី៣វិញ បានបញ្ចប់ការសាកសួរទាំងស្រុង ហើយគ្រោងប្រកាសសាលក្រមនៅថ្ងៃទី៣០ ខែឧសភា។
ទាក់ទងនឹងបញ្ហានេះ ប្រធានផ្នែកបច្ចេកទេសអង្កេតរបស់អង្គការលីកាដូ (Licadho) លោក អំ សំអាត មានប្រសាសន៍ថា ចៅក្រម និងព្រះរាជអាជ្ញា នៅតែសួរសំណួររបៀបដាក់បន្ទុកទៅលើជនជាប់ចោទ។ លោកនៅតែយល់ថា វាសនាអ្នកទាំង ២៣នាក់ស្ថិតក្នុងកណ្ដាប់ដៃអ្នកនយោបាយ មកពីគណបក្សប្រជាជនកម្ពុជា និងគណបក្សសង្គ្រោះជាតិ។
«សំឡេង»
រីឯ លោក វន់ ពៅ វិញបានបង្ហាញភាពអស់សង្ឃឹមនៅពេលដឹងថា ចៅក្រមលើកពេលសវនាការទៅបើកនៅកន្លះខែក្រោយ។ លោកថ្លែងប្រាប់វិទ្យុអាស៊ីសេរី ថា លោកកំពុងមានជំងឺ ហើយបើលោកមានឱកាសចេញពីគុកនោះ លោកនឹងអាចបន្តជីវភាពជាអ្នកការពារសិទ្ធិមនុស្សតទៅទៀត។
«សំឡេង»
សវនាការនេះស្ថិតក្រោមការឃ្លាំមើលពីតំណាងស្ថានទូតបរទេស សង្គមស៊ីវិលជាតិ អន្តរជាតិ និងអ្នកសារព័ត៌មានជាច្រើនស្ថាប័ន ប៉ុន្តែអ្នកដែលមានបំណងចង់ស្តាប់សវនាការដោយផ្ទាល់នោះ មិនបានចូលស្តាប់គ្រប់គ្នាទេ ដោយសារបន្ទប់សវនាការចង្អៀតពេក។ ជនជាប់ចោទទាំង ២៣នាក់បានឆ្លងកាត់សវនាការនៅតុលាការកំពូល ក្នុងការស្នើសុំនៅក្រៅឃុំកាលពីថ្ងៃទី២ ខែឧសភា។ តុលាការកំពូល ក៏បានសម្រេចថានឹងប្រកាសសាលក្រមស្នើសុំនៅក្រៅឃុំនេះ នៅថ្ងៃទី៩ ខែឧសភា ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។