អ្នកបើកបរឡានដឹកជញ្ជូនកម្មករទៅធ្វើការរោងចក្រនៅតំបន់សេដ្ឋកិច្ចពិសេសមេនហាតធេន (MANHATTAN) និងតាយសេង (Tai Seng) ចំនួន ៦នាក់ ត្រូវបានអាជ្ញាធរខេត្តស្វាយរៀង ចាប់ខ្លួនបញ្ជូនទៅបំភ្លឺនៅតុលាការ នៅថ្ងៃទី២៤ ខែធ្នូ ពាក់ព័ន្ធនឹងការដឹកកម្មករធ្វើកូដកម្ម។ អង្គការសង្គមស៊ីវិលព្រួយបារម្ភថា ការចាប់ខ្លួនតៃកុងឡានដឹកកម្មករនេះ អាចធ្វើឲ្យស្ថានការណ៍កាន់តែពុះកញ្ជ្រោល។
ការចាប់ខ្លួនតៃកុងឡានដឹកកម្មករចំនួន ៦នាក់នេះ គឺស្របពេលដែលរដ្ឋបាលខេត្តស្វាយរៀង និងភាគីសហជីព កំពុងស្នើឲ្យតុលាការដោះលែងកម្មករចំនួន ៤នាក់ឲ្យនៅក្រៅឃុំ ដើម្បីបន្ធូរបន្ថយភាពតានតឹងនៅតំបន់សេដ្ឋកិច្ចពិសេសមេនហាតធេន និងតាយសេង។
សាច់ញាតិអ្នកបើកបរឡានដែលប្រមូលផ្តុំគ្នានៅខាងមុខសាលាដំបូងខេត្តស្វាយរៀង នៅរសៀលថ្ងៃទី២៤ ធ្នូ រៀបរាប់ថា ដំបូងឡើយ អាជ្ញាធរបានហៅឲ្យអ្នកបើកបរឡានទាំងអស់ទៅជួបប្រជុំគ្នា ប៉ុន្តែបែរជាឃាត់ខ្លួនទុកនៅនគរបាលព្រហ្មទណ្ឌខេត្ត នៅថ្ងៃទី២៣ ធ្នូ ហើយបញ្ជូនឲ្យតុលាការសាកសួរនៅថ្ងៃទី២៤ ធ្នូ ទាក់ទងនឹងការដឹកកម្មករទៅធ្វើកូដកម្មនៅរោងចក្រ៖ «គ្មានដឹកទៅតវ៉ាទេ គឺដឹកកម្មករទៅធ្វើការទាំងអស់គ្នា ប៉ុន្តែអ្នកខ្លះចូលធ្វើការ អ្នកខ្លះអត់ចូលធ្វើការ ហើយយើងមានសិទ្ធិអីទៅធ្វើដេញគេ ធ្វើអីគេ»។
ការឃាត់ខ្លួនអ្នកបើកបរឡាននេះ នៅបន្ទាប់ពីការតវ៉ាទាមទារដំឡើងប្រាក់ឈ្នួលនៅក្រុងបាវិត បានផ្ទុះហិង្សារវាងកងកម្លាំងសមត្ថកិច្ច និងកម្មករជាបន្តបន្ទាប់ ជាពិសេសក្រុមកម្មករមួយចំនួន បានរើសដុំថ្ម និងវត្ថុរឹងផ្សេងទៀត គប់បំផ្លាញទ្រព្យសម្បត្តិរោងចក្រ។
ទាក់ទិនការចាប់ខ្លួនអ្នកបើកបរឡាននេះ អភិបាលរងខេត្តស្វាយរៀង លោក ហ៊ូ វតនៈ ឆ្លើយថា លោកមិនទាន់ទទួលបានព័ត៌មាននេះនៅឡើយ។
វិទ្យុអាស៊ីសេរី ក៏មិនអាចសុំការបញ្ជាក់ពីស្នងការខេត្តស្វាយរៀង លោក កឹង ឃន បានទេ ដោយទូរស័ព្ទចូល ហើយចុចបិទទូរស័ព្ទ។
យ៉ាងណាក៏ដោយចុះ ក្រុមគ្រួសាររបស់អ្នកបើកបរឡាន ទាមទារឲ្យអាជ្ញាធរដោះលែងអ្នកទាំងនោះវិញ ដោយអះអាងថា អ្នកដែលគេឃាត់ទាំង ៦នាក់នោះ គឺមិនមែនជាអ្នកតវ៉ា ហើយប្រើហិង្សាគប់បំផ្លាញទ្រព្យសម្បត្តិរោងចក្រឡើយ ពោលគឺពួកគេជាអ្នកបើកបរឡានស៊ីឈ្នួលដឹកកម្មកររោងចក្រ។
ទាក់ទិនបញ្ហានេះ មន្ត្រីអង្គការការពារសិទ្ធិមនុស្សលីកាដូ (LICADHO) ប្រចាំខេត្តស្វាយរៀង លោក នុត ប៉ូពិណ្ណារ័ត្ន លើកឡើងថា ការចាប់ខ្លួនអ្នកបើកបរឡាន និងចោទថា ដឹកកម្មករទៅធ្វើកូដកម្មនោះ គឺមិនសមហេតុផលឡើយ។ មិនសមហេតុផល ព្រោះការដឹកកម្មករពីផ្ទះទៅរោងចក្រ និងពីរោងចក្រមកផ្ទះ គឺជាមុខរបរប្រចាំថ្ងៃ និងជាតួនាទីរបស់ពួកគាត់៖ «បើចោទគាត់ថា ដឹកកម្មករមកធ្វើបាតុកម្ម គឺខុសទាំងស្រុងតែម្តង»។
លោកបន្ថែមថា ការចាប់ខ្លួនអ្នកបើកបរឡាននេះ នឹងធ្វើឲ្យស្ថានការណ៍ឡើងកម្តៅសាជាថ្មីវិញ ខណៈភាគីពាក់ព័ន្ធបានខិតខំបើកកិច្ចប្រជុំរកដំណោះស្រាយ កាលពីថ្ងៃទី២២ ធ្នូ ដោយព្រមព្រៀងគ្នាថា នឹងដោះលែងកម្មករចំនួន ៤នាក់ ដែលត្រូវបានអាជ្ញាធរចាប់ខ្លួននោះឲ្យនៅក្រៅឃុំវិញ។
នៅព្រឹកថ្ងៃទី២៤ ធ្នូ សហជីព និងសាច់ញាតិរបស់កម្មករ ៤នាក់ ក៏បានប្រមូលផ្តុំគ្នានៅខាងមុខសាលាដំបូងខេត្តស្វាយរៀង ដែរ ដើម្បីរង់ចាំមើលការដោះលែងកម្មករទាំង ៤នាក់។
ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា ឲ្យដឹងថា កម្មករទាំង ៤នាក់នោះ តុលាការមិនទាន់សម្រេចដោះលែងនៅឡើយ ប៉ុន្តែមេធាវីបានរៀបចំនីតិវិធីសុំនៅក្រៅឃុំរួចហើយ។
បើតាមសាច់ញាតិអ្នកដែលត្រូវបានគេឃាត់ខ្លួន ពាក់ព័ន្ធនឹងកូដកម្មហិង្សាទាមទារប្រាក់ឈ្នួលនោះ ព្រមានថា កម្មកររោងចក្រនឹងប្រមូលផ្តុំគ្នាតវ៉ានៅខាងមុខតុលាការខេត្តស្វាយរៀង ប្រសិនបើមិនដោះលែងអ្នកបើកបរឡាន និងកម្មករទាំងអស់នោះឲ្យមានសេរីភាពទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។