អាដហុកបញ្ជូនសំណុំរឿងប៉ូលិសប៉ោយប៉ែតបាញ់ជនសង្ស័យទៅតុលាការ
2015.09.07
សមាគមការពារសិទ្ធិមនុស្សអាដហុក (ADHOC) បញ្ជូនពាក្យបណ្ដឹងពាក់ព័ន្ធនឹងសំណុំរឿងមន្ត្រីប៉ូលិសក្រុងប៉ោយប៉ែត ខេត្តបន្ទាយមានជ័យ ចាប់ជនសង្ស័យលួចម៉ូតូម្នាក់ដោយការបាញ់សម្លាប់ ដាក់ទៅតុលាការ ដើម្បីដោះស្រាយតាមផ្លូវច្បាប់។ ការដាក់ពាក្យបណ្ដឹងនេះ បន្ទាប់ពីមន្ត្រីសមាគមអាដហុក បានធ្វើការស៊ើបអង្កេតអស់ជាច្រើនថ្ងៃ ហើយរកឃើញថា ការបាញ់សម្លាប់នេះជាការរំលោភសិទ្ធិមនុស្ស និងជារឿងខុសច្បាប់ព្រហ្មទណ្ឌ។
មន្ត្រីការពារសិទ្ធិមនុស្សអាដហុក អំពាវនាវឲ្យតុលាការខេត្តបន្ទាយមានជ័យ និងមន្ត្រីពាក់ព័ន្ធចាត់វិធានការតាមផ្លូវច្បាប់ទៅលើមន្ត្រីប៉ូលិសដែលបាញ់សម្លាប់ជនសង្ស័យលួចម៉ូតូឲ្យបានឆាប់ៗ ដើម្បីផ្ដល់យុត្តិធម៌ឲ្យប្រជាពលរដ្ឋសាច់ញាតិដែលស្លាប់នោះ។
មន្ត្រីសម្របសម្រួលសមាគមការពារសិទ្ធិមនុស្សអាដហុក ខេត្តបន្ទាយមានជ័យ លោក ស៊ុំ ច័ន្ទគា ថ្លែងនៅថ្ងៃទី៧ ខែកញ្ញា ថា លោកបានបញ្ជូនពាក្យបណ្ដឹងពាក់ព័ន្ធនឹងសំណុំរឿងមន្ត្រីប៉ូលិសក្រុងប៉ោយប៉ែត ចាប់ជនសង្ស័យលួចម៉ូតូម្នាក់ដែលមន្ត្រីនគរបាលយុត្តិធម៌អនុវត្តច្បាប់ដោយការបាញ់សម្លាប់នោះ ទៅសាលាដំបូងខែត្របន្ទាយមានជ័យ រួចរាល់ហើយកាលពីថ្ងៃទី៣ ខែកញ្ញា។ តែរហូតមកទល់ពេលនេះ ខាងតុលាការពុំទាន់មានចំណាត់ការនៅឡើយទេ។ លោកអះអាងថា មូលហេតុដែលដាក់ពាក្យបណ្ដឹងនេះ ធ្វើឡើងបន្ទាប់ពីលោកចុះធ្វើការស៊ើបអង្កេតសំណុំរឿងនេះ ប្រមាណមួយសប្ដាហ៍ ហើយមានការសង្ស័យថា មន្ត្រីនគរបាលក្រុងប៉ោយប៉ែត ពុំបានចាប់ជនសង្ស័យលួចម៉ូតូយកមកសួរនាំតាមផ្លូវច្បាប់ទេ ផ្ទុយទៅវិញ មន្ត្រីនគរបាលអនុវត្តការចាប់ខ្លួនដោយការបាញ់សម្លាប់ទៅវិញ កាលពីថ្ងៃទី២៤ ខែសីហា នោះថា ជារឿងខុសច្បាប់ ដែលផ្ទុយពីសមត្ថកិច្ចអះអាងថា ជនសង្ស័យតដៃទើបមន្ត្រីនគរបាលបាញ់សម្លាប់។
លោកបញ្ជាក់ថា សមត្ថកិច្ចបានបាញ់ជនសង្ស័យចំនួន ១គ្រាប់បណ្ដាលឲ្យស្លាប់ភ្លាមៗនៅនឹងកន្លែងនៅមុខវត្តផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ដោយជនសង្ស័យពុំបានតដៃសមត្ថកិច្ចនោះឡើយ៖ «សមាគមការពារសិទ្ធិមនុស្សអាដហុក មានការសង្ស័យយ៉ាងខ្លាំងចំពោះករណីដែលកើតឡើងនោះ គឺជាការបាញ់ប្រហារដកអាយុជីវិតរបស់មនុស្សដែលខុសពីច្បាប់កំណត់»។
ឆ្លើយតបនឹងបញ្ហានេះ ព្រះរាជអាជ្ញារងអមសាលាដំបូងខេត្តបន្ទាយមានជ័យ លោក ផាន់ ភីរម្យ មានប្រសាសន៍ថា លោកទើបតែទទួលភារកិច្ចជំនួសព្រះរាជអាជ្ញាដែលជាប់បេសកកម្មទៅក្រៅប្រទេស ហើយថា លោកពុំទាន់ទទួលពាក្យបណ្ដឹងជុំវិញមន្ត្រីសមាគមការពារសិទ្ធិមនុស្សអាដហុក ដែលប្ដឹងមន្ត្រីប៉ូលិសក្រុងប៉ោយប៉ែត ចាប់ជនសង្ស័យដោយការបាញ់សម្លាប់នោះនៅឡើយទេ។ ម្យ៉ាងទៀត លោកក៏ពុំបានបញ្ជាក់ថា នឹងតាមដានលើការងារនេះ ឬយ៉ាងនៅឡើយទេ។
លោក ផាន់ ភីរម្យ៖ «បើសិនជារឿងនេះស្ថិតនៅក្នុងបន្ទុករបស់ខ្ញុំនោះ ខ្ញុំមានអំណាចធ្វើការនេះ ហើយខ្ញុំនឹងធ្វើការបកស្រាយអំពីដំណើរការរឿងនេះបាន។ ប៉ុន្តែរឿងនេះ ខ្ញុំមិនទាន់ដឹងថាកើតហេតុនៅពេលនោះទេ។ ម្យ៉ាងទៀត ប្រសិនបើរឿងទើបតែកើតឡើងថ្មីទេ ប្រហែលជាពុំទាន់មកដល់ខ្ញុំនោះទេ»។
ជនសង្ស័យដែលសមត្ថកិច្ចបាញ់ស្លាប់នោះ ឈ្មោះ យ៉ន ចាន់លាប ភេទប្រុស អាយុ ៣២ឆ្នាំ មានស្រុកកំណើតនៅស្រុកកំពង់សៀម ខេត្តកំពង់ចាម ត្រូវគ្រាប់កាំភ្លើងមួយគ្រាប់នៅដើមទ្រូងខាងឆ្វេងស្លាប់នៅនឹងកន្លែង។
នៅក្នុងរបាយការណ៍របស់សមាគមអាដហុក ដាក់ជូនតុលាការកាលពីថ្ងៃទី៣ ខែកញ្ញា ក្រោយពីស៊ើបអង្កេតពីករណីបាញ់សម្លាប់នេះ បានបញ្ជាក់ថា មុនពេលកើតហេតុ ទាំងសមត្ថកិច្ច ទាំងជនសង្ស័យ ជិះម៉ូតូបណ្ដើរគ្នាជាធម្មតា មកដល់កន្លែងកើតហេតុជនសង្ស័យជិះម៉ូតូបត់ក្រោយវិញ ហើយត្រូវបានសមត្ថកិច្ចស្រែកឲ្យឈប់ រួចដកកាំភ្លើងខ្លីបាញ់ជនសង្ស័យមួយគ្រាប់ចំពីក្រោយធ្លុះមកក្រោមដោះខាងឆ្វេង ព្រមទាំងវាយទាត់ធាក់ និងដាក់ខ្នោះដៃរហូតដល់ស្លាប់តែម្ដង។
ពលរដ្ឋជាច្រើននាក់ដែលឃើញហេតុការណ៍នោះ អះអាងថា នៅថ្ងៃកើតហេតុសំឡេងគ្រាប់កាំភ្លើងដែលសមត្ថកិច្ចបាញ់តែមួយគ្រាប់ទេ ចំណែកជនសង្ស័យពុំបានតដៃនោះឡើយ។
ទោះយ៉ាងនេះក្ដី លោក ស៊ុំ ច័ន្ទគា ត្រៀមបញ្ជូនសំណុំរឿងពីការស្លាប់នេះទៅក្រសួងយុត្តិធម៌ និងអគ្គព្រះរាជអាជ្ញាមហាអយ្យការសាលាឧទ្ធរណ៍បន្តទៀត ប្រសិនបើសាលាដំបូងខែត្របន្ទាយមានជ័យ ពុំមានចំណាត់ការណាមួយទេនោះ៕