សំណុំរឿងប្ដឹងលោកនាយករដ្ឋមន្ត្រី ហ៊ុន សែន ទាក់ទងរឿងកោះត្រល់ ត្រូវបញ្ជូនដល់សាលាឧទ្ធរណ៍ បន្ទាប់ពីដើមបណ្ដឹងប្ដឹងទាស់នឹងសេចក្ដីសម្រេចសាលាដំបូង ដែលតម្កល់សំណុំរឿងនេះមិនចាត់ការ។
ដើមបណ្ដឹង លោក នាង សុឃុន ដែលជាប្រធានសហព័ន្ធយុវជនខ្មែរអ្នកស្នេហាជាតិ មានប្រសាសន៍នៅមុខសាលាឧទ្ធរណ៍ នៅព្រឹកថ្ងៃអង្គារ ទី១០ ខែមិថុនា ថា មន្ត្រីនៃមហាអយ្យការអមសាលាឧទ្ធរណ៍ បានបញ្ជាក់ប្រាប់លោកថា សាលាឧទ្ធរណ៍កំពុងចាត់ចែងសំណុំរឿងនេះតាមនីតិវិធី។ លោក នាង សុឃុន ព្រមានថា នឹងដឹកនាំក្រុមយុវជនទៅតវ៉ានៅខាងមុខសាលាឧទ្ធរណ៍ ប្រសិនបើស្ថាប័ននេះមិនយកចិត្តទុកដាក់ចំពោះបណ្ដឹងរបស់លោកទេនោះ។
លោក នាង សុឃុន៖ «ពេលនេះខ្ញុំមកសាកសួរ ប៉ុន្តែលើកក្រោយខ្ញុំនឹងមកដោយដឹកនាំពលរដ្ឋ ដែលជាអ្នកស្រឡាញ់ទឹកដី ស្រឡាញ់ជាតិរបស់ខ្លួន ដើម្បីមកតវ៉ាអោយសាលាឧទ្ធរណ៍ពន្លឿនពាក្យបណ្ដឹងរបស់ខ្ញុំជាបន្ទាន់»។
លោក នាង សុឃុន បានដាក់ពាក្យបណ្ដឹងទៅសាលាដំបូង កាលពីថ្ងៃទី៣ ខែកុម្ភៈ ដោយប្ដឹងលោកនាយករដ្ឋមន្ត្រី ហ៊ុន សែន ពីបទកាត់ដីកោះត្រល់ និងកោះក្រចកសេះ ទៅអោយយួនដោយខុសច្បាប់។ ប៉ុន្តែសាលាដំបូងរាជធានីភ្នំពេញ សម្រេចតម្កល់ទុកមិនចាត់ការចំពោះពាក្យបណ្ដឹងប្រឆាំងលោកនាយករដ្ឋមន្ត្រី ហ៊ុន សែន នោះទេ។ លោកបានដាក់បណ្ដឹងទាស់នឹងសេចក្ដីសម្រេចនោះ កាលពីថ្ងៃទី៧ ខែឧសភា ដើម្បីអោយសាលាដំបូងបញ្ជូនសំណុំរឿងនោះទៅសាលាឧទ្ធរណ៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។