ក្រុមប្រឹក្សាជំនុំជម្រះនៃសភាស៊ើបសួរសាលាឧទ្ធរណ៍ សម្រេចលើកយកសំណុំរឿងក្តីរបស់លោក សម រង្ស៊ី ជាមួយនឹងលោកនាយករដ្ឋមន្ត្រី ហ៊ុន សែន មកជម្រះនៅថ្ងៃទី១៧ មករា។ នៅក្នុងបន្ទប់សវនាការដែលប្រើពេលដេញដោលផ្ទាល់មាត់ប្រមាណ ១ម៉ោង ប្រធានក្រុមប្រឹក្សាជំនុំជម្រះ សម្រេចលើកពេលប្រកាសសាលដីកាជុំវិញវិវាទការចុចចូលចិត្ត (Like) តាមហ្វេសប៊ុក (facebook) នៅដើមខែកុម្ភៈ ខាងមុខនេះ។
ទាំងភាគីដើមចោទ និងចុងចោទ ម្នាក់ៗសុទ្ធតែរំពឹងនៅថ្ងៃប្រកាសសាលដីកា ដែលនឹងមកដល់ក្នុងពេលដ៏ខ្លីខាងមុខនេះថា ពួកគេនឹងអាចយកប្រៀបលើគូវិវាទបានដូចៗគ្នា។
ថ្លែងក្រោយចេញពីបន្ទប់សវនាការនៅរសៀលថ្ងៃទី១៧ មករា តំណាងដើមបណ្ដឹង និងជាមន្ត្រីជាន់ខ្ពស់របស់គណបក្សប្រជាជនកម្ពុជា លោក សោម សឿន អះអាងថា ខាងលោកអាចនឹងមានប្រៀបលើគូទំនាស់ គឺលោក សម រង្ស៊ី។ លោកបន្តថា ផ្អែកលើសេចក្តីសម្រេចរួចហើយរបស់តុលាការក្រុងភ្នំពេញ បូករួមទាំងភស្តុតាងដាក់បន្ទុក រកឃើញថា ប្រធានគណបក្សប្រឆាំងពិតជាបានប្រព្រឹត្តបទល្មើសដូចបទចោទមែន។
លោកបន្ថែមថា ការចោទប្រកាន់លោក ហ៊ុន សែន និងរូបលោកផ្ទាល់ ថាបានទិញចំនួនចូលចិត្ត (Like) និងអ្នកក្រីក្រឲ្យចុចចូលចិត្ត (Like) ហ្វេសប៊ុករបស់លោកនាយករដ្ឋមន្ត្រី ទាំងនេះគឺបទល្មើសដែលមិនអាចប្រកែកបានឡើយ។ លោកបន្តថា « លោក សម រង្ស៊ី ដែលគាត់ប្រឌិតរឿងហេតុ ហើយចោទទម្លាក់កំហុសបំភ្លៃការពិតខុសពីអ្វីដែលខ្ញុំបានធ្វើ។ ប៉ុន្តែទន្ទឹមនឹងការផ្សព្វផ្សាយអំពីសេចក្ដីសម្រេចនេះជាសាធារណៈវិញ វាក៏អាចឲ្យសាធារណមតិបានឃើញអំពីភាពយុត្តិធម៌ត្រឹមត្រូវអ្វីដែលខ្ញុំបានធ្វើ »។
ជុំវិញភាពចម្រូងចម្រាសនេះ កាលពីខែវិច្ឆិកា ឆ្នាំ២០១៦ តុលាការក្រុងភ្នំពេញបានផ្ដន្ទាទោសលោក សម រង្ស៊ី ដោយពិន័យលុយចំនួន ១០លានរៀល និងបង់សងជំងឺចិត្តទៅដើមបណ្ដឹងចំនួន ១៥លានរៀលតាមមាត្រា៣០៥ និងមាត្រា៥១០ នៃក្រមព្រហ្មទណ្ឌ។
ទាក់ទិនវិវាទនេះ កាលពីខែមីនា ឆ្នាំ២០១៦ លោក សម រង្ស៊ី រងការចោទថា បានបង្ហោះនៅលើហ្វេសប៊ុករបស់លោក ដោយចោទប្រកាន់លោកនាយករដ្ឋមន្ត្រី និងលោក សោម សឿន ជាមន្ត្រីស្និទ្ធនឹងលោក ហ៊ុន សែន ថាបានព្យាយាមទិញទឹកចិត្តអ្នកក្រីក្រឲ្យចុចចូលចិត្ត (Like) និងទិញចំនួនចូលចិត្ត (Like) ឲ្យមានចំនួនកើនឡើងជាងហ្វេសប៊ុករបស់លោក សម រង្ស៊ី។
បញ្ហានេះ ត្រូវបានលោក សោម សឿន បញ្ជាក់ក្នុងអង្គសវនាការថា នេះជាការធ្វើឲ្យប៉ះពាល់ធ្ងន់ធ្ងរដល់កិត្តិយស និងសេចក្ដីថ្លៃថ្នូររបស់លោក និងលោក ហ៊ុន សែន ផ្ទាល់។ នៅក្នុងអង្គជំនុំជម្រះ ទាំងមេធាវីការពារក្ដីឲ្យដើមបណ្ដឹង តំណាងដើមបណ្ដឹងរដ្ឋប្បវេណី និងអគ្គព្រះរាជអាជ្ញាលោក ង៉ែត សារ៉ាត់ ស្នើនៅក្នុងសេចក្ដីសន្និដ្ឋានចុងក្រោយ ដោយទាមទារឲ្យក្រុមប្រឹក្សាជំនុំជម្រះរក្សាបទចោទ និងសាលក្រមរបស់តុលាការក្រុងភ្នំពេញ ទុកជាបានការដដែល។
នៅក្នុងបន្ទប់សវនាការ ប្រធានក្រុមប្រឹក្សាជំនុំជម្រះ លោក សំរិទ្ធិ សុផល បានហាមដាច់ខាតមិនឲ្យអ្នកកាសែតនៅក្នុងបន្ទប់ជំនុំជម្រះលួចថតសំឡេង និងសូម្បីកត់ត្រានៅលើក្រដាសស្នាម ក៏ពុំអនុញ្ញាតដែរ។ អ្នកសង្កេតការណ៍របស់អង្គការមិនមែនរដ្ឋាភិបាល យល់ឃើញថា នេះជាការរឹតបន្តឹងដែលខុសរបៀប បើសូម្បីកត់ត្រាពុំបានផងនោះ។
នៅក្នុងអង្គសវនាការ មេធាវីការពារក្តីឲ្យដើមបណ្ដឹង បានជំទាស់ទៅនឹងការតាំងសំណួររបស់លោក សំ សុគង់ ដោយលើកហេតុផលថា សំណួរជាភាសាអង់គ្លេសមិនត្រូវប្រើក្នុងពេលជំនុំជម្រះឡើយ ភាសាដែលប្រើនៅក្នុងអង្គសវនាការ គឺភាសាខ្មែរជាគោល។ ដោយឡែកលោក សំ សុគង់ វិញប្រាប់អង្គជំនុំជម្រះថា ដោយសារការបកប្រែភាសាអង់គ្លេសនេះហើយ ដែលនាំឲ្យមានការយល់ខុសពីខ្លឹមសារដើមរបស់លោក សម រង្ស៊ី។ ក្រៅពីនេះ មេធាវីការពារក្តីឲ្យមេបក្សប្រឆាំង ឲ្យដឹងថា ថ្វីបើដើមបណ្ដឹងអះអាងពីភាពស្អាតស្អំ ថាឯកសារដែលបែកធ្លាយពីការបង្គាប់បញ្ជាឲ្យទិញចំនួនចូលចិត្ត (Like) និងនាំគ្នាចូលទៅចុចមិនចូលចិត្ត (Unlike) ហ្វេសប៊ុកផេករបស់លោក សម រង្ស៊ី គឺជាសាររបស់មេបក្សប្រឆាំងក្តី មេធាវីរូបនេះយល់ឃើញថា នេះគឺជាការព្យាយាមដោះបន្ទុកប៉ុណ្ណោះ។
លោក សំ សុគង់ មានជំនឿថា នៅថ្ងៃប្រកាសសាលដីកាខាងមុខនេះ ក្រុមប្រឹក្សាជំនុំជម្រះនឹងផ្ដល់ភាពត្រឹមត្រូវ និងយុត្តិធម៌ដល់លោក សម រង្ស៊ី។ ម្យ៉ាងវិញទៀត លោកអះអាងថា ការជម្រះក្តីក្នុងដំណាក់កាលដំបូងនៅតុលាការក្រុងភ្នំពេញ គឺជាការផ្តល់ភាពមិនត្រឹមត្រូវរួចទៅហើយសម្រាប់លោក សម រង្ស៊ី។ លោកបន្តថា « ខ្ញុំគិតថា ទាក់ទងនឹងសវនាការថ្ងៃនេះជាសវនាការដែលសង្ឃឹមថាសាលាឧទ្ធរណ៍ ដែលជាតុលាការជាន់ខ្ពស់ នឹងពិចារណាទៅលើឯករាជភាពរបស់ខ្លួន ហើយនឹងសម្រេចឲ្យកូនក្តីរបស់ខ្ញុំបាទរួចផុតពីបទចោទ »។
នេះជាសំណុំរឿងមួយក្នុងចំណោមសំណុំរឿងជាច្រើនទៀតដែលលោក សម រង្ស៊ី កំពុងប្រឈម ក្រៅពីត្រូវរុំព័ន្ធដោយសំណុំរឿងជាមួយលោក ហ៊ុន សែន រឿងហ្វេសប៊ុកនេះហើយ លោកក៏នៅមានសំណុំរឿងដទៃទៀតជាមួយអតីតរដ្ឋមន្ត្រីក្រសួងការបរទេស លោក ហោ ណាំហុង។ រឿងក្ដីជាមួយលោក ហេង សំរិន ប្រធានរដ្ឋសភា។ ករណីចោទថាលោក ហ៊ុន សែន នៅពីក្រោយឃាតកម្មនៃការបាញ់សម្លាប់លោកបណ្ឌិត កែម ឡី និងសំណុំរឿងមួយផ្សេងទៀត គឺពាក់ព័ន្ធបញ្ហាព្រំដែនរវាងកម្ពុជា-វៀតណាម ជាដើម។
បើទោះជាបែបណា លោក សម រង្ស៊ី អះអាងកាលពីថ្ងៃទី១៣ មករា តាមទូរស័ព្ទពីប្រទេសបារាំង មកថា លោកអាចវិលចូលប្រទេសវិញពេលណាក៏បានដែរ សំខាន់ថាតើតុលាការនឹងបំពេញកិច្ចការដោយឯករាជ្យដែរទេ?៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។