សាលាឧទ្ធរណ៍នឹងបើកសវនាការជំនុំជម្រះក្តីលើសំណុំរឿងលោក សម រង្ស៊ី ប្រធានគណបក្សសង្គ្រោះជាតិ បរិហារកេរ្តិ៍លោកនាយករដ្ឋមន្ត្រី ហ៊ុន សែន ជាសាធារណៈលើហ្វេសប៊ុក (Facebook) នៅរសៀលថ្ងៃទី១៧ មករា។ នេះបើតាមការអះអាងថារបស់មេធាវីការពារក្តីលោក សម រង្ស៊ី គឺលោក សំ សុគង់។
លោក សំ សុគង់ បញ្ជាក់ថា ការបើកសវនាការនេះបន្ទាប់ពីលោកបានប្ដឹងទាស់ទៅសាលាឧទ្ធរណ៍ ក្រោយពីសាលាដំបូងរាជធានីភ្នំពេញ បានប្រកាសសាលក្រមឲ្យលោក សម រង្ស៊ី ចាញ់ក្តីកាលពីថ្ងៃទី៨ ខែវិច្ឆិកា ឆ្នាំ២០១៦។ សាលក្រមនោះ បង្គាប់ឲ្យលោក សម រង្ស៊ី បង់ថវិកាចូលរដ្ឋចំនួន ១០លានរៀល និងសងជំងឺចិត្តលោកនាយករដ្ឋមន្ត្រី ហ៊ុន សែន ចំនួន ១៥លានរៀល។ លោក សំ សុគង់ ស្នើឲ្យសាលាឧទ្ធរណ៍ ពិនិត្យ និងសម្រេចឡើងវិញចំពោះសេចក្តីសម្រេចរបស់សាលាដំបូងរាជធានីភ្នំពេញ ដែលមិនបានផ្តល់យុត្តិធម៌ជូនដល់កូនក្តីរបស់លោក។
កាលពីថ្ងៃទី៩ ខែមីនា ឆ្នាំ២០១៦ លោក សម រង្ស៊ី បានសរសេរនៅលើទំព័រហ្វេសប៊ុករបស់លោកថា ថ្ងៃនេះមានធ្លាយព័ត៌មានមួយតាមរយៈកាសែតភ្នំពេញប៉ុស្តិ៍ ពីមតិចូលចិត្ត ឬ Like ក្លែងក្លាយលើទំព័រហ្វេសប៊ុករបស់លោក ហ៊ុន សែន។ លោកថា ចំនួនចូលចិត្ត (Like) មួយចំនួនធំលើទំព័រហ្វេសប៊ុកលោក ហ៊ុន សែន គឺបានមកពីការទិញ ឬជួលមនុស្សក្រីក្រដែលអត់ការងារធ្វើ ឲ្យបង្កើតគណនីក្លែងក្លាយ ដើម្បីផ្ដល់មតិចូលចិត្ត (Like) ឲ្យលោក ហ៊ុន សែន។ លោក សម រង្ស៊ី សរសេរបន្តថា អ្នកដែលគេជួលឲ្យធ្វើបែបនេះច្រើនជាងគេ គឺនៅប្រទេសឥណ្ឌា (India) និងហ្វីលីពីន (Philippines)។
ក្រោយពីការសរសេរលាតត្រដាងពីមូលហេតុដែលធ្វើឲ្យចំនួនអ្នកចុចចូលចិត្ត (Like) នៅលើទំព័រហ្វេសប៊ុករបស់លោក ហ៊ុន សែន កើនចំនួនច្រើននោះ មួយថ្ងៃក្រោយមក សមាជិកគណៈកម្មាធិការកណ្ដាលគណបក្សប្រជាជនកម្ពុជា លោក សោម សឿន ក៏បានចេញមុខប្ដឹងប្រឆាំងលោក សម រង្ស៊ី វិញ ដោយទាមទារតុលាការឲ្យផ្ដន្ទាទោសលោក សម រង្ស៊ី តាមច្បាប់ និងទាមទារសំណងជំងឺចិត្តពីលោក សម រង្ស៊ី ចំនួន ២០លានរៀល ដែលស្មើប្រមាណ ៥ពាន់ដុល្លារអាមេរិក។
រហូតមកដល់ពេលនេះ ប្រធានគណបក្សសង្គ្រោះជាតិ លោក សម រង្ស៊ី ដែលត្រូវបានរដ្ឋាភិបាលហាមមិនឲ្យវិលចូលស្រុក កំពុងជាប់បណ្ដឹងសរុបនៅតុលាការចំនួន ៥ករណី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។