ចាប់តាំងពីមានយុទ្ធនាការថ្ងៃច័ន្ទពណ៌ខ្មៅ ដែលទាមទារឲ្យដោះលែងមន្ត្រីសិទ្ធិមនុស្ស និងមន្ត្រី គ.ជ.ប ក្រុមស្ត្រីបឹងកក់ជាច្រើននាក់ដែលនាំគ្នាធ្វើយុទ្ធនាការនេះ ត្រូវបានតុលាការក្រុងភ្នំពេញកោះហៅជាបន្តបន្ទាប់។ អ្នកបឹងកក់ថា ការសើរើសំណុំរឿងពួកគាត់ខ្លះកាលពីជាង ២ ឬ ៤ឆ្នាំមុនឡើងវិញ គឺជាការគំរាមកំហែងលើពួកគាត់។
សកម្មជនដីធ្លីនៅតំបន់បឹងកក់ លោកស្រី ង៉ែត ឃុន ហៅយាយម៉ាំម៉ី យល់ថា ចំណាត់ការរបស់តុលាការនៅពេលនេះ គឺជាការដាក់គំនាបមកលើពួកគាត់ មិនឲ្យធ្វើសកម្មភាពតវ៉ានានាក្នុងសង្គម និងខាតបង់ពេលវេលាប្រកបរបរចិញ្ចឹមជីវិត។
លោកស្រី ង៉ែត ឃុន អះអាងថា ខ្លួនមិនត្រឹមតែជាអ្នករងគ្រោះពីអំពើហិង្សាបង្កដោយលោកស្រី តុល ស្រីពៅ ប៉ុណ្ណោះទេ តែថែមទាំងរងបណ្ដឹងបកវិញថា បង្កហិង្សាដោយចេតនាលើលោកស្រី តុល ស្រីពៅ បន្ថែមទៀត។ ស្ត្រីវ័យចំណាស់រូបនេះថាវាជារឿងអយុត្តិធម៌សម្រាប់រូបលោកស្រី៖ «អារម្មណ៍ខ្ញុំមិនដឹងថា ប្រព័ន្ធតុលាការចាប់ខ្ញុំដូចអ្នកស្រី ទេព វន្នី ក៏មិនដឹង ឬក៏យ៉ាងម៉េចទេ។ ចាំមើលថ្ងៃស្អែក ខ្ញុំចូលមក ខ្ញុំនឹងដឹង។ ប្រសិនបើប្រព័ន្ធតុលាការឯករាជ្យ យុត្តិធម៌ ត្រូវរកយុត្តិធម៌ឲ្យខ្ញុំ សម្រាប់ជនល្មើសដៃដល់ដែលវ៉ៃខ្ញុំបែកឈាមហូរ មានទាំងប៉ូលិស មានទាំងប៉េអឹម នៅឈរពីក្រោយខ្នង ទល់ ស្រីពៅ ហ្នឹងតែម្ដង។ មួយក្រុមគេវាយខ្ញុំហើយ បងប្អូនប្រជាពលរដ្ឋគេស្រែកថា ឲ្យចាប់ជនល្មើស អ្នកដៃដល់នឹងមកផ្ដន្ទាទោស ក៏ខាងកម្លាំងសមត្ថកិច្ចហ្នឹងចាប់ជនល្មើសទេ ទុកឲ្យជនល្មើសហ្នឹងវាយខ្ញុំតាមតែអំពើចិត្ត»។
លោកស្រី គង់ ចន្ថា ដែលជាសាក្សីម្នាក់ក្នុងសំណុំរឿងលោកស្រី ង៉ែត ឃុន ឲ្យដឹងថា ពាក្យបណ្ដឹងរបស់លោកស្រី ង៉ែត ឃុន ដែលដាក់ប្ដឹងកាលពីឆ្នាំ២០១៤ នោះ តុលាការក្រុងភ្នំពេញមិនមានចំណាត់ការទេ បែរជាធ្វើការលើបណ្ដឹងបកលោកស្រី ង៉ែត ឃុន ពីលោកស្រី តុល ស្រីពៅ ទៅវិញ។
លោកស្រីយល់ថា ការប្ដឹងផ្ដល់រវាងអ្នកបឹងកក់នេះ មិនមែនកើតចេញពីអ្នកបឹងកក់នោះទេ គឺមានអាជ្ញាធរនៅពីក្រោយ ដើម្បីធ្វើឲ្យសហគមន៍បែកបាក់សាមគ្គីគ្នារឿងតវ៉ាទាមទារដីធ្លីពីក្រុមហ៊ុនស៊ូកាគូ (Shukaku)៖ «យើងមើលសង្គមយើងឥឡូវ វាពុលទៅដល់ថ្នាក់ដឹកនាំផង ពុលទៅលើប្រជាពលរដ្ឋ គាត់ពង្វាងដាន។ ការប្រព្រឹត្តខ្លួនឯងខុសមកលើប្រជាពលរដ្ឋគាត់អត់គិតទេ។ គាត់យកកំហុសទាំងប៉ុន្មានមកដាក់លើប្រជាពលរដ្ឋ។ នេះគេហៅថា ជាគំនាបមួយមកលើប្រជាពលរដ្ឋ ឬមកដល់សហគមន៍។ ទោះបីយកប្រព័ន្ធតុលាការគាបយើងក៏ដោយ ក៏ពួកយើងមិនខ្លាចដែរ»។
អាស៊ីសេរី មិនអាចសុំការបំភ្លឺរឿងនេះពីអតីតតំណាងអ្នកបឹងកក់ លោកស្រី តុល ស្រីពៅ បានទេ នៅថ្ងៃទី២៤ ខែមករា។
ចំណែកអ្នកស្រី ទេព វន្នី ដែលកំពុងជាប់ឃុំនៅគុកព្រៃស ត្រូវបានគេនាំមកតុលាការក្រុងភ្នំពេញនៅព្រឹកថ្ងៃទី២៤ មករា ដើម្បីឆ្លើយបំភ្លឺនៅមុខចៅក្រមស៊ើបសួរ លោក អ៊ី ថាវរៈ ក្នុងនាមជាសាក្សីឲ្យលោកស្រី ង៉ែត ឃុន ដែលរងបណ្ដឹងពីអតីតតំណាងអ្នកបឹងកក់ លោកស្រី តុល ស្រីពៅ ដែលប្ដឹងថា លោកស្រី ង៉ែត ឃុន ប្រើហិង្សាដោយចេតនាលើខ្លួនកាលពីឆ្នាំ២០១៤ នៅតំបន់បឹងកក់។
បើទោះជាគ្មានជំនឿលើប្រព័ន្ធតុលាការពេលបច្ចុប្បន្ននេះក្ដី អ្នកបឹងកក់នៅតែមានសង្ឃឹមថា យុត្តិធម៌ពិតប្រាកដនឹងមាននៅថ្ងៃណាមួយជាមិនខានចំពោះពួកគាត់ បើសិនមានការផ្លាស់ប្ដូរសង្គមជាតិមួយតាមបែបលទ្ធិប្រជាធិបតេយ្យពិតប្រាកដនោះ។ អ្នកបឹងកក់យល់ថា តុលាការមិនគួរលើកយករឿងរ៉ាវកន្លងផុតជាច្រើនឆ្នាំ ដើម្បីដាក់សម្ពាធពួកគេមិនឲ្យធ្វើយុទ្ធនាការថ្ងៃច័ន្ទពណ៌ខ្មៅនោះទេ។ ពួកគេនៅតែបន្តយុទ្ធនាការនោះដដែល លុះត្រាតែមានការដោះលែងអ្នកស្រី ទេព វន្នី មន្ត្រីសិទ្ធិមនុស្ស និងមន្ត្រី គ.ជ.ប។
លោកស្រី ង៉ែត ឃុន ដែលត្រូវជាចុងចម្លើយក្នុងសំណុំរឿង នឹងចូលបំភ្លឺនៅតុលាការក្រុងភ្នំពេញនៅព្រឹកថ្ងៃទី២៥ ខែមករា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។