មន្ត្រីរដ្ឋាភិបាល អះអាងថា រដ្ឋាភិបាលកម្ពុជាមិនមានការបារម្ភថាសមត្ថកិច្ចសហរដ្ឋអាមេរិក ឃាត់ខ្លួនកូនប្រុសលោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ាណែត តាមពាក្យបណ្តឹងរបស់សាច់ញាតិមន្ត្រីបក្សប្រឆាំង ដាក់ទៅកាន់តុលាការសហរដ្ឋអាមេរិកឡើយ។ លោក ហ៊ុន ម៉ាណែត ដែលកំពុងបំពេញទស្សនកិច្ចនៅសហរដ្ឋអាមេរិក ត្រូវបានភរិយាលោក មាជ សុវណ្ណារ៉ា ប្ដឹងពីការប្រព្រឹត្តបទល្មើសមួយចំនួន ខណៈអង្គរក្សរបស់លោកក៏កំពុងប្រឈមនឹង ការស៊ើបអង្កេតពាក់ព័ន្ធការប្រើអំពើហិង្សាលើស្មៀនមេធាវីអាមេរិកម្នាក់ឲ្យរងរបួសធ្ងន់ធ្ងរ។
បណ្ដឹងប្រឆាំងលោក ហ៊ុន ម៉ាណែត ទៅកាន់តុលាការអាមេរិក និងការធ្វើបាតុកម្មប្រឆាំងវត្តមានរបស់លោកដោយពលរដ្ឋខ្មែរមួយចំនួននៅទីនោះ កំពុងធ្វើឲ្យពលរដ្ឋខ្មែរនៅក្នុងស្រុកតាមដានពីបញ្ហានេះ បើទោះបីជាកំពុងរីករាយក្នុងពិធីបុណ្យចូលឆ្នាំថ្មីក្ដី។
កាលពីពេលថ្មីៗនេះ ភរិយារបស់មន្ត្រីបក្សប្រឆាំង លោក មាជ សុវណ្ណារ៉ា ដែលត្រូវបាន តុលាការខ្មែរកាត់ទោសឲ្យជាប់ពន្ធនាគារចំនួន២០ឆ្នាំនោះ បានប្ដឹងលោក ហ៊ុន ម៉ាណែត និងរដ្ឋាភិបាលដឹកនាំដោយឪពុករបស់លោកទៅកាន់តុលាការអាមេរិក ដោយចោទប្រកាន់ លោក ហ៊ុន ម៉ាណែត និងរដ្ឋាភិបាលកម្ពុជា ពីបទឃុំឃាំងមនុស្សខុសច្បាប់ ការធ្វើទុក្ខបុក ម្នេញបក្សប្រឆាំង និងអំពើភេរវកម្មអន្តរជាតិ។ បន្ថែមទៅលើបណ្ដឹងនេះ អង្គរក្សរបស់លោក ហ៊ុន ម៉ាណែត ក៏កំពុងប្រឈមនឹងការស៊ើបអង្កេតរបស់សមត្ថកិច្ចសហរដ្ឋអាមេរិក ក្រោយពីបានបង្កហិង្សាធ្ងន់ធ្ងរលើស្មៀនមេធាវីអាមេរិកម្នាក់នៅពេលស្មៀនរូបនេះ យកដីកាកោះហៅ របស់តុលាការប្រគល់ទៅឲ្យលោក ហ៊ុន ម៉ាណែត។
ទោះជាបែបនេះក្ដីមន្ត្រីរដ្ឋាភិបាល និងជាអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន មានប្រសាសន៍នៅថ្ងៃទី១៥ មេសា ថា រដ្ឋាភិបាលមិនបារម្ភថាតុលាការ នៅសហរដ្ឋអាមេរិក នឹងអាចឃាត់ខ្លួនលោក ហ៊ុន ម៉ាណែត នោះទេ ដោយលោកលើកឡើងថា បណ្ដឹង ប្រឆាំងនឹងលោក ហ៊ុន ម៉ាណែត មិនមានភស្តុតាងពិតប្រាកដទៅតាមអង្គហេតុ និងអង្គច្បាប់ឡើយ។ មួយវិញទៀត លោកថា លោក ហ៊ុន ម៉ាណែត មានអភ័យឯកសិទ្ធិក្នុង នាមជាឥស្សរជនជាន់ខ្ពស់បំពេញទស្សនកិច្ចនៅបរទេស ដែលលោកថាត្រូវតែទទួលបានការគាំពារ៖ «រហូតមកទល់ពេលនេះ យើងអត់ទាន់មានវិធានការ ឬចាប់អារម្មណ៍នឹងសាច់រឿង នៃបណ្ដឹងដែលគ្មានភស្តុតាង ឬអង្គហេតុនោះទេ ទី២យើងចាត់ទុកថា ការងារឯកឧត្ដម ហ៊ុន ម៉ាណែត ជាឥស្សរជនដែលទទួលបានអភ័យឯកសិទ្ធិការពារនៅក្នុងច្បាប់អន្តរជាតិ ដូច្នេះយើងមិនចាប់អារម្មណ៍ មិនឲ្យតម្លៃ ហើយយើងចាំមើលៗ តើនីតិវិធីតុលាការវិវត្តយ៉ាងម៉េច ?»។
មេធាវីរបស់សាច់ញាតិមន្ត្រីបក្សប្រឆាំងដែលដាក់ពាក្យប្ដឹងលោក ហ៊ុន ម៉ាណែត ទៅកាន់តុលាការអាមេរិក ឲ្យដឹងថា គេមិនអាចដាក់បណ្ដឹងប្រឆាំងលោក ហ៊ុន ម៉ាណែត និងរដ្ឋាភិបាលដឹកនាំដោយលោក ហ៊ុន សែន ទៅកាន់តុលាការកម្ពុជាបានទេ ដោយសារតែ តុលាការកម្ពុជា មិនឯករាជ្យ ទទួលសំពាធពីលោក ហ៊ុន សែន ដែលមិនអាចស្វែងរកយុត្តិធម៌ ឲ្យជនរងគ្រោះបានឡើយ។
ក្រៅពីទទួលរងនូវការប្តឹងផ្តល់ លោក ហ៊ុន ម៉ាណែត ក៏កំពុងប្រឈមនឹងការធ្វើបាតុកម្មរបស់ ពលរដ្ឋខ្មែរនៅសហរដ្ឋអាមេរិក ប្រឆាំងវត្តមានរបស់លោកជាបន្តបន្ទាប់។ ចំណែកពលរដ្ឋខ្មែរ នៅប្រទេសកាណាដា ក៏គ្រោងធ្វើបាតុកម្មប្រឆាំងរូបលោកផងដែរ។ ពលរដ្ឋខ្មែរនៅឯនាយ សមុទ្រ យល់ថា លោក ហ៊ុន ម៉ាណែត គឺជាសភាវៈអវិជ្ជមាន ដែលវត្តមានរបស់លោក អាចធ្វើឲ្យសហគមន៍ខ្មែរនៅបរទេសបែកបាក់គ្នា។ ពិសេសបំផុតនោះ ដោយសារតែលោក ហ៊ុន ម៉ាណែត គឺជាកូនប្រុសរបស់លោកនាយករដ្ឋមន្ត្រី ហ៊ុន សែន ដែលពលរដ្ឋចោទថាកំពុង ដឹកនាំកម្ពុជាឆ្ពោះទៅរកវិនាសកម្ម និងការរំលោភសិទ្ធិមនុស្សនៅកម្ពុជា។
ទោះជាបែបនេះក្ដី លោក ផៃ ស៊ីផាន ចាត់ទុកបណ្ដឹងនិងការតវ៉ារបស់ពលរដ្ឋខ្មែរប្រឆាំងលោក ហ៊ុន ម៉ាណែត ថាធ្វើឡើងគ្រាន់តែមានគោលដៅប្រមែប្រមូលលុយពីពលរដ្ឋខ្មែរអាមេរិកាំង និងជាការបំបាក់មុខលោក ហ៊ុន ម៉ាណែត និងរដ្ឋាភិបាលកម្ពុជាប៉ុណ្ណោះ។
អ្នកឃ្លាំមើលការអភិវឌ្ឍសង្គម និងនយោបាយនៅកម្ពុជា លោកបណ្ឌិត មាស នី ពន្យល់ថា មូលហេតុជំរុញឲ្យពលរដ្ឋនៅក្រៅប្រទេសតវ៉ាប្រឆាំងរបបដឹកនាំរបស់លោក ហ៊ុន សែន ដោយ សារពួកគេមើលឃើញពីការធ្វើទុក្ខបុកម្នេញ និងការរំលោភសិទ្ធិមនុស្ស របស់រដ្ឋាភិបាល ទៅលើជនរួមជាតិពួកគេនៅក្នុងស្រុកក្នុងពេលកន្លងមក ដែលធ្វើឲ្យពួកគេអស់ជំនឿលើ រដ្ឋាភិបាលរបស់លោក ហ៊ុន សែន។ លោកថា នេះជាសិទ្ធិរបស់ពលរដ្ឋខ្មែរនៅក្រៅប្រទេស ក្នុងការឈឺឆ្អាលពីរឿងរ៉ាវដែលកើតមាននៅក្នុងប្រទេសកំណើត។
លោកបណ្ឌិត មាស នី ក៏សម្ដែងការខកចិត្តចំពោះលោក ហ៊ុន ម៉ាណែត ដែលបណ្ដោយឲ្យ អង្គរក្សរបស់ខ្លួនប្រព្រឹត្តអំពើហិង្សាទៅលើជនបរទេសនៅក្រៅប្រទេស។ លោកបណ្ឌិត មាស នី ថានេះបញ្ជាក់ឲ្យគេឃើញរឹតតែច្បាស់ថា អង្គរក្សរបស់លោក ហ៊ុន ម៉ាណែត មិនមានការអប់រំពីប្រជាធិបតេយ្យឡើយ ហើយគិតថាពួកគេអាចធ្វើអ្វីៗគ្រប់យ៉ាងបានដូចដែលធ្លាប់ ធ្វើនៅកម្ពុជាអញ្ចឹងដែរ៖ «ខ្ញុំគិតថា គេបានដឹងច្បាស់ហើយថា បើប្ដឹងមកតុលាការខ្មែរវាប្រាកដជាមិនបាន ប្រយោជន៍អ្វីទេ សូម្បីករណីពលរដ្ឋខ្មែរទទួលរងនូវអំពើអយុត្តិធម៌ជាបន្តបន្ទាប់ តុលាការខ្មែរ មិនមានសមត្ថភាពរកឲ្យឃើញជនប្រព្រឹត្តបទល្មើសទាំងអស់នោះផង បើប្ដឹងមកក៏ខ្ញុំគិតថា គ្មានប្រយោជន៍អ្វីដែរ គេយកមកធ្វើកំប្លែងលេងនៅស្រុកខ្មែរឥលូវហ្នឹង»។
លោកបណ្ឌិត មាស នី ថ្លែងថា អ្វីៗសុទ្ធតែមានហេតុមានផលរបស់វា។ លោកថាបើគ្មានការ គាបសង្កត់នៅក្នុងស្រុកទេ វាក៏គ្មានបាតុកម្មវ៉ាប្រឆាំងរដ្ឋាភិបាលនៅក្រៅស្រុកនោះដែរ។ លោកថា រដ្ឋាភិបាលគួរបញ្ឈប់នូវការទុក្ខបុកម្នេញលើពលរដ្ឋ និងបក្សប្រឆាំង ពិសេសត្រូវគោរពសិទ្ធិសេរីភាពរបស់ពលរដ្ឋគ្រប់រូប ដោយគ្មានប្រកាន់និន្នាការនយោបាយអ្វីឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។