សាលាឧទ្ធរណ៍សហរដ្ឋអាមេរិក បានតម្កល់សាលក្រមតុលាការថ្នាក់ក្រោម នៅរដ្ឋកាលីហ្វ័រញ៉ា (California) ផ្ដន្ទាទោសឲ្យអតីតប្រធានចលនា ស៊ី.អែហ្វ.អែហ្វ (CFF) លោក ឈុន យ៉ាសិទ្ធ ឲ្យជាប់ពន្ធនាគារអស់មួយជីវិតដោយគ្មានការដោះលែង ដោយដាក់លក្ខខណ្ឌឡើយ។
លោក ឈុន យ៉ាសិទ្ធ ត្រូវបានចាប់ខ្លួនកាលពីឆ្នាំ២០០៥ ពីបទរៀបចំការវាយប្រហារផ្ដួលរំលំរដ្ឋាភិបាលកម្ពុជា ដឹកនាំដោយលោកនាយករដ្ឋមន្ត្រី ហ៊ុន សែន កាលពីខែវិច្ឆិកា ឆ្នាំ២០០០ បណ្ដាលឲ្យមនុស្ស ៨នាក់ស្លាប់ និង ១៤នាក់រងរបួស។
កាលពីថ្ងៃអង្គារ ក្រុមប្រឹក្សាចៅក្រមសាលាឧទ្ធរណ៍ (The Ninth Circuit) រកឃើញថា លោក ឈុន យ៉ាសិទ្ធ មានបំណងចង់សម្លាប់ លោក ហ៊ុន សែន ក្នុងប្រតិបត្តិការភ្នំភ្លើង ប៉ុន្តែនៅក្នុងសវនាការនោះ លោក ឈុន យ៉ាសិទ្ធ បានបដិសេធថា ប្រតិបត្តិការភ្នំភ្លើងរបស់លោក មានបំណងឲ្យមានមនុស្សរងគ្រោះតិចតួច។
ទោះបីជាយ៉ាងណាក៏ដោយ ភស្តុតាងនៅឯសាលាឧទ្ធរណ៍បង្ហាញថា លោក ឈុន យ៉ាសិទ្ធ ពិតជាមានបំណងសម្លាប់មនុស្ស។
ក្នុងលិខិតចំនួន ២៦ទំព័រ របស់ លោក ឈុន យ៉ាសិទ្ធ បានបញ្ជាក្នុងផែនការយោធារបស់លោកថា ត្រូវស្វែងរកអ្នកដែលរស់រានមានជីវិតក្រោយពីការវាយប្រហារ ដើម្បីចាប់ធ្វើជាចំណាប់ខ្មាំង ឬក៏បាញ់សម្លាប់នៅនឹងកន្លែង។ លោក ឈុន យ៉ាសិទ្ធ បន្តថា ការវាយប្រហារកាលពីឆ្នាំ២០០០ សត្រូវរបស់លោកមានសំណាងដែលអាចរស់មានជីវិតបាន ប៉ុន្តែនៅពេលក្រោយ លោកនឹងបញ្ជូនពួកគេទៅនរកទាំងអស់។
ក្នុងសវនាការ ចៅក្រមបដិសេធសំណើ លោក ឈុន យ៉ាសិទ្ធ ឲ្យរួចពីការកាត់ទោស ដោយសារការវាយប្រហាររបស់លោកបណ្ដាលឲ្យជនស្លូតត្រង់មួយចំនួនបានស្លាប់ ហើយការកាត់ទោសលោកឲ្យជាប់ពន្ធនាគារអស់មួយជីវិត ជាការសមហេតុសមផល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។