សង្គម​ស៊ីវិល​ទទូច​ជា​ថ្មី​ឲ្យ​រដ្ឋាភិបាល​ទម្លាក់​ចោល​សេចក្ដី​ព្រាង​ច្បាប់​ឧក្រិដ្ឋកម្ម​អ៊ីនធឺណិត

ដោយ ទីន ហ្សាការីយ៉ា
2015-12-24
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ប៉ា ងួនទៀង ចក់ សុភាព ៦២០
នាយក​មជ្ឈមណ្ឌល​កម្ពុជា ដើម្បី​ប្រព័ន្ធ​ផ្សព្វផ្សាយ​ឯករាជ្យ (CCIM) លោក ប៉ា ងួនទៀង (ឆ្វេង) និង​នាយិកា​មជ្ឈមណ្ឌល​សិទ្ធិ​មនុស្ស​កម្ពុជា (CCHR) អ្នកស្រី ចក់ សុភាព ក្នុង​វេទិកា​ស្ដីពី​ការ​ផ្សារភ្ជាប់​ទំនាក់ទំនង​រវាង​ពលរដ្ឋ​អ្នក​សារព័ត៌មាន អ្នក​សារព័ត៌មាន​វិជ្ជាជីវៈ និង​អ្នក​ការពារ​សិទ្ធិ​មនុស្ស នៅ​ថ្ងៃ​ទី​២៤ ខែ​ធ្នូ ឆ្នាំ​២០១៥។
RFA/Tin Zakariya

សេចក្តី​ព្រាង​ច្បាប់​ស្ដីពី​ឧក្រិដ្ឋកម្ម​លើ​ប្រព័ន្ធ​អ៊ីនធឺណិត នៅ​តែ​មាន​ភាព​ចម្រូងចម្រាស និង​ជា​ក្ដី​ព្រួយ​បារម្ភ​របស់​អង្គការ​សង្គម​ស៊ីវិល ដែល​ធ្វើ​ការ​ទាក់ទង​នឹង​ការ​ការពារ​សិទ្ធិ​មនុស្ស និង​អ្នក​ធ្វើ​ការ​លើ​ប្រព័ន្ធ​ផ្សព្វផ្សាយ។ ក្រុម​សង្គម​ស៊ីវិល​លើក​ឡើង​ថា សេចក្ដី​ព្រាង​ច្បាប់​នេះ គឺ​ជា​ការ​រឹត​ត្បិត​ដល់​សិទ្ធិ​បញ្ចេញ​មតិ និង​ជា​ការ​គំរាម​កំហែង​ដល់​អ្នក​ប្រើប្រាស់​ប្រព័ន្ធ​បច្ចេកវិទ្យា។

ឆ្លើយ​តប​នឹង​ការ​ព្រួយ​បារម្ភ​នេះ មន្ត្រី​ជាន់​ខ្ពស់​ក្រសួង​ប្រៃសណីយ៍ និង​ទូរគមនាគមន៍ បែរ​ជា​លើក​ឡើង​ថា ក្រសួង​មិន​ទាន់​បាន​រៀបចំ​ធ្វើ​សេចក្ដី​ព្រាង​ច្បាប់​នេះ​ជា​ផ្លូវ​ការ​នៅ​ឡើយ។

ក្រុម​មន្ត្រី​អង្គការ​សង្គម​ស៊ីវិល ស្នើ​ឲ្យ​រដ្ឋាភិបាល​លុប​ចោល​សេចក្ដី​ព្រាង​ច្បាប់​ស្ដីពី​ឧក្រិដ្ឋកម្ម​លើ​ប្រព័ន្ធ​អ៊ីនធឺណិត ព្រោះ​ថា សេចក្ដី​ព្រាង​ច្បាប់​នេះ​ជា​ការ​រឹត​បន្តឹង​ក្នុង​ការ​បញ្ចេញ​មតិ និង​ការ​ប្រើប្រាស់​អ៊ីនធឺណិត។

នាយិកា​មជ្ឈមណ្ឌល​សិទ្ធិ​មនុស្ស​កម្ពុជា (CCHR) អ្នកស្រី ចក់ សុភាព មាន​ប្រសាសន៍​ថា ប្រព័ន្ធ​បច្ចេកវិទ្យា ឬ​អ៊ីនធឺណិត ជា​មធ្យោបាយ​ដ៏​សំខាន់​សម្រាប់​ឲ្យ​ប្រជាពលរដ្ឋ​ចែក​រំលែក​ព័ត៌មាន និង​ស្វែងរក​ព័ត៌មាន​ពី​គ្រប់​ទិសទី ប៉ុន្តែ​រដ្ឋាភិបាល​ធ្វើ​សេចក្ដី​ព្រាង​ច្បាប់​ស្ដីពី​ឧក្រិដ្ឋកម្ម​លើ​ប្រព័ន្ធ​អ៊ីនធឺណិត​នោះ នឹង​ធ្វើ​ឲ្យ​ប៉ះពាល់​ដំណើរ​ការ​ប្រជាធិបតេយ្យ៖ «ប្រទេស​មួយ​ចំនួន​គេ​បាន​ដាក់​បញ្ញត្តិ​ទៅ​លើ​ប្រព័ន្ធ​អ៊ីនធឺណិត​នេះ​មែន តែ​ជាទូទៅ​គេ​គ្រាន់​តែ​ដាក់​ជា​យន្តការ​ទេ ដើម្បី​ឲ្យ​មាន​ភាព​ច្បាស់លាស់​ថា ឥឡូវ​នៅ​ពេល​មាន​ករណី​ណា​មួយ​មាន​គេហទំព័រ​ប៉ះពាល់​លើ​អ្នក​ដទៃ​ហ្នឹង គេ​មាន​គណៈកម្មការ​គេ​មួយ​ដើម្បី​ត្រួត​ពិនិត្យ គេ​មាន​អ្នក​ឯកទេស​មើល​ថា តើ​ត្រឹមត្រូវ​អត់?»

ការ​លើក​ឡើង​បែប​នេះ​នៅ​ក្នុង​វេទិកា​ស្ដីពី​ការ​ផ្សារភ្ជាប់​ទំនាក់ទំនង​រវាង​ពលរដ្ឋ​អ្នក​សារព័ត៌មាន អ្នក​សារព័ត៌មាន​វិជ្ជាជីវៈ និង​អ្នក​ការពារ​សិទ្ធិ​មនុស្ស ដែល​រៀបចំ​ឡើង​ដោយ​មជ្ឈមណ្ឌល​ដើម្បី​ប្រព័ន្ធ​ផ្សព្វផ្សាយ​ឯករាជ្យ ហៅ​កាត់​ថា ស៊ី.ស៊ី.អាយ.អឹម (CCIM) នៅ​ថ្ងៃ​ទី​២៤ ធ្នូ។

នាយក​មជ្ឈមណ្ឌល​កម្ពុជា ដើម្បី​ប្រព័ន្ធ​ផ្សព្វផ្សាយ​ឯករាជ្យ លោក ប៉ា ងួនទៀង មាន​ប្រសាសន៍​ថា បច្ចុប្បន្ន​នេះ ការ​ប្រើប្រាស់​ប្រព័ន្ធ​អ៊ីនធឺណិត​កំពុង​រីក​រាល​ដាល​នៅ​ទូទាំង​ប្រទេស ហើយ​ប្រជាពលរដ្ឋ​សប្បាយ​ក្នុង​ការ​ចែក​រំលែក​ព័ត៌មាន និង​ទទួល​ព័ត៌មាន​តាម​រយៈ​ប្រព័ន្ធ​បច្ចេកវិទ្យា​ទំនើប​នេះ។ បញ្ហា​នេះ លោក​បញ្ជាក់​ថា បើ​សិន​ជា​រដ្ឋាភិបាល​ដក​សិទ្ធិ​ប្រជាពលរដ្ឋ​វិញ ដោយ​រឹត​ត្បិត​ការ​ប្រើប្រាស់​អ៊ីនធឺណិត​នេះ រដ្ឋាភិបាល​នឹង​ប្រឈម​នឹង​ប្រជាពលរដ្ឋ៖ «ទោះ​បី​ជា​មាន​ច្បាប់ ឬ​មិន​មាន​ក៏ដោយ ផល​ប៉ះពាល់​នឹង​មាន ប៉ុន្តែ​ខ្ញុំ​មិន​ជឿ​ថា រដ្ឋាភិបាល​បិទ​សេរីភាព​ក្នុង​ការ​បញ្ចេញ​មតិ​តាម​រយៈ​អ៊ីនធឺណិត​នេះ​បាន​ទេ ធម្មតា​យើង​មើល​បទពិសោធន៍​ពិភពលោក លុះត្រា​តែ​ប្រទេស​នោះ​ផ្លាស់ប្ដូរ​របប​តាម​រយៈ​សង្គ្រាម ព្រោះ​ថា សេរីភាព​ប្រៀប​ដូច​នំ​អ៊ីចឹង កាល​ណា​ឲ្យ​នំ​គេ​ហូប​ហើយ មិន​អាច​ដក​វិញ​បាន​ទេ»

អ្នក​នាំ​ពាក្យ​ក្រសួង​ប្រៃសណីយ៍ និង​ទូរគមនាគមន៍ លោក ហ៊ុន សារឿន មាន​ប្រសាសន៍​ថា សេចក្ដី​ព្រាង​ច្បាប់​ស្ដីពី​ឧក្រិដ្ឋកម្ម​លើ​ប្រព័ន្ធ​អ៊ីនធឺណិត​នេះ ក្រសួង​មិន​ទាន់​បាន​ធ្វើ​នៅ​ឡើយ។ លោក​បញ្ជាក់​ថា កន្លង​មក ក្រសួង​បាន​ត្រឹម​តែ​ផ្គុំ​ឯកសារ​តែ​ប៉ុណ្ណោះ តែ​មក​ទល់​ពេល​នេះ មិន​ទាន់​មាន​គោលការណ៍​ណែនាំ​ពី​រដ្ឋាភិបាល​ឲ្យ​បន្ត​ធ្វើ​សេចក្ដី​ព្រាង​ច្បាប់​នេះ​ទេ៖ «គឺ​ឋិត​នៅ​ក្នុង​ផ្គុំ​ឯកសារ ពី​មុន​ធ្លាប់​មាន​ការ​ផ្គុំ​ឯកសារ។ តែ​ឥឡូវ​នេះ មិន​ទាន់​មាន​ដំណើរ​អី​ទាំងអស់ ឯកសារ​ដែល​ផ្គុំ​ហ្នឹង​ក៏​មិន​មាន​យក​មក​តាក់​តែង​អ្វី​ទាំងអស់»

កាល​ពី​ខែ​វិច្ឆិកា អង្គការ ហ្វ្រីដឹម ហៅស៍ (Freedom House) បាន​ដាក់​ចំណាត់​ថ្នាក់​ប្រទេស​កម្ពុជា សម្រាប់​សេរីភាព​ប្រើប្រាស់​ប្រព័ន្ធ​អ៊ីនធឺណិត (Internet) ឆ្នាំ​នេះ ទាប​ជាង​ឆ្នាំ​២០១៤។ អង្គការ ហ្វ្រីដឹម ហៅស៍ កត់​សម្គាល់​ការ​វិវឌ្ឍ​ជា​គន្លឹះ ៤​ចំណុច ដែល​អាច​ជា​កត្តា​គំរាម​កំហែង​ដល់​សេរីភាព​ប្រើប្រាស់​ប្រព័ន្ធ​អ៊ីនធឺណិត​ចន្លោះ​ឆ្នាំ​២០១៤ ដល់​ឆ្នាំ​២០១៥។ កត្តា​ទាំង​នោះ គឺ​សេចក្ដី​ស្នើ​ច្បាប់ ការ​បង្កើត​យន្តការ​សម្រាប់​ដាក់​កំហិត ចាប់​កំហុស​បរិហារ​កេរ្តិ៍ និង​ច្រោះ​ព័ត៌មាន​តាម​ប្រព័ន្ធ​អ៊ីនធឺណិត។

ក្រុម​អង្គការ​សង្គម​ស៊ីវិល ស្នើ​ឲ្យ​ទម្លាក់​ចោល​សេចក្ដី​ស្នើ​ច្បាប់​បែប​នេះ ដោយសារ​តែ​កាល​ពី​ពេល​ថ្មីៗ​នេះ តុលាការ​បាន​ចាប់​យុវជន គង់ រ៉ៃយ៉ា ដែល​ត្រូវ​បាន​ចោទ​ប្រកាន់​ពី​បទ​ញុះញង់​ឲ្យ​ប្រព្រឹត្ត​បទ​ឧក្រិដ្ឋ ក្រោយ​ពេល​ដែល​យុវជន​រូប​នេះ​សរសេរ​អំពី​បដិវត្តន៍​ពណ៌​នៅ​ក្នុង​ទំព័រ​ហ្វេសប៊ុក (Facebook) របស់​ខ្លួន។ ករណី​ដោយឡែក​មួយ​ទៀត គឺ​សមាជិក​ព្រឹទ្ធសភា លោក ហុង សុខហួរ រួម​ទាំង លោក សម រង្ស៊ី ប្រធាន​គណបក្ស​ប្រឆាំង​ផង ត្រូវ​បាន​តុលាការ​ចោទ​ពី​បទ​ក្លែង​ឯកសារ​សាធារណៈ បទ​ប្រើប្រាស់​ឯកសារ​ក្លែង បទ​ញុះញង់​ឲ្យ​មាន​ភាព​វឹកវរ និង​អសន្តិសុខ​សង្គម ក្រោយ​ពេល​ដែល​លោក​បង្ហោះ​សំណៅ​ឯកសារ​មិន​ត្រឹមត្រូវ នៃ​សន្ធិសញ្ញា​ព្រំដែន​កម្ពុជា-វៀតណាម ឆ្នាំ​១៩៧៩៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (1)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

Hun Sen wants to combat human right.

Dec 26, 2015 03:08 AM

គេហទំព័រ​ទាំងមូល