ព្រះរាជអាជ្ញា​ទម្លាក់​បទ​ចោទ​មួយ​ករណី​លើ​សកម្មជន​ការពារ​បរិស្ថាន​នៅ​ខេត្ត​កោះកុង

ដោយ ប្រាជ្ញ ចេវ
2016-02-17
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
លោក វ៉ែន វ៉ន តំណាង​សហគមន៍​ជនជាតិ​ជង នៅ​តំបន់​អារ៉ែង ផ្ដល់​បទ​សម្ភាសន៍​ដល់​វិទ្យុ​អាស៊ីសេរី នៅ​មុខ​ផ្ទះ​សហគមន៍ នៅ​តំបន់​អារ៉ែង ស្ថិត​ក្នុង​ស្រុក​ថ្មបាំង ខេត្ត​កោះកុង កាល​ពី​ថ្ងៃ​ទី៦ ខែ​មីនា ឆ្នាំ​២០១៥។
លោក វ៉ែន វ៉ន តំណាង​សហគមន៍​ជនជាតិ​ជង នៅ​តំបន់​អារ៉ែង ផ្ដល់​បទ​សម្ភាសន៍​ដល់​វិទ្យុ​អាស៊ីសេរី នៅ​មុខ​ផ្ទះ​សហគមន៍ នៅ​តំបន់​អារ៉ែង ស្ថិត​ក្នុង​ស្រុក​ថ្មបាំង ខេត្ត​កោះកុង កាល​ពី​ថ្ងៃ​ទី៦ ខែ​មីនា ឆ្នាំ​២០១៥។
RFA/Rann Samnang

ព្រះរាជអាជ្ញា​រង​អម​សាលា​ដំបូង​ខេត្ត​កោះកុង បាន​សម្រេច​ទម្លាក់​បទ​ចោទ​មួយ​ក្នុង​ចំណោម​ពីរ​ករណី លើ​សកម្មជន​ការពារ​បរិស្ថាន លោក វ៉ែន វ៉ន ដែល​ជា​ជនជាតិ​ដើម​ភាគ​តិច​ជង។ មេធាវី​ការពារ​ជន​ជាប់​ចោទ និង​សង្គម​ស៊ីវិល ស្នើ​ទៅ​តុលាការ​ឲ្យ​ទម្លាក់​បទ​ចោទ​ទាំង​ពីរ​ករណី​នេះ​ចោល ព្រោះ​ថា សកម្មជន​ការពារ​បរិស្ថាន​រូប​នេះ​មិន​បាន​ប្រព្រឹត្ត​ខុស​ដូច​ការ​ចោទ​ប្រកាន់​ឡើយ។

នៅ​ថ្ងៃ​ទី​៣ ខែ​មីនា ខាង​មុខ សាលា​ដំបូង​ខេត្ត​កោះកុង នឹង​ប្រកាស​សាលក្រម​ថា តើ​វាសនា​របស់​សកម្មជន​ការពារ​បរិស្ថាន គឺ​លោក វ៉ែន វ៉ន នឹង​ត្រូវ​ដេក​គុក​បន្ត ឬ​ទទួល​បាន​សេរីភាព​ឡើង​វិញ?

សវនាការ​សួរ​ដេញដោល​ពេញ​មួយ​ព្រឹក​ថ្ងៃ​ទី​១៧ ខែ​កុម្ភៈ ដែល​មាន​វត្តមាន​ជន​ជាប់​ចោទ លោក វ៉ែន វ៉ន ក្នុង​សម្លៀកបំពាក់​ឈុត​ពណ៌​ទឹក​ក្រូច ដៃ​ជាប់​ខ្នោះ ចូលរួម​ដែរ​នោះ គឺ​ទាក់ទង​ករណី​ប្រមូល​ផល​អនុផល​ព្រៃ​ឈើ​ដោយ​គ្មាន​ការ​អនុញ្ញាត និង​បទល្មើស​លុប​បំបាត់​វត្ថុ​តាង ទាក់ទង​ការ​សាងសង់​ទីស្នាក់ការ​សហគមន៍​នៅ​តំបន់​អារ៉ែង។

ព្រះរាជអាជ្ញា​រង​សាលា​ដំបូង​ខេត្ត​កោះកុង លោក អ៊ីវ ត្រាយ ឲ្យ​វិទ្យុ​អាស៊ីសេរី ដឹង​តាម​ទូរស័ព្ទ​ក្រោយ​បញ្ចប់​ការ​ជំនុំ​ជម្រះ​ថា មូលហេតុ​ដែល​លោក​ទម្លាក់​បទ​ចោទ​មួយ​ករណី​ចោល ព្រោះ​លក្ខខណ្ឌ​ផ្លូវ​ច្បាប់​មិន​គ្រប់គ្រាន់​ឲ្យ​ចោទ​ប្រកាន់​ពី​បទ​លុប​បំបាត់​ភស្តុតាង។ ដូច្នេះ លោក​ត្រូវ​ទម្លាក់​បទ​ចោទ​នេះ​ចោល។ លោក​បន្ត​ថា តុលាការ​សម្រេច​យ៉ាង​នោះ គឺ​ជា​ឆន្ទានុសិទ្ធិ​របស់​ចៅក្រម ដែល​ប្រកាស​សាលក្រម​នា​ពេល​ខាង​មុខ៖ «ករណី​នេះ ខ្ញុំ​អត់​អាច​ឆ្លើយ​បាន​ទេ។ ខ្ញុំ​រង់ចាំ​ការ​ប្រកាស​សាលក្រម​សិន ប្រសិន​បើ​ចៅក្រម​យក​តាម​មាត្រា​៩៨ មក​ផ្ដន្ទាទោស ទណ្ឌកម្ម​នឹង​ទទួល​ដូច​មាត្រា​នោះ»

លោក វ៉ែន វ៉ន ជា​សកម្មជន​ការពារ​បរិស្ថាន និង​ជា​សមាជិក​ក្រុមប្រឹក្សា​ឃុំ ត្រូវ​បាន​តុលាការ​ចាប់​ខ្លួន និង​បញ្ជូន​ទៅ​ពន្ធនាគារ​ខេត្ត​កោះកុង កាល​ពី​ថ្ងៃ​ទី​៧ ខែ​តុលា ឆ្នាំ​២០១៥។ កាល​ពី​ថ្ងៃ​ទី​១៦ ខែ​កុម្ភៈ មជ្ឈមណ្ឌល​សិទ្ធិ​មនុស្ស​កម្ពុជា ហៅ​កាត់​ថា ស៊ី.ស៊ី.អេច្ឆ.(CCHR) ចេញ​ការ​វិភាគ​ផ្លូវ​ច្បាប់​អំពី​ការ​ចោទ​ប្រកាន់ និង​ការ​ឃុំ​ខ្លួន លោក វ៉ែន វ៉ន ថា​ជា​ការ​បំពាន​សិទ្ធិ និង​ល្មើស​ច្បាប់​ជាតិ និង​អន្តរជាតិ។

ប្រធាន​ក្រុម​មេធាវី​សំរិទ្ធ​ដែល​ការពារ​ក្តី លោក វ៉ែន វ៉ន គឺ​អ្នកស្រី អ៊ិត មធុរា ទាមទារ​ឲ្យ​តុលាការ​ទម្លាក់​គ្រប់​បទ​ចោទ​លើ​កូន​ក្តី​របស់​អ្នកស្រី។ អ្នកស្រី​អះអាង​ថា ផ្អែក​លើ​អង្គ​ហេតុ ភស្តុតាង និង​ផ្លូវ​ច្បាប់ លោក វ៉ែន វ៉ន គ្មាន​ទោស​នោះ​ទេ ព្រោះ​សកម្មភាព​ធ្វើ​ផ្ទះ​សហគមន៍​ជា​ប្រយោជន៍​ដល់​សហគមន៍​ទាំង​មូល ហើយ​ទទួល​បាន​ការ​អនុញ្ញាត​ពី​អភិបាល​ស្រុក​អារ៉ែង៖ «យើង​មើល​មាត្រា​២៤ នៃ​ច្បាប់​ព្រៃ​ឈើ គឺ​បាន​ចែង​ច្បាស់​ណាស់ បើ​សិន​ប្រមូល​ផល​អនុផល​ព្រៃ​ឈើ​ដើម្បី​ធ្វើ​ពាណិជ្ជកម្ម ត្រូវ​សុំ​ការ​អនុញ្ញាត​ពី​រដ្ឋបាល​ព្រៃ​ឈើ ប៉ុន្តែ​ប្រមូល​ផល​អនុផល​ព្រៃ​ឈើ​សម្រាប់​ប្រើប្រាស់​ក្នុង​ជីវភាព​ក្នុង​សហគមន៍ មិន​បាច់​សុំ​ការ​អនុញ្ញាត​ពី​រដ្ឋបាល​ព្រៃ​ឈើ​ទេ»

ជា​រឿង​ចៃដន្យ​មួយ ខណៈ​តុលាការ​ចោទ​ប្រកាន់​សកម្មជន​ការពារ​ព្រៃ​ឈើ​នៅ​ពេល​នេះ សាកលវិទ្យាល័យ​មួយ​នៅ​ភ្នំពេញ ផ្តល់​សញ្ញាបត្រ​បណ្ឌិត​កិត្តិយស​ឲ្យ​ថៅកែ​កាប់​ព្រៃ​ឈើ ទ្រី ភាព ដែល​ត្រូវ​បាន​រង​ការ​ចោទ​ប្រកាន់​ថា ជា​អ្នក​បំផ្លាញ​ព្រៃ​ឈើ​នៅ​កម្ពុជា។ ការ​ផ្តល់​សញ្ញាបត្រ​ឲ្យ លោក ទ្រី ភាព ពេល​នេះ ត្រូវ​បាន​សាធារណជន និង​អ្នក​ប្រើប្រាស់​បណ្ដាញ​សង្គម​ហ្វេសប៊ុក (Facebook) រិះគន់ និង​សម្ដែង​ការ​សោកស្ដាយ និង​ថា​ជា​ការ​លើក​ទឹក​ចិត្ត​ដល់​អ្នក​បំផ្លាញ​ព្រៃ​ឈើ។

មន្ត្រី​សម្រប​សម្រួល​នៃ​អង្គការ​សិទ្ធិ​មនុស្ស​លីកាដូ (LICADHO) ប្រចាំ​ខេត្ត​កោះកុង លោក អ៊ិន គង់ជិត យល់​ថា ការ​លើក​ទឹក​ចិត្ត​ដល់​អ្នក​កាប់​ព្រៃ​ឈើ ប៉ុន្តែ​ដាក់​ទោស​ទណ្ឌ​សកម្មជន​ការពារ​ព្រៃ​ឈើ​បែប​នេះ នឹង​ធ្វើ​ឲ្យ​ព្រៃ​ឈើ​របស់​កម្ពុជា វិនាសកម្ម។ មន្ត្រី​សង្គម​ស៊ីវិល​រូប​នេះ ស្នើ​ទៅ​រដ្ឋាភិបាល ឬ​ស្ថាប័ន​ពាក់ព័ន្ធ គិតគូរ​ឡើង​វិញ​លើ​រឿង​នេះ៖ «សកម្មជន​ដែល​ការពារ​បរិស្ថាន​មិន​បាន​ផ្តល់​ប្រយោជន៍​អ្នក​ដឹក​នាំ អ្នក​កាន់​អំណាច​ទេ ប៉ុន្តែ​មាន​តែ​អ្នក​ឧកញ៉ា​ទេ​ដែល​ផ្តល់​ផល​ប្រយោជន៍។ ចឹង​ទៅ​អ្នក​ការពារ​ធនធាន​ធម្មជាតិ គឺ​រងគ្រោះ​បែប​នេះ»

បើ​តាម​មេធាវី​ការពារ​ក្តី​របស់ លោក វ៉ែន វ៉ន អ្នកស្រី អ៊ិត មធុរា ថា ប្រសិន​តុលាការ​ចោទ​ប្រកាន់ លោក វ៉ែន វ៉ន ករណី​ប្រមូល​ផល​អនុផល​ព្រៃ​ឈើ​ដោយ​គ្មាន​ការ​អនុញ្ញាត ដូច​ដែល​ព្រះរាជអាជ្ញា​ចោទ​ប្រកាន់​នោះ នឹង​ត្រូវ​ជាប់​ពន្ធនាគារ​ពី ១​ឆ្នាំ​ទៅ ៥​ឆ្នាំ និង​ពិន័យ​ជា​ប្រាក់​ពី ១០​លាន​រៀល​ទៅ ១០០​លាន​រៀល។ ប៉ុន្តែ​ក្នុង​ករណី​តុលាការ​បន្ត​ចោទ​ប្រកាន់​បទល្មើស​លុប​បំបាត់​វត្ថុ​តាង លោក វ៉ែន វ៉ន នឹង​ត្រូវ​ជាប់​ពន្ធនាគារ​ពី ១​ឆ្នាំ​ទៅ ៣​ឆ្នាំ និង​ពិន័យ​ជា​ប្រាក់​ពី ២​លាន​រៀល​ទៅ ៦​លាន​រៀល។ មេធាវី​ការពារ​ជន​ជាប់​ចោទ​សង្ឃឹម​ថា តុលាការ​នឹង​ទម្លាក់​ចោល​គ្រប់​បទ​ចោទ​ទាំងអស់ ប្រសិន​បើ​តុលាការ​កាត់​ក្តី​តាម​វិជ្ជាជីវៈ​របស់​ខ្លួន និង​មិន​ស្ថិត​ក្រោម​គំនាប​របស់​អ្នក​ណា​ម្នាក់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (1)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

ក្នុងសម័យ ឆ្កួតអំណាច ហ៊ុន សែន អ្នកការពារ បរិស្ថាន មានទោស អ្នកបំផ្លាញបរិស្ថាន ធ្វើអ្នកមាន មានបុណ្យស័ក្ត !

Feb 17, 2016 10:06 PM

គេហទំព័រ​ទាំងមូល