ក្រុមប្រឹក្សាជំនុំជម្រះសាលាដំបូងខេត្តកំពង់ឆ្នាំង លើកយកសំណុំរឿងឃាតកម្មគិតទុកជាមុន ដែលប្រព្រឹត្តទៅលើអ្នកកាសែតមាគ៌ាកម្ពុជា លោក សួន ចាន់ មកជំនុំជម្រះដោយគ្មានវត្តមានជនជាប់ចោទ នៅព្រឹកថ្ងៃទី៧ ខែតុលា។
បន្ទាប់ពីបើកសវនាការសួរដេញដោលជាងពីរម៉ោង ប្រធានក្រុមប្រឹក្សាជំនុំជម្រះ លោកចៅក្រម សាន សុផាត សម្រេចលើកពេលប្រកាសសាលក្រមទៅព្រឹកថ្ងៃទី១១ ខែវិច្ឆិកា ឆ្នាំ២០១៤។
ចៅក្រម និងតំណាងអយ្យការ បានបន្តនីតិវិធីដោយចោទសួរសំខាន់តែទៅលើក្រុមគ្រួសារជនរងគ្រោះ ឪពុកម្ដាយជនជាប់ចោទ និងសាក្សីមួយចំនួនទៀត។ ចៅក្រមប្រកាសថា ការអវត្តមានជនជាប់ចោទទាំង ៦នាក់ក្នុងសំណុំរឿងនេះក្នុងបន្ទប់សវនាការ គឺដោយសារពួកគេមានដីកាតាមចាប់ខ្លួន។
នៅអំឡុងពេលនៃដំណើរការសវនាការ កូនរបស់ លោក សួន ចាន់ ដែលជាសាក្សីដាក់បន្ទុក បានឆ្លើយចំៗឈ្មោះជនជាប់ចោទ។ ចំណែកសាក្សីដោះបន្ទុក ហាក់មិនច្បាស់លាស់ និងឆ្លើយមិនស៊ីសង្វាក់ទៅនឹងអង្គហេតុ ដែលកើតឡើងលើ លោក សួន ចាន់។
តំណាងអយ្យការ លោក ឯក ស៊ុនរស្មី បានលើកឡើងនៅក្នុងសេចក្ដីសន្និដ្ឋាន និងសំណូមពរចុងក្រោយរបស់លោកដល់ចៅក្រមជំនុំជម្រះថា លោកមានការកោតសរសើរចំពោះ លោក សួន ចាន់ ដែលមានភាពក្លាហាន និងព្យាយាមផ្សព្វផ្សាយព័ត៌មានទាក់ទងនឹងបទល្មើសនេសាទ។ លោកបន្តថា ការស្លាប់របស់ លោក សួន ចាន់ គឺអាចមកពីលោកជាអ្នកកាសែត និងជាឆ្អឹងទទឹងករបស់ក្រុមអ្នករកស៊ីនេសាទខុសច្បាប់នៅក្នុងមូលដ្ឋាន ជាពិសេសជាមួយជនជាប់ចោទ។ ដូច្នេះ លោកស្នើឲ្យចៅក្រម ពិចារណា និងតាមចាប់ខ្លួនជនល្មើសមកផ្ដន្ទាទោសឲ្យបានឆាប់។
ចំណែកមេធាវីការពារសិទ្ធិឲ្យជនជាប់ចោទ ក៏បានលើកសេចក្ដីសន្និដ្ឋាន និងសំណូមពរដល់ចៅក្រមដែរ គឺសូមឲ្យលើកលែងការចោទប្រកាន់ជនជាប់ចោទចំនួនពីរនាក់ ក្នុងចំណោម៦នាក់ គឺឈ្មោះ យីម នុន និងយីម ណាក់ ដោយលោកយល់ថា ចម្លើយដាក់បន្ទុកលើអ្នកទាំងពីរ គឺស្ថិតនៅក្នុងវិមតិសង្ស័យ ខណៈដែលឪពុកជនជាប់ចោទម្នាក់ក្នុងចំណោមនោះអះអាងថា ជនជាប់ចោទទាំង ៦នាក់ គឺពុំមានជាប់ពាក់ព័ន្ធនឹងការសម្លាប់ លោក សួន ចាន់ នោះទេ។
មន្ត្រីសម្របសម្រួលអង្គការសិទ្ធិមនុស្សលីកាដូ (Licadho) ប្រចាំខេត្តកំពង់ឆ្នាំង លោក គង់ ច័ន្ទមុនី ថ្លែងគាំទ្រការលើកឡើងរបស់តំណាងអយ្យការនេះ។ លោកស្នើឲ្យចៅក្រម ពិចារណា និងធ្វើការសម្រេចសេចក្ដីប្រកបដោយភាពយុត្តិធម៌ ដើម្បីផ្ដល់យុត្តិធម៌ជូនក្រុមគ្រួសារជនរងគ្រោះដែលស្លាប់៖ «ក្នុងនាមសង្គមស៊ីវិល យើងសូមទទូចឲ្យក្រុមប្រឹក្សាអង្គជំនុំជម្រះ ពិចារណាទៅលើការសន្និដ្ឋានរបស់តំណាងអយ្យការតាមមាត្រា២០០ នៅថ្ងៃទី១១ ខែវិច្ឆិកា ឆ្នាំ២០១៤ (ខាងមុខ)។ យើងសង្ឃឹមថា ផ្ដល់យុត្តិធម៌ជូនដល់ជនរងគ្រោះ»។
កាលពីយប់ថ្ងៃទី៣១ ខែមករា ឆ្នាំ២០១៤ ក្រុមជនល្មើសមានគ្នាប្រហែល ១០នាក់ ព្រួតគ្នាវាយសម្លាប់ លោក សួន ចាន់ អ្នកកាសែតមាគ៌ាកម្ពុជា នៅតាមផ្លូវក្បែរផ្ទះរបស់គាត់ ស្ថិតនៅភូមិក្បាលកន្លង់ ឃុំពាមឆ្កោក ស្រុកជលគីរី ខេត្តកំពង់ឆ្នាំង។ នៅក្នុងហេតុការណ៍នោះ មានសាច់ញាតិរបស់លោកចំនួនពីរនាក់ទៀត គឺឈ្មោះ គូ អ៊ិន និងឈ្មោះ សួន ឌីម ក៏ត្រូវជនល្មើសវាយឲ្យរងរបួសធ្ងន់ដែរ នៅពេលចូលទៅជួយ លោក សួន ចាន់។
ក្នុងវ័យជាង ២០ឆ្នាំ ជាកូនប្រុសរបស់ លោក សួន ចាន់ គឺលោក ដុស ជីម ថ្លែងបញ្ជាក់ថា ខ្លួនក៏ជាអ្នកដែលបានចូលទៅជួយឪពុកម្នាក់ដែរ ហើយឃើញជនល្មើស ៤នាក់ក្នុងចំណោម ៦នាក់ គឺទី១ឈ្មោះ រ៉ុម រ៉ា ទី២ឈ្មោះ សាំង សេងអៀង ទី៣ឈ្មោះ យីម នុន និងទី៤ឈ្មោះ យីម ណាក់ កំពុងព្រួតគ្នាវាយឪពុករបស់ខ្លួនដោយដំបងគ្រប់ដៃ។ បច្ចុប្បន្ន លោកបារម្ភអំពីសុវត្ថិភាពផ្ទាល់ខ្លួន និងក្រុមគ្រួសារ ខណៈដែលខាងតុលាការ និងសមត្ថកិច្ច មិនទាន់តាមចាប់ខ្លួនជនល្មើសបាន៖ «សូមសំណូមពរឲ្យតុលាការជួយរកខុសត្រូវ ហើយចាប់វាផ្ដន្ទាទោសតាមផ្លូវច្បាប់ កុំឲ្យពុកខ្ញុំខូចទៅអសារបង់។ ខ្ញុំទៅរក (ដាក់មង) អីពិបាកអត់មានអ្នកនៅផ្ទះ រកអត់បានទៀតឆ្នាំនេះ រកអង្ករគេហូបអត់ចង់បានទេឥឡូវ»។
តំណាងអយ្យការនៃសាលាដំបូងខេត្តកំពង់ឆ្នាំង សម្រេចចោទជនសង្ស័យចំនួន ៦នាក់ ពីបទហិង្សាបណ្ដាលឲ្យជនរងគ្រោះស្លាប់ ប៉ុន្តែមកដល់ចៅក្រមស៊ើបសួរ បានដូរបទចោទមកឃាតកម្មគិតទុកជាមុន។ ប្រសិនបើតុលាការរកឃើញកំហុសដូចបទចោទប្រកាន់ តាមមាត្រ២០០ នៃក្រមព្រហ្មទណ្ឌ ជនសង្ស័យទាំង ៦នាក់ អាចប្រឈមនឹងការផ្ដន្ទាទោសដាក់ពន្ធនាគារអស់មួយជីវិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។