តុលាការខែត្រក្រចេះឃុំខ្លួនមន្ត្រីអង្គការម្នាក់និងពលរដ្ឋ៤នាក់ករណីឃាត់ឡានដឹកឈើ
2017.02.14
មន្ត្រីនៃអង្គការមិនមែនរដ្ឋាភិបាលមួយរូប និងពលរដ្ឋ ៤នាក់ ត្រូវបានសាលាដំបូងខែត្រក្រចេះ សម្រេចឃុំខ្លួនបណ្ដោះអាសន្ន បន្ទាប់ពីពួកគេបានឃាត់រថយន្តដឹកឈើមករក្សាទុក ដោយមិនបានផ្តល់ព័ត៌មានទៅមន្ត្រីរដ្ឋបាលព្រៃឈើជាមុន និងសង្ស័យថាជំរិតទារប្រាក់ពីម្ចាស់រថយន្តដឹកឈើ។
ការចោទប្រកាន់នេះ ក្រោយពីមានពាក្យបណ្ដឹងរបស់មន្ត្រីរដ្ឋបាលព្រៃឈើ និងម្ចាស់រថយន្តដឹកឈើទៅតំណាងអយ្យការខែត្រក្រចេះ កាលពីថ្ងៃទី៧ ខែកុម្ភៈ។
មន្ត្រីឃ្លាំមើលបញ្ហាព្រៃឈើនៃសមាគមអាដហុក (ADHOC) ខែត្រក្រចេះ ឲ្យដឹងនៅថ្ងៃទី១៤ កុម្ភៈ ថា មន្ត្រីសង្គមស៊ីវិលមួយរូបមកពីអង្គការការពារបរិស្ថាន និងសិទ្ធិពលរដ្ឋ និងពលរដ្ឋ ៤នាក់ផ្សេងទៀតរស់នៅស្រុកសំបូរ ខែត្រក្រចេះ ត្រូវបានសាលាដំបូងខែត្រនេះសម្រេចឃុំខ្លួន ក្រោមបទចោទកំហែងយក និងបង្កើតឲ្យមានក្រុមប្រដាប់អាវុធ។
មន្ត្រីស៊ើបអង្កេតនៃសមាគមអាដហុក ខែត្រក្រចេះ លោក ប៊ី សុវណ្ណនី បង្ហាញជំហរថា លោកគាំទ្រចំពោះការអនុវត្តច្បាប់របស់ស្ថាប័នអយ្យការខែត្រក្រចេះ និងអាជ្ញាធរពាក់ព័ន្ធទាក់ទិនបទល្មើសព្រៃឈើ តែលោកស្នើឲ្យការអនុវត្តច្បាប់មានតម្លាភាព ដ្បិតសកម្មភាពដឹកជញ្ជូនឈើនៅខែត្រក្រចេះ កើតមានគគ្រឹកគគ្រេងច្រើនឆ្នាំកន្លងទៅ លោកកម្រឃើញស្ថាប័នអយ្យការ និងមន្ត្រីរដ្ឋបាលព្រៃឈើបំពេញកាតព្វកិច្ចផ្អែកតាមច្បាប់ឲ្យមានប្រសិទ្ធភាពទេ។
ចំណែកម្ចាស់រថយន្តដឹកឈើ ក៏ពុំឃើញស្ថាប័នអយ្យការធ្វើការចោទប្រកាន់ដែរ។ បញ្ហានេះលោកចាត់ទុកថា ការអនុវត្តច្បាប់របស់អាជ្ញាធរជំនាញ និងស្ថាប័នអយ្យការ ហាក់ពុំមានតម្លាភាព និងលម្អៀងទៅរកអ្នកទន់ខ្សោយ ពោលបើពលរដ្ឋធម្មតាមិនអាចគេចផុតពីកណ្ដាប់ដៃរបស់សមត្ថកិច្ច និងអាជ្ញាធរពាក់ព័ន្ធទេ តែបើចំពោះអ្នកមានឥទ្ធិពល ច្រើនតែគេចផុតពីសំណាញ់ច្បាប់៖ «ការផ្ដើមចាប់ (អនុវត្តច្បាប់) ចាប់បានតែពលរដ្ឋអត់មានលុយសូកប៉ាន់គេ ដែលគេចាប់បាន ហើយចំពោះអ្នកដែលមានខ្នងបង្អែកធំៗ គេមិនដែលឃើញចាប់បានទេ ហើយយើងឃើញថាមានទាំងឡានយីឌុប ទាំងឡាន និងម៉ូតូដឹកឈើទៅលក់»។
ព្រះរាជអាជ្ញារងអមសាលាដំបូងខែត្រក្រចេះ លោក ធុច បញ្ចសន្តិភាព បដិសេធមិនអធិប្បាយករណីនេះទេ ដោយលោកជំរុញឲ្យសួរទៅចៅក្រមស៊ើបសួរ។ ចំណែកប្រធានសាលាដំបូងខែត្រក្រចេះ លោក ឌិន សុវុទ្ធី ក៏មិនអធិប្បាយករណីនេះដែរ ដោយលោកជំរុញឲ្យសួរតំណាងអយ្យការវិញ៖ «ជម្រាបសួរគាត់សិន គាត់អ្នកផ្ដើមចោទប្រកាន់ សុំឲ្យគាត់ឆ្លើយ។ សុំឲ្យគាត់ឆ្លើយសិន»។
កាលពីថ្ងៃទី៧ ខែកុម្ភៈ ឆ្នាំ២០១៧ ព្រះរាជអាជ្ញារងអមសាលាដំបូងខែត្រក្រចេះ លោក ធុច បញ្ចសន្តិភាព បង្គាប់ឲ្យអធិការស្រុកសំបូរ សហការជាមួយមន្ត្រីរដ្ឋបាលព្រៃឈើឃាត់រថយន្តសាំយ៉ុងដឹកឈើសសរចំនួន ៨ដើម និងឈើក្ដារ ១៩សន្លឹក ដែលមានឈ្មោះ សៀក ឆៃ ជាម្ចាស់រថយន្ត មករក្សាទុកនៅរដ្ឋបាលព្រៃឈើសណ្ដាន់ នៃស្រុកសំបូរ ក្រោយពីមន្ត្រីសង្គមស៊ីវិល និងពលរដ្ឋ ៤នាក់ទៀតឃាត់រថយន្តនោះ មករក្សាទុកនៅផ្ទះរបស់លោក ស៊ីម គឹមស៊ា ដែលជាមន្ត្រីអង្គការការពារបរិស្ថាន និងសិទ្ធិពលរដ្ឋ។ ចំណែកបុរស ៥នាក់ ក្នុងនោះ ៤នាក់ជាពលរដ្ឋ និងម្នាក់ឈ្មោះ ស៊ីម គឹមស៊ា ជាមន្ត្រីអង្គការការពារបរិស្ថាន និងសិទ្ធិពលរដ្ឋនៅខែត្រក្រចេះ ត្រូវបានឃាត់ខ្លួននៅគ្រាពួកគេកំពុងបរិភោគអាហារនៅភូមិស្រែស្បូវ ឃុំក្បាលដំរី ស្រុកសំបូរ ខែត្រក្រចេះ ហើយប្រតិបត្តិការឃាត់ខ្លួននេះ សមត្ថកិច្ចរកឃើញកាំបិតខ្វែវ និងកាំបិតប៉័ងតោចំនួន ៥ដើមក្នុងរថយន្តលោក ស៊ីម គឹមស៊ា។
មេប៉ុស្តិ៍ឃុំក្បាលដំរី លោក ម៉ៅ សុវណ្ណារ៉ា ឲ្យដឹងថា ពលរដ្ឋធ្លាប់ផ្តល់ព័ត៌មានថា កន្លងទៅ មន្ត្រីអង្គការការពារបរិស្ថាន និងសិទ្ធិពលរដ្ឋទាំងនោះ តែងតែប្រដេញរថយន្តដឹកជញ្ជូនឈើខុសច្បាប់ និងតម្រូវឲ្យបង់ប្រាក់ដើម្បីជាថ្នូរដោះលែង៖ «ចេះតែឲ្យការណ៍មកថា ធ្លាប់ដេញអីគេចឹង ប៉ុន្តែយើងមិនដែលបានឃើញផ្ទាល់ភ្នែកទេ»។
នេះជាការចាប់ខ្លួនលើកទីពីរហើយទាក់ទងនឹងរឿងដឹកឈើនៅខែត្រក្រចេះ។ កាលពីថ្ងៃទី២៣ ខែតុលា ឆ្នាំ២០១៦ មន្ត្រីអាវុធហត្ថលើផ្ទៃប្រទេស សហការជាមួយមន្ត្រីរដ្ឋបាលព្រៃឈើខែត្រស្ទឹងត្រែង បានឃាត់ខ្លួនពលរដ្ឋខែត្រក្រចេះ ៣នាក់ និងរថយន្ត ១គ្រឿង ដែលផ្ទុកឈើសុក្រំជាងមួយម៉ែត្រគូប (១,២២៧ម៉ែត្រគូប) ដោយចោទថា ប្រមូលផល និងដឹកជញ្ជូនឈើគ្មានលិខិតអនុញ្ញាត។ អ្នកទាំងនោះ ត្រូវបានតុលាការឃុំខ្លួនបណ្ដោះអាសន្នក្នុងពន្ធនាគារនៅថ្ងៃទី២៦ ខែតុលា នោះ៕