អ្នកច្បាប់អះអាងថា ការចាប់ខ្លួនលោក គឹម សុខ អ្នកឃ្លាំមើលសង្គម គឺធ្វើឡើងផ្ទុយពីរដ្ឋធម្មនុញ្ញ និងសន្ធិសញ្ញាអន្តរជាតិ ដែលចែងថា ជនគ្រប់រូបមានសិទ្ធការពារខ្លួនតាមផ្លូវតុលាការ។
មេធាវីដែលតែងការពារក្ដីឲ្យសកម្មជនគណបក្សប្រឆាំង លោក សំ សុគង់ បានប្រាប់អាស៊ីសេរីកាលពីថ្ងៃសុក្រ ទី១៧ កុម្ភៈ ថា ព្រះរាជអាជ្ញាហាក់ប្រញាប់ប្រញាល់ ក្នុងការកោះហៅ លោក គឹម សុខ ឲ្យចូលខ្លួនឆ្លើយបំភ្លឺនៅតុលាការ ទាំងមិនបានផ្ដល់ពេលវេលា គ្រប់គ្រាន់ក្នុងការការពារខ្លួនតាមផ្លូវច្បាប់៖ «លើកលែងតែករណីជាក់ស្ដែងដែលគេត្រូវឃាត់ខ្លួនជន់សង្ស័យហ្នឹង យកមកតុលាការទេ ដែលគេថាខ្លាចឃុំខ្លួនលើស ឬមិនលើស។ ប៉ុន្តែករណីលោក គឹម សុខនេះគឺបទល្មើសមិនជាក់ស្ដែងទេ ហើយបទល្មើស ហ្នឹងមានរយៈពេលវែងក្នុងការស៊ើបអង្កេតដើម្បីឈាន ទៅរកការឃាត់ខ្លួន»។
តុលាការ កាលពីថ្ងៃសុក្រ បានសម្រេចឃុំខ្លួនលោក គឹម សុខ ពីបទញុះញង់ និងបរិហារកេរ្តិ៍បក្សកាន់អំណាចតាមបណ្ដឹងរបស់លោក នាយករដ្ឋមន្ត្រី ហ៊ុន សែន។
លោក ហ៊ុន សែន ប្ដឹងលោក គឹម សុខ ពីបទញុះញង់ឲ្យបង្កចលាចល ដោយទាមទារសំណងជំងឺចិត្តចំនួន ៥០ម៉ឺនដុល្លារ និងមួយករណីទៀត ក្រោមបណ្ដឹងរបស់រដ្ឋាភិបាលពីបទបរិហារកេរ្តិ៍ ដែលទាមទារសំណង ១០លានរៀល ឬស្មើនឹង២ពាន់ ៥០០ដុលា្លរ។
កាលពីដើមសប្ដាហ៍នេះ លោក ហ៊ុន សែន បានប្រាប់ជាមុនដែរថា ទោសកំហុស របស់លោក គឹម សុខ អាចជាប់ទោសរយៈពីរឆ្នាំ និងតម្រូវឲ្យផ្ដល់សំណងទាំងឡាយដែលលោកទាមទារ បើមិនដូច្នោះទេ នោះលោកនឹងរឹបអូស ទ្រព្យសម្បត្តិ។
លោក ហ៊ុន សែន៖ « ស្អី ! អ្នកឯងបញ្ចេញមតិ ? មកចោទគណបក្សប្រជាជនសម្លាប់មនុស្ស ! អត់ទេ ទារកន្លះលានដុល្លារ។ បើយើងកុំប៉ះគេ អាណាគេប្រើ តុលាការទៅធ្វើអី។ ដូចម្សៀដែលត្រូវ ប្ដឹងព្រឹកនេះ វាទៅឡើង អាស៊ីសេរី វាថាគណបក្សប្រជាជនកម្ពុជាសម្លាប់លោក កែម ឡី។ ម្នាក់នេះខ្ញុំបញ្ជាឲ្យនគរបាល អោយតាមតាំងពីម្សិលហើយ។ កុំរត់ ! ទៅជាប់គុកត្រឹមពីរឆ្នាំ អីតើ កុំថាអត់លុយសងវើយ»។
លោក គឹម សុខ បានប្រាប់អ្នកគាំទ្រនៅមុនលោកត្រូវបានបញ្ជូន ទៅពន្ធនាគារព្រៃសថា លោកមានលុយតែជាង២៤០ ដុល្លារ អាមេរិក ក្នុងធនាគារអេស៊ីលីដា (ACLEDA) ម៉ូតូកញ្ចាស់មួយគ្រឿង ទូរស័ព្ទពីរគ្រឿង និង អាយផេត (ipad) មួយគ្រឿង និងផ្ទះជួលគេ ប៉ុណ្ណោះ ហើយលោក សំណូមពរឲ្យលោក ហ៊ុន សែន កុំធ្វើបាបគ្រួសារ របស់លោកក្នុងករណីក្ដីក្ដាំនេះអី។
អ្នកវិភាគឯករាជ្យលោក បណ្ឌិត ឡៅ ម៉ុងហៃ បានថ្លែងក្នុងវេទិកាអ្នកស្ដាប់វិទ្យុអាស៊ីសេរី កាលពីថ្ងៃ១៧ កុម្ភៈ ថា តុលាការគួតែដោះលែងលោក គឹម សុខ ឲ្យមានសេរីភាពទៅវិញទេ ពីព្រោះតុលាការមួយនេះបានរក ការជ្រៀតជ្រែកឯករាជ្យភាពរបស់ខ្លួនធ្ងន់ធ្ងរ ពីលោកនាយករដ្ឋមន្ត្រី ហ៊ុន សែន។
លោក ឡៅ ម៉ុងហៃ៖ «ហ្នឹងប៉ះពាល់ដល់ការកាត់ទោសដោយយុត្តិធម៌។ អាហ្នឹងគេអាច សុំអោយតុលាការលើកលែងការចោទប្រកាន់ទាំងអស់។ ព្រោះហ្នឹង ប៉ះពាល់ដល់ឯករាជ្យភាព របស់តុលាការដែលធ្វើឲ្យតុលាការលែងឯករាជ្យ លែងឥតលំអៀង។ វាទៅជាលំអៀងហើយ។ នីតិវិធីហ្នឹងគេ អាចសុំបដិសេធដោយសារមានការជ្រៀតជ្រែកការប្រើប្រាស់ឥទ្ធិពល សឹងតែថាការបង្គាប់បញ្ជារអោយតុលាការកាត់តាមគាត់ទៅ។ ករណីហ្នឹងត្រូវឲ្យជនសង្ស័យ ឬជនជាប់ចោទរួចខ្លួន»។
ពាក់ពន្ធទៅនឹងការចាប់ខ្លួនលោក គឹម សុខ នេះដែរ តំណាងពិសេសរបស់អង្គការសហប្រជាជាតិទទួលសិទ្ធិមនុស្សប្រចាំ នៅកម្ពុជា អ្នកស្រី វ៉ាន់ហ៊ី លី (Wan-Hea Lee) កាលពីថ្ងៃសុក្រ បានសម្ដែងការព្រួយបារម្ភចំពោះការចាប់ខ្លួន អ្នកឃ្លាំមើលសង្គម រូបនេះ ហើយថាក្រុមរបស់អ្នកស្រីនឹងបន្តតាមដាន ករណីនេះយ៉ាង យកចិត្តទុកដាក់។
ក្នុងសារអេឡិចត្រូនិករបស់អ្នកស្រី មកអាស៊ីសេរី កាលពីថ្ងៃទី១៧ កុម្ភៈ បញ្ជាក់ថា ការកាត់សេចក្តីដោយតុលាការឯករាជ្យ នឹងអាចវិនិច្ឆ័យបានថា លោក គឹម សុខ មានទោស ឬគ្មានទោស។
អ្នកស្រីបន្តថា ភាពខ្វះខាតស្តង់ដារច្បាស់លាស់ក្នុងការចោទប្រកាន់ ពីបទបរិហារកេរ្តិ៍ គឺជាការរំលោភទាំងស្រុងទៅដល់សិទ្ធិរបស់បុគ្គលដែលហ៊ានបញ្ចេញមតិ។ កាលពីឆ្នាំ២០១៥ គណៈកម្មាធិការ សិទ្ធិមនុស្សរបស់អង្គការសហប្រជាជាតិបានទាមទារឲ្យកម្ពុជា បញ្ឈប់ ការធ្វើទុក្ខបុកម្នេញ សង្គមស៊ីវិលដោយសារការបញ្ចេញមតិទស្សនៈ តាមរយៈការចោទប្រកាន់ ពីបទបរិហារកេរ្តិ៍។
មហាជនជាច្រើនបានស្រែកនៅខាងមុខតុលាការក្រុងភ្នំពេញថា តុលាការអយុត្តិធម៌ តុលាការលំអៀង និងតុលាការអាយ៉ងជាដើម ហើយមានពលរដ្ឋខ្មែរជាច្រើនទាំងក្នុង និងក្រៅប្រទេសទៀតបាន ត្រៀមខ្លួនរួចជាស្រេចក្នុងការផ្ដល់ជំនួយជាថវិកាដើម្បីជួយសម្រាលបន្ទុកលោក គឹម សុខ ផងដែរ។ ពួកគេចង់ឲ្យមានការបង្កើត ជាមូលនិធិគឹម សុខ ដោយមានព្រះតេជព្រះគុណ ប៊ុត ប៊ុនតិញ ស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ធ្វើជាប្រធានគណៈកម្មការ។ ព្រះតេជព្រះគុណ ប៊ុត ប៊ុនតិញ មានសង្ឃដីកា ថាការបង្កើតមូលនិធិ គឹម សុខ នេះគឺត្រូវមាន ការពិចារណា ផែនការ និងយុទ្ធសាស្ត្រខ្ពស់បំផុត បើមិនដូច្នេះទេ នោះមូលនិធិនេះ នឹងរងការធ្វើវិទ្ធង្សនា ឬការបំផ្លាញជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។