ក្រសួងការបរទេសកម្ពុជា ភ្ញាក់ផ្អើល និងសោកស្ដាយចំពោះការជ្រៀតជ្រែកកិច្ចការផ្ទៃក្នុងកម្ពុជាពីសហភាពអឺរ៉ុប ទាក់ទងនឹងការអនុវត្តផ្លូវច្បាប់ និងផ្លូវតុលាការ ពាក់ព័ន្ធនឹងរឿងមន្ត្រីសិទ្ធិមនុស្ស និងមន្ត្រីបក្សប្រឆាំងដែលត្រូវចោទប្រកាន់។
សេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ចុះថ្ងៃទី២ មិថុនា បង្ហាញថា ប្រតិកម្មរបស់ស្ថានបេសកកម្មការទូតមួយចំនួននៅភ្នំពេញ គឺជាការមិនយល់ ឬមិនចង់យល់ពីការអនុវត្តក្រមព្រហ្មទណ្ឌរបស់កម្ពុជា ហើយជារឿងមួយដែលមិនសមហេតុផលទាល់តែសោះ។
ក្រសួងការបរទេសបន្តថា ការសូកប៉ាន់សាក្សី និងការបដិសេធមិនចូលបំភ្លឺតាមដីការបស់តំណាងអយ្យការ គឺត្រូវបានផ្ដន្ទាទោសដូចគ្នាទៅនឹងប្រទេសប្រជាធិបតេយ្យទាំងអស់ ជាពិសេសដូចគ្នានិងប្រទេសសមាជិកនៃសហភាពអឺរ៉ុបផងដែរ។
កាលពីយប់ថ្ងៃទី៣០ ខែឧសភា គណៈប្រតិភូសហភាពអឺរ៉ុបប្រចាំកម្ពុជា បានចេញ សេចក្ដីថ្លែងការណ៍មួយ ដោយបង្ហាញការសោកស្ដាយយ៉ាងខ្លាំង ចំពោះការធ្លាក់ចុះស្ថានការណ៍នយោបាយដ៏គ្រោះថ្នាក់ក្នុងរយៈពេលប៉ុន្មានថ្ងៃចុងក្រោយនេះ និងអំពាវនាវឲ្យអាជ្ញាធររដ្ឋាភិបាល បញ្ឈប់នូវការធ្វើទុក្ខបុកម្នេញតាមផ្លូវតុលាការ ប្រឆាំងនឹងប្រធានស្ដីទីគណបក្សសង្គ្រោះជាតិ លោក កឹម សុខា និងតំណាងអង្គការសង្គមស៊ីវិលនានា។
សហភាពអឺរ៉ុប ជំរុញឲ្យរដ្ឋាភិបាលកម្ពុជា បន្តការសន្ទនាដោយសន្តិវិធី និងប្រកបដោយស្មារតីស្ថាបនាជាមួយគណបក្សប្រឆាំងឲ្យបានឆាប់តាមដែល អាចធ្វើទៅបាន ដែលសហភាពអឺរ៉ុប យល់ថា ជាលក្ខខណ្ឌចាំបាច់សម្រាប់ធ្វើឲ្យការបោះឆ្នោតនៅពេលខាងមុខមានភាពស្របច្បាប់៕
[ ចុចត្រង់នេះ ដើម្បីអានព័ត៌មានពិស្ដារ!Opens in new window ]
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។