គណៈកម្មាធិការអចិន្ត្រៃយ៍រដ្ឋសភា សម្រេចកោះហៅរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា ឲ្យចូលបំភ្លឺនៅរដ្ឋសភា នៅថ្ងៃទី៩ មិថុនា ខាងមុខ។ ទោះបីជាយ៉ាងណា សមាជិកសភាគណបក្សប្រឆាំងប្រកាសថា ពួកគេនឹងមិនទៅចូលរួមការសួរដេញដោលនោះឡើយ ពីព្រោះពួកគេបានស្នើសុំផ្អាកកម្មវិធីនោះរួចហើយ។
សមាជិកគណៈកម្មាធិការអចិន្ត្រៃយ៍រដ្ឋសភា លោក ឈាង វុន ថ្លែងឲ្យដឹងក្រោយកិច្ចប្រជុំនៅព្រឹកថ្ងៃទី៦ មិថុនា ថា រដ្ឋសភានឹងនៅតែដំណើរការរបៀបវារៈសួរដេញដោលលោក អង្គ វង្សវឌ្ឍានា នៅព្រឹកថ្ងៃទី៩ មិថុនា ដដែល បើទោះបីជាសមាជិកសភាបក្សប្រឆាំងប្រកាសថា ពួកគេនឹងធ្វើពហិការក៏ដោយ៖ «ពេលគណបក្សសង្គ្រោះជាតិ ផ្ញើសំណួរទៅ មានក្នុងក្រដាសហ្នឹងរួចស្រេចហើយតើ ! គាត់មកឆ្លើយសំណួរហ្នឹងទៅ។ ប៉ុន្តែសំណួរដែលសួរទៅឯកឧត្តមរដ្ឋមន្ត្រីក្រសួងយុត្តិធម៌ នេះ គេហៅលាក់មុខ។ រឿងមែនទែន មិនមែនអ៊ីចឹងទេ។ រឿងមែនទែន គេចង់លាក់បាំងរឿងអាស្រូវរបស់ កឹម សុខា»។
លោក ឈាង វុន អះអាងថា ការកោះហៅរដ្ឋមន្ត្រីក្រសួងយុត្តិធម៌ មកឆ្លើយបំភ្លឺនេះ ធ្វើឡើងតាមការស្នើសុំរបស់តំណាងរាស្ត្រគណបក្សសង្គ្រោះជាតិ។ លោកថា រដ្ឋសភាមិនអាចយល់ស្របតាមសំណើសុំផ្អាកការចោទសួរនេះវិញបានឡើយ៖ «កោះអញ្ជើញរដ្ឋមន្ត្រីមកសួរ ហើយគាត់សុំឲ្យផ្អាកវិញ អាហ្នឹងវាអត់មានផ្លូវច្បាប់ មានតែដក ( លិខិត ) ទេ។ អ៊ីចឹងហើយ បើកាលណាយើងធ្វើតាមគាត់ យើងខុសច្បាប់ជាមួយគាត់»។
កាលពីខែឧសភា កន្លងទៅ ប្រធានក្រុមតំណាងរាស្ត្រគណបក្សសង្គ្រោះជាតិ លោក សុន ឆ័យ បានផ្ញើលិខិតមួយច្បាប់ទៅលោកនាយករដ្ឋមន្ត្រី ហ៊ុន សែន ស្នើឲ្យចាត់តាំងរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា ចូលមកបំភ្លឺផ្ទាល់មាត់នៅរដ្ឋសភា ពាក់ព័ន្ធនឹងការចាប់ឃុំខ្លួនអ្នកតំណាងរាស្ត្រដែលមានអភ័យឯកសិទ្ធិ មន្ត្រីសិទ្ធិមនុស្ស និងករណីតុលាការកោះហៅតំណាងរាស្ត្រឲ្យចូលបំភ្លឺ ពាក់ព័ន្ធនឹងសំណុំរឿងនៅតុលាការ បញ្ហាពាក់ព័ន្ធនឹងការប្រើប្រាស់ឥទ្ធិពលនយោបាយគ្រប់គ្រងតុលាការ ការបំពានរដ្ឋធម្មនុញ្ញ ការគំរាមកំហែងលើគណបក្សប្រឆាំង និងអ្នករិះគន់រដ្ឋាភិបាល ជាដើម។
ទោះបីជាយ៉ាងណា នៅដើមខែមិថុនា នេះ លោក សុន ឆ័យ បានដាក់លិខិតមួយទៅប្រធានរដ្ឋសភា ស្នើសុំផ្អាកការសួរដេញដោលនេះទៅពេលក្រោយវិញ ដោយមូលហេតុលោកមិនអាចទៅបំពេញការងារពេញលេញនៅរដ្ឋសភាបាន។
ឆ្លើយតបនឹងការលើកឡើងរបស់លោក ឈាង វុន ប្រធានក្រុមតំណាងរាស្ត្រគណបក្សសង្គ្រោះជាតិ លោក សុន ឆ័យ បញ្ជាក់ថា សំណើសុំផ្អាករបស់លោក មានន័យស្មើនឹងការដកលិខិត។ លោកថា សមាជិកសភាគណបក្សសង្គ្រោះជាតិ នឹងស្នើរដ្ឋមន្ត្រីក្រសួងយុត្តិធម៌ មកឆ្លើយបំភ្លឺឡើងវិញនៅពេលពួកលោកចូលទៅធ្វើការនៅរដ្ឋសភាវិញ ក្រោយស្ថានការណ៍នយោបាយមានភាពធូរស្រាល៖ «យើងសុំឲ្យដកលិខិតមកវិញ ហើយផ្អាកការសួរ ស្របតាមប្រការ៣៣ នៃបទបញ្ជាផ្ទៃក្នុងរដ្ឋសភា។ ហើយមិនមានគណបក្សណាអាចមកសួរដេញដោលជំនួសយើងបានទេ។ យើងជាម្ចាស់សំណួរ។ យើងបានផ្អាក ហើយសុំឲ្យដកសំណើនេះសិន។ ហើយបើយើងចង់អញ្ជើញរដ្ឋមន្ត្រីនៅពេលក្រោយ យើងនឹងធ្វើលិខិតសាជាថ្មីម្តងទៀត»។
លោក សុន ឆ័យ អះអាងថា សមាជិកសភាមកពីគណបក្សប្រជាជនកម្ពុជា មិនអាចហៅលោក អង្គ វង្សវឌ្ឍានា មកសាកសួរចំពោះសំណួរគណបក្សសង្គ្រោះជាតិ បានទេ ចាំបាច់តំណាងរាស្ត្រគណបក្សប្រជាជនកម្ពុជា ត្រូវបង្កើតសំណួរ ហើយអញ្ជើញរដ្ឋមន្ត្រីមកសួរដោយខ្លួនឯង។
ក្រៅពីនេះ លោក សុន ឆ័យ ប្រតិកម្មចំពោះការលើកឡើងរបស់លោក ឈាង វុន ដែលថា សំណួរទៅកាន់លោក អង្គ វង្សវឌ្ឍានា គឺជាចេតនាលាក់បាំងរឿងអាស្រូវលោក កឹម សុខា។ លោក សុន ឆ័យ បញ្ជាក់ថា ខ្លឹមសារសំណួរដែលគណបក្សលោកចង់សួរលោករដ្ឋមន្ត្រីក្រសួងយុត្តិធម៌ គឺជុំវិញតែការអនុវត្តច្បាប់របស់តុលាការ និងការបែកធ្លាយឯកសារសម្ងាត់ទាក់ទងនឹងលោក អង្គ វង្សវឌ្ឍានា តែប៉ុណ្ណោះ៖ «ចំណុចណាដែលយើងសួរពាក់ព័ន្ធនឹងករណីលោក កឹម សុខា ឲ្យគាត់អានជូនសាធារណជនជ្រាបផង ! យើងសួរតែពីរឿងការអនុវត្តករណីព្រហ្មទណ្ឌរបស់រាជរដ្ឋាភិបាល។ យើងសួរអំពីការឃុំខ្លួនលើសការកំណត់ និងលោករដ្ឋមន្ត្រីដែលត្រូវបានគេផ្សាយតាមឯកសារប៉ាណាម៉ា (Panama Papers) ពាក់ព័ន្ធនឹងរឿងដាក់ភាគហ៊ុននៅក្រៅប្រទេស។ តើករណីទាំងនេះពាក់ព័ន្ធលោក កឹម សុខា ឬអត់ ?»។
កាលពីចុងខែឧសភា កន្លងទៅ គណបក្សសង្គ្រោះជាតិ បានប្រកាសថា អ្នកតំណាងរាស្ត្ររបស់ខ្លួនទាំងអស់ នឹងផ្អាកមិនទៅបំពេញនូវរាល់កិច្ចការនានានៅមន្ទីររដ្ឋសភាមួយរយៈ។ ការប្រកាសនេះ ក្នុងគ្រាដែលលោក កឹម សុខា បដិសេធមិនឲ្យចូលខ្លួនបំភ្លឺក្នុងនាមជាសាក្សីរឿងសញ្ចារកម្មចំនួន ២លើក ហើយតុលាការចោទប្រកាន់ពីបទបដិសេធក្នុងការចូលបំភ្លឺ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។