តំណាងរាស្ត្រមកពីគណបក្សនយោបាយធំៗទាំងពីរ គឺគណបក្សសង្គ្រោះជាតិ និងគណបក្សប្រជាជនកម្ពុជា សម្រេចទាត់ចោលសំណើរបស់ក្រសួងយុត្តិធម៌ ដែលស្នើដកអភ័យឯកសិទ្ធិសភារបស់អ្នកតំណាងរាស្ត្រទាំងពីររូបរបស់គណបក្សប្រឆាំង គឺលោក តុ វ៉ាន់ចាន់ និងលោក ពិន រតនា។ នៅក្នុងកិច្ចប្រជុំគណៈកម្មាធិការអចិន្ត្រៃយ៍រដ្ឋសភា អង្គប្រជុំរកឃើញថា អ្នកតំណាងរាស្ត្រទាំងពីររូបនេះ ពុំបានប្រព្រឹត្តបទល្មើសជាក់ស្ដែងដូចការចោទប្រកាន់ឡើយ។
ការបដិសេធរបស់គណៈកម្មាធិការអចិន្ត្រៃយ៍នៃរដ្ឋសភានេះ បន្ទាប់ពីក្រសួងយុត្តិធម៌ កាលពីខែសីហា បានដាក់សំណើសុំឲ្យរដ្ឋសភា ដកអភ័យឯកសិទ្ធិសមាជិកសភារបស់គណបក្សប្រឆាំង ២រូប ដែលតុលាការចោទប្រកាន់ថាមានជាប់ទាក់ទងក្នុងសំណុំរឿងលោក កឹម សុខា។
ថ្លែងប្រាប់អ្នកកាសែតក្រោយកិច្ចប្រជុំបានបិទបញ្ចប់កាលពីព្រឹកថ្ងៃទី២៨ ខែកញ្ញា លោក ឡេង ប៉េងឡុង អ្នកនាំពាក្យរបស់រដ្ឋសភា ឲ្យដឹងថា គណៈកម្មាធិការអចិន្ត្រៃយ៍របស់គណបក្សនយោបាយទាំងពីរ សម្រេចមិនធ្វើតាមសំណើសុំដកអភ័យឯកសិទ្ធិសភារបស់តំណាងរាស្ត្រ ២រូប តាមការស្នើសុំរបស់ក្រសួងយុត្តិធម៌ ទេ។ លោកបន្តថា កំហុសរបស់លោក តុ វ៉ាន់ចាន់ និងលោក ពិន រតនា រកមិនឃើញថាបានប្រព្រឹត្តល្មើសដូចការចោទប្រកាន់របស់តុលាការឡើយ។ លោកបន្តថា « គណៈកម្មាធិការអចិន្ត្រៃយ៍មិនបានសម្រេចបញ្ហាហ្នឹងទេ ព្រោះអ្នកទាំងពីរនាក់មិនបានប្រព្រឹត្តបទល្មើសជាក់ស្ដែងទេ។ ដូចគណៈកម្មាធិការអចិន្ត្រៃយ៍ នឹងឆ្លើយជូនទៅក្រសួងយុត្តិធម៌ »។
ជុំវិញសំណុំរឿងនេះ លោក សៀង សុខ ព្រះរាជអាជ្ញារងនៃតុលាការក្រុងភ្នំពេញ ចោទប្រកាន់តំណាងរាស្ត្រទាំងពីររូបពីបទប្រព្រឹត្តបទល្មើសជាក់ស្ដែង។ ទាំងលោក តុ វ៉ាន់ចាន់ និងលោក ពិន រតនា កាលពីថ្ងៃទី១៦ ខែឧសភា ពុំបានចូលខ្លួនឆ្លើយបំភ្លឺតាមដីកាកោះរបស់តំណាងអយ្យការលោក សៀង សុខ ទេ។
លោក លី សុផាណា អ្នកនាំពាក្យអយ្យការអមតុលាការក្រុងភ្នំពេញ មិនបានប្រាប់អ្នកកាសែតអ្វីឡើយ ជុំវិញការបដិសេធរបស់គណៈកម្មាធិការអចិន្ត្រៃយ៍នៃរដ្ឋសភា ដោយលោកបញ្ជាក់យ៉ាងខ្លីតាមបណ្ដាញទំនាក់ទំនងតេឡេក្រាម (Telegram) ថា លោកមានភារកិច្ចទៅក្រៅប្រទេស។ ដោយឡែកអ្នកនាំពាក្យក្រសួងយុត្តិធម៌ លោក គឹម សន្តិភាព វិញថ្លែងថា ជាប់ប្រជុំនៅថ្ងៃទី២៨ ខែកញ្ញា។
កាលពីខែសីហា ក្រសួងយុត្តិធម៌ តាមរយៈគណៈកម្មការនីតិកម្ម និងយុត្តិធម៌របស់រដ្ឋសភា បានធ្វើសំណើសុំលើកអភ័យឯកសិទ្ធិសភារបស់តំណាងរាស្ត្រ ២រូប គឺលោក តុ វ៉ាន់ចាន់ និងលោក ពិន រតនា។ កិច្ចអន្តរាគមន៍របស់ក្រសួងយុត្តិធម៌ ពេលនោះ គឺប្រយោជន៍ដើម្បីបើកផ្លូវឲ្យតុលាការងាយបន្តនីតិវិធីចាត់ការលើតំណាងរាស្ត្រទាំងពីររូបនេះ។
លោក យ៉ែម បុញ្ញឫទ្ធិ អ្នកនាំពាក្យរបស់គណបក្សប្រឆាំង ឲ្យដឹងថា ការច្រានចោលសំណើរបស់ក្រសួងយុត្តិធម៌ នេះ ក៏ជាផ្នែកមួយបិទផ្លូវរបស់តុលាការក្នុងការបន្តនីតិវិធីរបស់ខ្លួនប្រឆាំងអ្នកតំណាងរាស្ត្រទាំងពីររូបនេះ។ លោកបន្តថា « ការលើកអភ័យឯកសិទ្ធិ ការស្នើសុំក្រសួងយុត្តិធម៌ គណៈកម្មាធិការអចិន្ត្រៃយ៍លោកបានសម្រេចអម្បាញ់មិញ សូមឲ្យអគ្គលេខាធិការរាយការណ៍ជូនទៅក្រសួងយុត្តិធម៌ វិញ គឺមិនមានការឆ្លើយតបជាវិជ្ជមានទៅតាមការស្នើសុំនោះទេ។ នេះជាសម្រេចរបស់គណៈកម្មាធិការអចិន្ត្រៃយ៍អម្បាញ់មិញ »។
ការចាប់ដៃគ្នាដើរចូលសភាឡើងវិញរបស់បក្សនយោបាយធំៗទាំងនេះ ត្រូវបានអ្នកវិភាគសង្គម និងនយោបាយមើលឃើញថា ជាសញ្ញាវិជ្ជមាន ជាពិសេសសម្រាប់ការអភិវឌ្ឍសេដ្ឋកិច្ច និងសង្គម។
កាលពីព្រឹកថ្ងៃទី២៨ កញ្ញា របៀបវារៈដែលគណៈកម្មាធិការអចិន្ត្រៃយ៍នៃរដ្ឋសភាលើកទៅពិភាក្សាមាន ៨ចំណុច ក្នុងនោះរួមមានសេចក្ដីព្រាងច្បាប់គ្រប់គ្រងវិស័យសុខាភិបាល និងសេចក្ដីព្រាងគម្រោងថវិការដ្ឋសភាប្រចាំឆ្នាំ២០១៧ ជាដើម ក្រៅពីនេះ របៀបវារៈភាគច្រើនពីខាងបក្សប្រឆាំង គ្របដណ្ដប់លើវិសោធនកម្មនៃមាត្រាមួយចំនួនស្ដីពីលក្ខន្តិកៈនៃចៅក្រម និងព្រះរាជអាជ្ញា។
មកដល់ពេលនេះ រដ្ឋសភានៅមិនទាន់បានកំណត់ពេលសម្រាប់សម័យប្រជុំសភាពេញអង្គវិញនៅឡើយទេ បន្ទាប់ពីសភាវ៉ាកងក្នុងរយៈពេល ៣ខែកន្លងមកនេះ។ តាមគម្រោង សភានឹងចូលកងវិញនៅខែតុលា នេះហើយ៕
វីដេអូ៖ រដ្ឋសភាច្រានចោលសំណើក្រសួងយុត្តិធម៌ចង់ដកអភ័យឯកសិទ្ធិសភាបក្សប្រឆាំងពីររូប
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។