មន្ត្រីមូលដ្ឋានគណបក្សសង្គ្រោះជាតិ ក្នុងខេត្តស្ទឹងត្រែង អំពាវនាវឲ្យសាលាឧទ្ធរណ៍ លើកលែងបទចោទចំពោះសមាជិកក្រុមប្រឹក្សាឃុំម្នាក់មកពីគណបក្ស សម រង្ស៊ី។ ការអំពាវនាវនេះ នៅពេលសមាជិកក្រុមប្រឹក្សាឃុំជាជនជាតិដើមភាគតិចទំពួន កំពុងជាប់ពន្ធនាគារតាមបណ្ដឹងរបស់មេឃុំតាឡាត។ ក្រុមប្រឹក្សាឃុំរូបនោះ ត្រូវចាប់ខ្លួនបន្ទាប់ពីបានកាប់ឆ្ការព្រៃក្បាលស្រែ ដើម្បីពង្រីកផ្ទៃដីកសិកម្មមួយហិកតារតាមលក្ខណៈប្រពៃណីជនជាតិដើមភាគតិចទំពួន កាលពីឆ្នាំ២០១៤។
អនុប្រធានប្រតិបត្តិគណបក្សប្រឆាំងនៅខេត្តស្ទឹងត្រែង អះអាងថា ការចាប់ខ្លួន និងឃុំខ្លួនរបស់សមាជិកក្រុមប្រឹក្សាឃុំតាឡាត លោក ណ ឡិត កាលពីដើមឆ្នាំ២០១៥ ថាជាចេតនារើសអើងបក្សនយោបាយ និងជារឿងអយុត្តិធម៌ បន្ទាប់ពីសមាជិកក្រុមប្រឹក្សាឃុំរូបនោះជាជនជាតិដើមភាគតិចទំពួន បានកាប់ឆ្ការព្រៃមួយហិកតារជាប្រពៃណីជនជាតិដើមភាគតិច ដើម្បីធ្វើចម្ការលក្ខណៈគ្រួសារ។
អនុប្រធានគណបក្សសង្គ្រោះជាតិ ខេត្តស្ទឹងត្រែង លោក សាត ស៊ិន ឲ្យដឹងថា សមាជិកក្រុមប្រឹក្សាឃុំតាឡាត លោក ណ ឡិត បានជាប់ពន្ធនាគាររយៈពេលជិត ១ឆ្នាំហើយ តាមពាក្យបណ្ដឹងរបស់មេឃុំតាឡាត លោក សឿង ខង ពីបទកាប់បំផ្លាញព្រៃឈើដោយខុសច្បាប់។ លោកកត់សម្គាល់ថា សមាជិកក្រុមប្រឹក្សាឃុំរូបនោះ បានកាប់ឆ្ការព្រៃក្នុងភូមិក្បែរលំនៅឋាន ដើម្បីពង្រីកផ្ទៃដីកសិកម្មប្រហែល ១ហិកតារកាលពីឆ្នាំ២០១៤ ដើម្បីអាស្រ័យផលលក្ខណៈគ្រួសារជនជាតិដើមភាគតិច និងជាទំនៀមទម្លាប់ជនជាតិដើមភាគតិចទំពួន។ លោកចាត់ទុកការចាប់ខ្លួន លោក ណ ឡិត ថាជាចេតនាបំបាក់ស្មារតីអាជ្ញាធរមកពីគណបក្សជំទាស់ និងដើម្បីកេងចំណេញនយោបាយ ខណៈដែលព្រៃឈើនៅតំបន់នោះ និងនៅតំបន់ផ្សេងទៀត ត្រូវបានគេកាប់រានធ្វើជាកម្មសិទ្ធិឯកជនរាប់ម៉ឺនហិកតារ ពុំត្រូវបានចាប់ខ្លួនអនុវត្តច្បាប់ឡើយ៖ « ក្បែរដីគាត់ហ្នឹងមានទាំងអស់ ហើយមកដាក់បន្ទុកតែគ្រួសារគាត់មួយ។ នេះជារឿងរើសអើងនយោបាយ មិនមែនជារឿងច្បាប់ ព្រោះខ្ញុំមើលឃើញថា ខ្ញុំចុះទៅតាឡាត គេកាប់រាប់ម៉ឺនរាប់សែនហិកតារកណ្ដាលព្រៃ អត់មានទោស មកធ្វើបាបតែគ្នាគណបក្សប្រឆាំង ចាប់គ្នាដាក់គុក។ នេះជារឿងអត់សមហេតុសមផល »។
វិទ្យុអាស៊ីសេរី មិនអាចទាក់ទងមេឃុំតាឡាត លោក សឿង ខង ដែលជាដើមបណ្ដឹង ដើម្បីសុំការបំភ្លឺជុំវិញករណីនេះបានទេនៅថ្ងៃទី២០ កុម្ភៈ ព្រោះទូរស័ព្ទហៅចូលច្រើនដងពុំមានអ្នកទទួល។
ចំណែកមេធាវីការពារក្តីឲ្យជនជាប់ចោទ លោក ជូង ជូងី មើលឃើញថា ការចាប់ខ្លួន និងការឃុំខ្លួនកូនក្តីរបស់លោក គឺជាចេតនារើសអើងបក្សនយោបាយរបស់អាជ្ញាធរមូលដ្ឋាន និងតុលាការខេត្តស្ទឹងត្រែង ច្រើនជាងការអនុវត្តច្បាប់។ លោកកត់សម្គាល់ថា លោកបានធ្វើលិខិតស្នើសុំសាលាឧទ្ធរណ៍ ឲ្យកូនក្តីលោកនៅក្រៅឃុំ តែសាលាឧទ្ធរណ៍បដិសេធ។ ដូច្នេះ លោកបានដាក់ពាក្យប្ដឹងសាទុក្ខទៅតុលាការកំពូល បន្តទៀត៖ « កាប់ព្រៃដើម្បីសង់លំនៅឋានជាលក្ខណៈសហគមន៍ជនជាតិដើមភាគតិច។ ចឹងគឺគាត់កាប់អត់ខុសច្បាប់ទេ។ តែគាត់ប្ដឹងដោយសារតែមេឃុំមកពីគណបក្សប្រជាជន គាត់រើសអើងគណបក្សនយោបាយ ហើយប្ដឹងទៅតុលាការ ឲ្យតុលាការកាត់ក្តីក៏មានលក្ខណៈរើសអើងនយោបាយដែរ »។
ករណីនេះដែរ ប្រធានអង្គការកិច្ចការពិសេសសិទ្ធិមនុស្សកម្ពុជា លោក អ៊ូច ឡេង ហាក់មិនអស់ចិត្តចំពោះការអនុវត្តច្បាប់នៅកម្ពុជា ខណៈដែលមានឧកញ៉ាមួយចំនួន និងឈ្មួញជនជាតិវៀតណាម ជាច្រើនដែលជាប់ពាក់ព័ន្ធបទល្មើសព្រៃឈើច្រើនសន្ធឹកសន្ធាប់ មិនត្រូវបានចាប់ខ្លួន ឃើញតែអនុវត្តច្បាប់លើមន្ត្រីគណបក្សប្រឆាំង។ លោកចាត់ទុកការអនុវត្តច្បាប់របស់អាជ្ញាធរ និងតុលាការ ថាមិនស្មើភាព ដែលជាសញ្ញាបង្ហាញឲ្យឃើញពីភាពអស់ជំនឿរបស់ពលរដ្ឋ និងសង្គមស៊ីវិលលើការអនុវត្តច្បាប់របស់តុលាការ៖ « គេចាប់ហ្នឹងដោយសារតែគាត់ពាក់ព័ន្ធគណបក្សប្រឆាំង។ ចឹងហើយសូមឲ្យរដ្ឋាភិបាល គួរតែអនុវត្តច្បាប់ដូចៗគ្នា គួរតែចាត់វិធានការជាមួយនឹងឧកញ៉ាដែលស៊ីឈើកន្លងមកឲ្យបានម៉ត់ចត់ មិនគួរដោះលែង ហើយមានការសម្របសម្រួលណាមួយ ដែលធ្វើឲ្យពលរដ្ឋរិះគន់អនុវត្តច្បាប់មិនមានលក្ខណៈសុក្រឹត មានការរើសអើងគណបក្សនយោបាយ »។
សមាជិកក្រុមប្រឹក្សាឃុំតាឡាត មកពីគណបក្ស សម រង្ស៊ី លោក ណ ឡិត ត្រូវបានសាលាដំបូងខេត្តស្ទឹងត្រែង កាត់ទោសឲ្យជាប់ពន្ធនាគាររយៈពេល ៥ឆ្នាំ ពីបទកាប់បំផ្លាញព្រៃឈើកាលពីថ្ងៃទី១៨ ខែមីនា ឆ្នាំ២០១៥។ ចំណែក លោក ណ ឡិត ក៏បានដាក់ពាក្យប្ដឹងទាស់ទៅសាលាឧទ្ធរណ៍បន្ត ហើយរហូតបច្ចុប្បន្ន សំណុំរឿងនេះត្រូវសាលាឧទ្ធរណ៍ជំនុំជម្រះ និងមិនទាន់កំណត់ពេលកាត់ក្តីនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។