សាលាដំបូងរាជធានីភ្នំពេញ លើកសវនាការជនជាប់ចោទ ២៣នាក់ ក្នុងនោះមាន លោក វន់ ពៅ ផង បន្តនៅថ្ងៃស្អែក ទី២១ ឧសភា បន្តទៀត បន្ទាប់ពីបានបើកសវនាការអស់រយៈពេលពេញមួយថ្ងៃនៅថ្ងៃរួចមក។
ការលើកពេលនេះ បន្ទាប់ពីសាលាដំបូងរាជធានីភ្នំពេញ ចំណាយពេលស្ទើរពេញមួយថ្ងៃ ដើម្បីកាត់ក្ដីសំណុំរឿងអ្នកទាំង ២៣នាក់នោះ។
អ្នកសង្កេតការណ៍នៃដំណើរការសវនាការថ្ងៃនេះ ដូចជាមន្ត្រីអង្គការសិទ្ធិមនុស្ស មេធាវី រួមទាំងក្រុមគ្រួសារជនជាប់ចោទ បានរិះគន់ដំណើរការសវនាការនេះថា លំអៀងទៅរដ្ឋាភិបាលដែលកាន់អំណាចបច្ចុប្បន្ន។
លោក អំ សំអាត មន្ត្រីស៊ើបអង្កេតអង្គការលីកាដូ (Licadho) ដែលតាមដានសវនាការនោះប្រាប់អ្នកសារព័ត៌មានក្រោយពីសវនាការនោះថា ដំណើរការនៃសវនាការនោះមានចរិតនយោបាយច្រើនជាងនីតិវិធីច្បាប់។ លោកចៅក្រម និងព្រះរាជអាជ្ញា បានដាក់គំនាបលើជនជាប់ចោទ និងមេធាវីការពារក្ដីជនជាប់ចោទមិនឲ្យបកស្រាយរឿងរ៉ាវដែលបានកើតឡើងនៅពេលចាប់ខ្លួន។
លោកថា វាសនាជនជាប់ចោទទាំង ២៣នាក់ អាស្រ័យលើការចរចារបស់បក្សនយោបាយជាប់ឆ្នោតទាំងពីរ ដោះស្រាយបញ្ហានយោបាយជាប់គាំងសព្វថ្ងៃ៖ «ខ្ញុំគិតថា រឿងអ្នកទាំង ២៣នាក់នេះជារឿងនយោបាយ ហើយអ្នក ២៣នាក់ ជាចំណាប់ខ្មាំងនយោបាយ អ៊ីចឹងអ្វីដែលកាត់ក្ដីថ្ងៃនេះ បើសិនចៅក្រមកាត់ក្ដីលើគោលការណ៍ឯករាជ្យ អព្យាក្រឹតនោះ យុត្តិធម៌នឹងមានដល់អ្នកទាំងអស់គ្នា។ ប៉ុន្តែបើតាមការជជែកដេញដោលតាមនីតិវិធីនៅក្នុងសវនាការថ្ងៃនេះ ខ្ញុំគ្មានសង្ឃឹមទេសម្រាប់យុត្តិធម៌ ប៉ុន្តែខ្ញុំគិតថា បើស្ថានការណ៍នយោបាយអាចនឹងប្រែប្រួល អាចអ្នកទាំងអស់រួចខ្លួន»។
ចំណែកលោក សំ សុគង់ មេធាវីការពារក្ដីជនជាប់ចោទ ១០នាក់ រួមទាំងលោក វន់ ពៅ ផង អះអាងដូចលោក អំ សំអាត ដែរ។
រីឯអ្នកស្រី ប្រាក់ សុវណ្ណរី ប្រពន្ធលោក វន់ ពៅ បញ្ជាក់ថា បើទោះបីដំណើរការសវនាការនេះមានភាពលំអៀងទៅរដ្ឋាភិបាលយ៉ាងណាក្ដី ក៏អ្នកស្រីសប្បាយចិត្ត ព្រោះលើកនេះតុលាការមិនពន្យារពេលយូរ ដោយបន្តបើកសវនាការរឿងប្ដីរបស់អ្នកស្រីដូចលើកមុន។
សវនាការបានបញ្ចប់នៅម៉ោងជិត ៤ល្ងាច។ លោក វន់ ពៅ និងជនជាប់ចោទទាំង ២២នាក់ទៀតត្រូវបានប៉ូលិសបញ្ជូនខ្លួនចូលឡាននៅបរិវេណតុលាការ មិនអនុញ្ញាតឲ្យជួបអ្នកកាសែត ឬថតរូបឡើយ។
ចំណែកក្រុមអ្នកតវ៉ាវិញក៏បាននាំគ្នារំសាយដែរ។ ប៉ូលិសបានបើកផ្លូវមុខតុលាការ ដែលបានបិទអស់រយៈពេលមួយថ្ងៃមកហើយនោះ ឲ្យចរាចរដូចដើមវិញ នៅម៉ោង ៥ល្ងាច ថ្ងៃដដែល។
សាលាដំបូងរាជធានីភ្នំពេញ បើកសវនាការកាត់ក្ដី លោក វន់ ពៅ សកម្មជនសិទ្ធិមនុស្ស កម្មករ និងអ្នកតវ៉ា ២២នាក់ផ្សេងទៀត ក្រោមការការពារពីកងកម្លាំងប៉ូលិស ប៉េអិម យ៉ាងប្រុងប្រយ័ត្ន។
តុលាការភ្នំពេញ បានបើកសវនាការករណី លោក វន់ ពៅ និងមនុស្ស ២២នាក់ជាពីរសវនាការ។ សវនាការទី១ មានក្រុមលោក វន់ ពៅ មានមនុស្ស ១០នាក់ ដែលត្រូវបានចាប់ខ្លួននៅរោងចក្រយ៉ាកជីន និងសវនាការទី២ ក្រុមជនជាប់ចោទនៅផ្លូវ វ៉េង ស្រេង ចំនួន ១៣នាក់។
ចំណែកឯងនៅខាងក្រៅបរិវេណជុំវិញតុលាការ កាលពីព្រឹកថ្ងៃនេះ កងកម្លាំងអាជ្ញាធរបានដាក់ពង្រាយបិទច្រកផ្លូវជាច្រើនដែលមិនអាចចេញចូលទៅកាន់អាគារតុលាការឡើយ។
សហជីពកម្មករ សមាជិកសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធរបស់លោក វន់ ពៅ អ្នកមានជម្លោះដីធ្លី ជាពិសេសអ្នកបឹងកក់ និងព្រះសង្ឃជាដើម សរុបប្រមាណ ៣០០នាក់ ប្រមូលផ្ដុំគ្នានៅលើច្រកផ្លូវចូលទៅខាងមុខតុលាការ ដោយចែកជា ២ក្រុម។ មួយក្រុមនៅក្បែររង្វង់មូលអាងទឹក និងមួយក្រុមទៀត នៅរង្វង់មូលវត្តព្រះពុទ្ធ។ ពួកគេស្រែកតវ៉ាអោយអាជ្ញាធរពាក់ព័ន្ធដោះលែងអ្នកទាំង ២៣នាក់អោយមានសេរីភាព។
នៅម៉ោងជាង ៨ព្រឹក នៅក្បែររង្វង់មូលមុខវត្តព្រះពុទ្ធ មានការប៉ះទង្គិចមួយរវាងអ្នកតវ៉ា និងក្រុមសន្តិសុខសណ្ដាប់ធ្នាប់សាលាខណ្ឌដូនពេញ។ ការប៉ះទង្គិចនោះកើតឡើងនៅពេលដែលអ្នកតវ៉ា និងព្រះសង្ឃជាច្រើនអង្គប៉ុនប៉ងចូលទៅខាងមុខតុលាការ។
ក្រុមអ្នកតវ៉ាបានតដៃបណ្ដាលអោយសន្តិសុខមួយចំនួនរបួសស្រាល ហើយពួកគេបានដកថយទៅវិញ។
សូមស្ដាប់សេចក្ដីរាយការណ៍របស់លោក ម៉ម មុនីរតន៍ ដែលបានឃ្លាំមើលដំណើរការសវនាការដូចតទៅ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។