មន្ត្រីអយ្យការសាលាដំបូងខេត្តមណ្ឌលគិរី ចេញដីកាកោះហៅតំណាងសហគមន៍ប៊ូស្រាចំនួន ៤នាក់ ឲ្យចូលទៅបំភ្លឺក្នុងនាមជាដើមបណ្ដឹងបរិហារមន្ត្រីមូលដ្ឋាន និងមន្ត្រីជំនាញបរិស្ថាន ៧នាក់ពីបទបណ្តែតបណ្តោយឲ្យមានការកាប់រានព្រៃក្នុងតំបន់អភិរក្សភ្នំណាំលៀ។
សមាជិកសហគមន៍ប៊ូស្រាចំនួន ១០នាក់ គ្រោងនាំគ្នាធ្វើដំណើរទៅសាលាដំបូងខេត្តមណ្ឌលគិរី ដើម្បីអមដំណើរតំណាងពួកគេចូលបំភ្លឺជាដើមបណ្ដឹងបរិហារមន្ត្រី ៧រូប ដែលអ្នកភូមិចោទប្រកាន់ថា ធ្វេសប្រហែសនាំឲ្យមានការកាប់រានព្រៃក្នុងដែនសមត្ថកិច្ចរបស់ខ្លួន។
ព្រះរាជអាជ្ញារងសាលាដំបូងខេត្តមណ្ឌលគិរី លោក សូ សុវិជ្ជា បានចេញលិខិតចំនួន៤ ផ្សេងគ្នាកោះហៅតំណាងសហគមន៍ រួមមាន ឈ្មោះ ក្រើង តុលា ថ្លាង ថូ ស្រោង ក្រុន និង តយ ញ៉ាន ឲ្យចូលបំភ្លឺនៅការិយាល័យមន្ត្រីអយ្យការវេលាម៉ោង ២រសៀលនៅថ្ងៃទី៣ ខែមីនា។
តំណាងមួយរូប គឺលោក ថ្លាង ថូ បង្ហាញជំហរពេញចិត្តចំពោះដីកាកោះហៅនេះ និងចាត់ទុកចំណាត់ការរបស់មន្ត្រីអយ្យការ ថាជាការឆ្លើយតបទាន់ពេលវេលាទៅនឹងពាក្យបណ្ដឹងរបស់សហគមន៍ ដែលខិតខំអភិរក្សធនធានធម្មជាតិ។ លោកបន្តថា តំណាងទាំង ៤រូប រួមទាំងសមាជិកសហគមន៍ផ្សេងទៀត ត្រៀមខ្លួនរួចហើយ ដើម្បីបង្ហាញភស្តុតាងទាក់ទិនការកាប់រានព្រៃយកដីដែលសហគមន៍បានរកឃើញ និងថតរូបវត្ថុតាងទាំងអស់សម្រាប់ជូនមន្ត្រីអយ្យការបើកការស៊ើបអង្កេត៖ « រឿងអីមិនពេញចិត្ត ដោយសារខាងអាជ្ញាធរគាត់មិនអើពើ ដឹងហើយធ្វើមិនដឹង ឃើញហើយធ្វើមិនឃើញអ៊ីចឹងណា !»។
កាលពីខែកុម្ភៈ តំណាងសហគមន៍ប៊ូស្រាមានគ្នា ៩នាក់ បានដាក់ពាក្យប្ដឹងទៅស្ថាប័នអយ្យការសាលាដំបូងខេត្ត និងប្ដឹងបន្ថែមទៅក្រសួងបរិស្ថាន ក្រសួងរៀបចំដែនដី នគរូបនីយកម្ម និងស្ថាប័នរដ្ឋសភា ក្រោយពេលអ្នកភូមិរកឃើញសកម្មភាពកាប់រានព្រៃយកដីច្រើនកន្លែងក្នុងតំបន់អភិរក្សដែនជម្រកសត្វព្រៃភ្នំណាំលៀ។
អ្នកនាំពាក្យ និងជាព្រះរាជអាជ្ញារងសាលាដំបូងខេត្តមណ្ឌលគិរី លោក សូ សុវិជ្ជា បញ្ជាក់នៅថ្ងៃទី២ ខែមីនា ថា ការកោះហៅនេះជាការបំពេញនីតិវិធីស៊ើបអង្កេតបឋម ដើម្បីពិនិត្យអង្គហេតុរបស់ដើមបណ្ដឹង មុននឹងសម្រេចកោះហៅជនសង្ស័យមកសាកសួរបន្ត។ លោកថា មន្ត្រីអយ្យការនឹងសម្រេចចោទប្រកាន់ ឬសម្រេចមិនចាត់ការលើពាក្យបណ្ដឹងសហគមន៍ ប្រសិនបើការស៊ើបអង្កេតបឋមទទួលបានលទ្ធផលយ៉ាងណា៖ « យើងចាប់ផ្ដើមអង្កេតបឋមហើយហ្នឹង។ វគ្គដំបូងត្រូវហៅគាត់សិន គាត់ជាដើមបណ្ដឹង ដើម្បីសាកសួរ។ តើវាមានអង្គហេតុអត់ ? កើតនៅកន្លែងណា ?»។
មន្ត្រីទាំង ៧នាក់ដែលសហគមន៍ដាក់ពាក្យប្ដឹងរួមមាន មេភូមិពូឡេះ លោក ព្យឺយ គីម មេឃុំដាក់ដាំ លោក សម វណ្ណី មេឃុំប៊ូស្រា លោក យើត សារីន អភិបាលស្រុកពេជ្រាដា លោក នួន សារ៉ន អភិបាលស្រុកអូររាំង លោក ណង ទុនណ្ណារី អនុប្រធានដែនជម្រកសត្វព្រៃភ្នំណាំលៀ លោក ហាន ខន និងប្រធានមន្ទីរបរិស្ថានខេត្ត លោក កែវ សុភ័ក្រ។
មន្ត្រីសម្របសម្រួលសមាគមអាដហុក (ADHOC)ខេត្តមណ្ឌលគិរី លោក សុក រដ្ឋា កត់សម្គាល់ថា បណ្ដឹងសហគមន៍មានចរិតអភិរក្សធនធានធម្មជាតិទ្រព្យសម្បត្តិរបស់រដ្ឋ។ ហេតុនេះ លោករំពឹងថា មន្ត្រីអយ្យការនឹងស៊ើបអង្កេតជាក់លាក់ឆ្លើយតបទៅនឹងការខិតខំប្រឹងប្រែងរបស់សហគមន៍។ លោកថា មន្ត្រីអយ្យការគួរចុះទៅទីតាំងផ្ទាល់ ដើម្បីវាយតម្លៃអង្គហេតុបានកាន់តែច្បាស់៖ « ចំពោះការចូលបំភ្លឺរបស់ពួកគាត់ ក្នុងនាមសង្គមស៊ីវិលយើងសូមលើកទឹកចិត្តសហគមន៍ដែលគាត់មានមនសិការចូលរួមការពារធនធានធម្មជាតិ »។
កាលពីចុងខែធ្នូ ឆ្នាំ២០១៦ សហគមន៍ប៊ូស្រា បានចុះល្បាតព្រៃពីរលើកក្នុងដែនជម្រកសត្វព្រៃភ្នំណាំលៀ ក្បែរតំបន់ប៉ុស្តិ៍នគរបាលការពារព្រំដែនលេខ៧ និងលេខ៨ ព្រំប្រទល់ស្រុកពេជ្រាដា និងស្រុកអូររាំង។ ក្នុងពេលល្បាតព្រៃនេះ សហគមន៍រកឃើញព្រៃឈើជាច្រើនចំណុចនៅតំបន់នោះរងការកាប់រានយកដីថ្មីៗ ដែលសហគមន៍ប៉ាន់ប្រមាណថាមានចំនួន ១ពាន់ហិកតារ និងបានរកឃើញរោងស្នាក់នៅរបស់ប៉ូលិសមួយក្រុម ដែលបោះទីតាំងក្នុងព្រៃយាមការពារសកម្មភាពកាប់រានព្រៃនោះទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។