អ្នកភូមិនៅឃុំតាជេស ខេត្តកំពង់ឆ្នាំង ចំនួន ៥នាក់ បានដាក់បណ្ដឹងជាប់ៗគ្នាទៅឧត្ដមក្រុមប្រឹក្សានៃអង្គចៅក្រម និងក្រសួងយុត្តិធម៌ ដើម្បីឲ្យជួយអន្តរាគមន៍សើរើសំណុំរឿងចាប់ពួកគាត់ដាក់គុកទាំងអយុត្តិធម៌។ តំណាងដើមបណ្ដឹងនេះមានសង្ឃឹមតិចតួចប៉ុណ្ណោះ ថានឹងទទួលបានយុត្តិធម៌ឡើងវិញ ដោយពួកគេយល់ថា ប្រព័ន្ធតុលាការនៅកម្ពុជា មានស្តង់ដារពីរ។
ពាក្យថាប្រព័ន្ធតុលាការមានស្តង់ដារពីរ ដែលអ្នកភូមិមានជម្លោះដីធ្លីរ៉ាំរ៉ៃជាមួយក្រុមហ៊ុន ខេ.ឌី.ស៊ី (KDC) លើកឡើងនាពេលនេះ បន្ទាប់ពីពួកគេត្រូវបានព្រះរាជអាជ្ញារង និងចៅក្រមស៊ើបសួរនៃសាលាដំបូងខេត្តកំពង់ឆ្នាំង ចាប់ដាក់គុកជាង ១ខែ និងខ្លះកន្លះខែ កាលពីចុងឆ្នាំ២០១៤។ ពួកគេថា ចៅក្រមមានភាពលម្អៀងទៅរកភាគីក្រុមហ៊ុនដោយមិនចោទប្រកាន់ ឬចាប់កម្មករដែលបានបង្ករបួសស្នាមដាក់គុកនោះទេ។
ពលរដ្ឋ និងជាដើមបណ្ដឹងម្នាក់ គឺលោក សៀង ហេង មានប្រសាសន៍នៅថ្ងៃទី២០ ខែធ្នូ ថា នៅថ្ងៃទី១៥ និងថ្ងៃទី១៨ ខែធ្នូ ឆ្នាំ២០១៥ ពាក្យបណ្ដឹងសុំបដិសេធរបាយការណ៍របស់តំណាងអយ្យការ នៃសាលាដំបូងខេត្តកំពង់ឆ្នាំង បានដាក់ចូលស្ថាប័នទាំងពីររួចហើយ។ លោកថា របាយការណ៍បំភ្លឺរបស់តំណាងអយ្យការជូនទៅក្រសួងយុត្តិធម៌ តបតាមបណ្ដឹងពលរដ្ឋនោះ គឺមានលក្ខណៈបំផ្លើសការពិត៖ «អានេះយើងដាក់ដើម្បីបំពេញទៅតាមផ្លូវច្បាប់ កុំឲ្យគេបន្ទោសមកថា ពេលមានកង្វល់ ឬមានបញ្ហាអ្វីមួយមិនដែលឃើញមានបណ្ដឹងទៅក្រសួង ឬស្ថាប័នណាមួយរបស់រដ្ឋទេ។ កន្លងមក គេចោទលើយើងអ៊ីចឹង»។
របាយការណ៍កម្រាស់បីទំព័ររបស់តំណាងអយ្យការ នៃសាលាដំបូងខេត្តកំពង់ឆ្នាំង ចុះហត្ថលេខាដោយព្រះរាជអាជ្ញា លោក យូ ទិត្យវឌ្ឍនៈ កាលពីថ្ងៃទី១៩ ខែឧសភា ឆ្នាំ២០១៥ ផ្ញើជូនរដ្ឋមន្ត្រីក្រសួងយុត្តិធម៌ បង្ហាញថា លោកជំទាវ ជា ខេង បានជួលកម្មករធ្វើរបងព័ទ្ធដីគាត់នៅចំណុចភូមិឡពាង ស្រាប់តែនៅថ្ងៃទី១៧ ខែកក្កដា ឆ្នាំ២០១៤ មានពលរដ្ឋមករំខាន និងបង្ករបួសដល់កម្មករ ៦នាក់ទៀតផង។
ក្រោយមក តំណាងកម្មករ លោក ថៃ ហ៊ី បានដាក់ពាក្យបណ្ដឹងទៅអធិការដ្ឋាននគរបាលស្រុកកំពង់ត្រឡាច។ មកដល់ថ្ងៃទី២១ ខែកក្កដា ឆ្នាំ២០១៤ សមត្ថកិច្ចនគរបាលខេត្តកំពង់ឆ្នាំង បានឃាត់ខ្លួន លោក ម៉ាង យ៉ាវ និងលោក សៀង ហេង។ ក្រោយមក អ្នកទាំងពីរបានសារភាពថា ខ្លួនពិតជាបានប្រើចម្ពាមគ្រាប់ដែក ធ្នូ ដបសាំងកែច្នៃ ដែកត្បែង ចបជីក និងញញួរ វាយទម្លុះរបងជិត ១០ប្រឡោះ និងវាយប្រហារទៅលើកម្មករដែលកំពុងធ្វើរបងនោះពិតមែន។
ក្រោយមកទៀត គឺនៅថ្ងៃទី២២ ខែកក្កដា ឆ្នាំ២០១៤ សំណុំរឿងនេះបានបញ្ជូនទៅដល់អយ្យការនៃសាលាដំបូងខេត្តកំពង់ឆ្នាំង ហើយតំណាងអយ្យការ បានចោទប្រកាន់ជនដៃដល់ចំនួន ១០នាក់ ពីបទហិង្សាដោយចេតនាមានស្ថានទម្ងន់ទោស និងធ្វើឲ្យខូចខាតដោយចេតនាមានស្ថានទម្ងន់ទោស តាមមាត្រា២១៧ មាត្រា២១៨ មាត្រា៤១០ និងមាត្រា៤១១ នៃក្រមព្រហ្មទណ្ឌ។
លុះមកដល់ថ្ងៃទី១១ ខែសីហា ឆ្នាំ២០១៤ ចៅក្រមស៊ើបសួរចេញដីកានាំខ្លួនជនត្រូវចោទចំនួន ៦នាក់ទៀត ប៉ុន្តែពេលនោះ នាំខ្លួនបានតែ លោក ស្ងួន ញឿន លោក គុជ ហុក និងលោក ស្រ៊ុន ផា ហៅ លូ។ រហូតមកដល់ថ្ងៃទី២៩ ខែសីហា ឆ្នាំ២០១៤ ចៅក្រមចេញដីកាឲ្យនៅក្រៅឃុំបណ្ដោះអាសន្ន និងដាក់ឲ្យជនដែលឃាត់ខ្លួនបានទាំង ៥នាក់ ឋិតនៅក្រោមការត្រួតពិនិត្យតាមផ្លូវតុលាការវិញ។
ពលរដ្ឋបញ្ជាក់ថា របាយការណ៍របស់តំណាងអយ្យការនេះមានលក្ខណៈបំផ្លើសការពិតច្រើនចំណុច ហើយពួកគាត់បានប្ដឹងទៅក្រសួងយុត្តិធម៌ និងឧត្ដមក្រុមប្រឹក្សានៃអង្គចៅក្រមជួយអន្តរាគមន៍។
នៅក្នុងពាក្យបណ្ដឹងរបស់ពលរដ្ឋ បានស្នើឲ្យស្ថាប័នយុត្តិធម៌ទាំងពីរ សុំស៊ើបអង្កេតពីចំណាត់ការដែលមានលក្ខណៈលម្អៀង និងរើសអើងរបស់ចៅក្រម ញូង ចន្ធី និងតំណាងអយ្យការសាលាដំបូងខេត្តកំពង់ឆ្នាំង លើសំណុំរឿងពួកគាត់។ ពួកគាត់ក៏ស្នើឲ្យមោឃភាពការកសាងសំណុំរឿងរបស់ពលរដ្ឋចោល និងសុំឲ្យមានការអន្តរាគមន៍ឲ្យព្រះរាជអាជ្ញាសាលាដំបូងខេត្តកំពង់ឆ្នាំង ធ្វើការចោទប្រកាន់ទៅលើឈ្មោះ ថៃ ហ៊ី ស៊ិន ឃីម និងបក្ខពួក ពីបទប្រើហិង្សាដោយចេតនាមកលើពលរដ្ឋកាលពីពេលកន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។