ប៉ូលិសការិយាល័យប្រឆាំងការជួញដូរ និងការពារអនីតិជននៃស្នងការនគរបាលខេត្តសៀមរាប បានចាប់ខ្លួនបុរសជនជាតិកាណាដា (Canada) ម្នាក់ ពីបទប្រព្រឹត្តអំពើអនាចារលើកុមារខ្មែរ។
អធិការនគរបាលក្រុងសៀមរាប គឺលោក ទិត្យ ណារ៉ុង។ លោកបានមានប្រសាសន៍កាលពីរសៀលថ្ងៃអង្គារ ទី២៥ ខែកុម្ភៈ ថា កាលពីថ្ងៃទី២៣ ខែកុម្ភៈ កន្លងទៅកម្លាំងរបស់លោកដែលសហការជាមួយប៉ូលិសនៃការិយាល័យ ប្រឆាំងការជួញដូរ និងការពារអនីតិជន បានចាប់ខ្លួនបុរសជនជាតិកាណាដា ម្នាក់ឈ្មោះ ព្យែរ៍ ឌីស្តូ រីយើ (Pierre Destauriers) អាយុ ៧០ឆ្នាំ ដែលបានជួលបន្ទប់ស្នាក់នៅ១កន្លែងក្នុងសង្កាត់ស្លក្រាម៖ «ខាងជំនាញជួញដូរ គេតាមយូរហើយ វាអំពើអនាចារ អំពើអាស វារួមភេទជាមួយក្មេងប្រុសៗ។ ដល់ពេលវាភ័យ វាទៅវាគេចទៅជួលបន្ទប់នៅជិតប៉ុស្តិ៍ប៉ូលិស។ ពេលដឹងថា យើងទៅចាប់វាៗក៏ចូលទៅក្នុងបន្ទប់ទឹក វាអារដៃ វាធ្វើដូចជាញៀនថ្នាំ ក៏ប៉ុន្តែឯកសារគេមានគ្រប់គ្រាន់ហើយ»។
ប្រធានការិយាល័យប្រឆាំងការជួញដូរ និងការពារអនីតិជន លោក ជា ហេង បានឱ្យដឹងថា ប៉ូលិសបានកសាងសំណុំរឿងបុរសម្នាក់នោះ ពាក់ព័ន្ធនឹងការរួមភេទជាមួយអនីតិជនដែលមានអាយុក្រោម ១៥ឆ្នាំ។ បច្ចុប្បន្ន បុរសជនជាតិកាណាដា រូបនោះមិនទាន់បញ្ជូនខ្លួនទៅឱ្យតុលាការនៅឡើយទេ ដោយកំពុងតែព្យាបាលរបួស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។