តុលាការកំពូល សម្រេចលើកពេលបើកសវនាការលើបណ្ដឹងសុំនៅក្រៅឃុំរបស់មន្ត្រីការពារសិទ្ធិមនុស្សសមាគមអាដហុក (ADHOC) ៤រូប និងមន្ត្រី គ.ជ.ប ១រូប ទៅជំនុំជម្រះនៅព្រឹកថ្ងៃទី៦ ខែមីនា ខាងមុខវិញ បន្ទាប់ពីខកខានមិនបានជំនុំជម្រះនៅព្រឹកថ្ងៃទី២៧ កុម្ភៈ នេះ។
លោក ហួន ជុនឌី មេធាវីមួយរូបក្នុងចំណោមមេធាវី ៥រូប ដែលការពារក្ដីឲ្យមន្ត្រីអាដហុក បញ្ជាក់ថា មូលហេតុលើកពេលសវនាការនេះ ដោយសារតែការឆ្លើយឆ្លងលិខិតរដ្ឋបាលយឺតយ៉ាវ។ មានន័យថា មន្ត្រីពន្ធនាគារមិនបានទទួលដីកាកោះ ហើយក៏មិនបាននាំអ្នកទាំងប្រាំទៅកាន់តុលាការកំពូលនោះទេ។ លោកមេធាវីបន្តថា ការពន្យារពេលជំនុំជម្រះនេះ គឺបណ្ដាលឲ្យប៉ះពាល់ដល់សិទ្ធិកូនក្តីរបស់លោក ព្រោះថាពួកគេមានសិទ្ធិទទួលបានការជំនុំជម្រះដោយឆាប់រហ័ស និងយុត្តិធម៌។
កាលពីថ្ងៃទី២៣ ខែកុម្ភៈ សាលាឧទ្ធរណ៍បានសម្រេចច្រានចោលបណ្ដឹងសុំនៅក្រៅឃុំរបស់អ្នកទាំង ៥នាក់ហើយ ដោយសំអាងហេតុថា បារម្ភខ្លាចរត់គេចខ្លួន និងស្ថិតក្នុងដំណាក់កាលនៃការស៊ើបអង្កេតនៅឡើយ។
ទោះយ៉ាងណា លោកមេធាវី ហួន ជុនឌី អះអាងថា ការសុំនៅក្រៅឃុំនេះ គឺកូនក្តីរបស់លោកមានហេតុផលច្បាស់លាស់ ដោយមិនចាំបាច់បន្តឃុំខ្លួនទៀតនោះទេ។
សកម្មជនសិទ្ធិមនុស្សអាដហុក ទាំង ៤រូប មានលោក នី សុខា លោក ណៃ វ៉ង់ដា លោក យី សុខសាន្ត និងអ្នកស្រី លឹម មុន្នី ត្រូវបានសាលាដំបូងរាជធានីភ្នំពេញ សម្រេចឃុំខ្លួនបណ្ដោះអាសន្ន ក្រោមបទចោទសូកប៉ាន់សាក្សីតាមមាត្រា៥៤៨ នៃក្រមព្រហ្មទណ្ឌ ហើយមន្ត្រី គ.ជ.ប លោក នី ចរិយា ជាប់ចោទពីបទសមគំនិតក្នុងករណីដូចគ្នានេះដែរ កាលពីដើមខែឧសភា ឆ្នាំ២០១៦។ អ្នកទាំង ៥នាក់ ត្រូវបានអង្គភាពប្រឆាំងអំពើពុករលួយចោទប្រកាន់កាលពីខែមេសា ឆ្នាំ២០១៦ ពាក់ព័ន្ធរឿងក្ដីដ៏ចម្រូងចម្រាសជាមួយអ្នកនាង ខុម ចាន់តារាទី ហៅស្រីមុំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។