សមាគមការពារសិទ្ធិមនុស្សអាដហុក (ADHOC) នៅថ្ងៃទី២០ ឧសភា សម្រេចដាក់ពាក្យប្ដឹងទៅស្ថាប័នប្រព័ន្ធយុត្តិធម៌ថ្នាក់លើប្រឆាំងព្រះរាជអាជ្ញារងម្នាក់ និងចៅក្រមស៊ើបសួរម្នាក់នៃសាលាដំបូងខេត្តសៀមរាប ទាក់ទងនឹងរឿងចាប់ឃុំខ្លួនពលរដ្ឋពីររូបក្នុងរឿងជម្លោះដីធ្លី។
យ៉ាងហោចណាស់មានស្ថាប័នយុត្តិធម៌ចំនួន ២ ដែលសមាគមការពារសិទ្ធិមនុស្សអាដហុក បានដាក់ពាក្យប្ដឹងប្រឆាំងព្រះរាជអាជ្ញា និងចៅក្រមនៃតុលាការខេត្តសៀមរាប នោះ នៅថ្ងៃទី២០ ខែឧសភា។
ប្រធានផ្នែកស៊ើបអង្កេត និងគ្រប់គ្រងផ្នែកច្បាប់នៃសមាគមការពារសិទ្ធិមនុស្សអាដហុក លោក នី ចរិយា ឱ្យដឹងនៅល្ងាចថ្ងៃទី២០ ខែឧសភា ថា ពាក្យបណ្ដឹងរបស់លោក ដែលប្ដឹងព្រះរាជអាជ្ញារង លោក សុក កែវបណ្ឌិត និងចៅក្រមស៊ើបសួរ លោក គី ឫទ្ធី នៃសាលាដំបូងខេត្តសៀមរាបនោះ គឺក្រសួងយុត្តិធម៌ និងតុលាការកំពូលបានទទួលហើយ៖ «មានត្រាគេវាយនៅលើពាក្យបណ្ដឹងរបស់យើង។ មកដល់ថ្មើរហ្នឹង យើងដាក់បានពីរស្ថាប័ន គឺបានក្រសួងយុត្តិធម៌ និងតុលាការកំពូល។ នៅអគ្គព្រះរាជអាជ្ញាសាលាឧទ្ធរណ៍ នៅឧត្ដមក្រុមប្រឹក្សានៃអង្គចៅក្រម ព្រោះបិទទ្វារអស់យើងទៅអត់ទាន់ ចេញពីធ្វើការអស់»។
លោក នី ចរិយា មានប្រសាសន៍បន្ថែមថា លោកនឹងបន្តដាក់ពាក្យបណ្ដឹងទៅស្ថាប័នពីរទៀត គឺអគ្គព្រះរាជអាជ្ញាអមសាលាឧទ្ធរណ៍ និងឧត្ដមក្រុមប្រឹក្សានៃអង្គចៅក្រម។
កាលពីថ្ងៃទី៤ ខែមករា ចៅក្រមស៊ើបសួរសម្រេចឃុំខ្លួនអ្នកភូមិ ២នាក់ ឈ្មោះ បឿន សុខ និង វ៉ែន ឡន ដោយអះអាងថា ស្របតាមនីតិវិធី ដែលច្បាប់ដោយកំណត់ គឺផ្អែកលើគតិច្បាប់សុទ្ធសាធ។
លោក នី ចរិយា ថ្លែងថា ការចាប់ឃុំខ្លួនអ្នកភូមិទាំងនេះ គឺខុសនីតិវិធី និងរំលោភវិជ្ជាជីវៈរបស់ខ្លួន ហើយរំលោភសិទ្ធិរបស់ពលរដ្ឋដែលមិនអាចទទួលយកបាន។
ដោយឡែក មេធាវីនៃសមាគមការពារសិទ្ធិមនុស្សអាដហុក ប្រចាំខេត្តសៀមរាប ដែលការពារក្ដីឱ្យអ្នកភូមិទាំងពីរនាក់ គឺអ្នកស្រី ពូក យ៉ារ៉ាន់ មានប្រសាសន៍នៅក្នុងសន្និសីទសារព័ត៌មានថ្ងៃទី២០ ឧសភា ថា ការចាប់ខ្លួនកូនក្ដីរបស់អ្នកស្រី គឺមិនត្រឹមត្រូវតាមមូលដ្ឋានច្បាប់ទេ៖ «គេចោទប្រកាន់គាត់ពីបទធ្វើឱ្យខូចខាតដោយចេតនាមានស្ថានទម្ងន់ទោស និងកាន់កាប់ថ្មីលើអចលនវត្ថុរបស់បុគ្គលឯកជន ដោយគ្មានភស្តុតាងណាមួយបញ្ជាក់។ ខ្ញុំយល់ថា គ្មានមូលដ្ឋានផ្លូវច្បាប់ក្នុងការចោទប្រកាន់កូនក្ដីខ្ញុំ ទីមួយ។ ទីពីរ គ្មានភស្តុតាងណាមួយដែលបញ្ជាក់ថា កូនក្ដីរបស់នាងខ្ញុំ បានប្រព្រឹត្តដូចការចោទប្រកាន់»។
វិទ្យុអាស៊ីសេរី មិនអាចទាក់ទងលោកព្រះរាជអាជ្ញា សុក កែវបណ្ឌិត និងលោកចៅក្រម គី ឫទ្ធី ដើម្បីឆ្លើយតបជុំវិញការប្ដឹងផ្ដល់នេះបានទេ រហូតមកដល់ល្ងាចថ្ងៃទី២០ ឧសភា។ ទោះជាដូច្នេះក្ដី កាលពីថ្ងៃទី១៥ ឧសភា ស្ថាប័នអយ្យការអមសាលាដំបូងខេត្តសៀមរាប បានចេញសេចក្ដីថ្លែងការណ៍ជាសាធារណៈមួយដោយបដិសេធការចោទប្រកាន់របស់លោក នី ចរិយា និងមេធាវី ពូក យ៉ារ៉ាន់ ដែលមន្ត្រីនៃអង្គការការពារសិទ្ធិមនុស្សអាដហុក។ ស្ថាប័នអយ្យការដដែល ចាត់ទុកការចោទប្រកាន់ទាំងនោះថា ជាការបំផ្លើស ញុះញង់។
កាលពីថ្ងៃទី២ ខែមេសា ចៅក្រមស៊ើបសួរ លោក គី ឫទ្ធី ថ្លែងថា ព្រះរាជអាជ្ញាដែលដឹកនាំប៉ូលិសចុះទៅចាប់ខ្លួនអ្នកភូមិពីរនាក់ គឺឈ្មោះ សុក បឿន និង វ៉ែន ឡន ដោយសារតែពួកគាត់ទៅកាប់បំផ្លាញដំឡូងមីរបស់ក្រុមហ៊ុន ហើយចូលទៅសង់ខ្ទមលើដីរបស់គេ។ ពេលនោះ គឺប៉ូលិសបានបង្ក្រាបលើបទល្មើសជាក់ស្ដែង ទើបតុលាការសម្រេចឃុំខ្លួនបុរសទាំង ២ ជាបណ្ដោះអាសន្ន។ មន្ត្រីអង្គការការពារសិទ្ធិមនុស្សអាដហុក ចាត់ទុកការចាប់ខ្លួនថាខុសច្បាប់ ព្រោះនៅខុសទីតាំងដីមានជម្លោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។