សាលាឧទ្ធរណ៍បានប្រកាសរក្សាសាលក្រមរបស់សាលាដំបូងខេត្តពោធិ៍សាត់ ទុកជាបានការនៅថ្ងៃទី១៧ ខែឧសភា ក្នុងសំណុំរឿងសកម្មជនបក្សសង្គ្រោះជាតិ ម្នាក់ ពីបទចោទកាប់រុករានដីព្រៃរបស់រដ្ឋនៅស្រុកក្រគរ ឲ្យជាប់ពន្ធនាគារ ៥ឆ្នាំ។ សាច់ញាតិជនជាប់ចោទបានសម្ដែងការខកចិត្តចំពោះការប្រកាសសាលដីកាសាលាឧទ្ធរណ៍ ថាមិនបានផ្ដល់យុត្តិធម៌ជូនអ្នករងគ្រោះក្នុងរឿងដីធ្លីពិតប្រាកដ។
មេធាវីការពារក្ដីជនជាប់ចោទពីបទកាប់រុករានដីព្រៃរបស់រដ្ឋនៅស្រុកក្រគរ ខេត្តពោធិ៍សាត់ បន្តដាក់ពាក្យប្ដឹងសាទុក្ខទៅតុលាការកំពូលទៀតដើម្បីស្វែងរកយុត្តិធម៌ជូនកូនក្ដី។
មេធាវីការពារក្ដីនៃអង្គការលីកាដូ (LICADHO) អ្នកស្រី សន ស៊ូដាលែន មិនបកស្រាយចំពោះភស្តុតាងដែលនឹងបន្តដាក់ពាក្យជំទាស់ចំពោះសាលដីកាសាលាឧទ្ធរណ៍នៅពេលនេះទេ។ ប៉ុន្តែអ្នកស្រីបញ្ជាក់ថា ដាក់បន្តនីតិវិធីនេះដើម្បីស្វែងរកយុត្តិធម៌ដល់កូនក្ដីរបស់អ្នកស្រី៖ «ខ្ញុំកំពុងរៀបចំបណ្ដឹងទៅតុលាការកំពូលបន្តទៀត»។
សាលាឧទ្ធរណ៍បានសម្រេចរក្សាសាលក្រមសាលាដំបូងខែត្រពោធិ៍សាត់ ដាក់ទោសអនុប្រធានគណៈកម្មាធិការប្រតិបត្តិស្រុកក្រគរ គណបក្សសង្គ្រោះជាតិ និងជាសមាជិកសមាគមគ្រូបង្រៀនកម្ពុជាឯករាជ្យ លោកគ្រូ សោម សារាវុត នៅថ្ងៃទី១៧ ខែឧសភា នេះ គឺតាមបណ្ដឹងរបស់នាយផ្នែករដ្ឋបាលព្រៃឈើក្រគរ លោក ប៉ុល ចាន់ថា និងមេឃុំស្នាអន្សា លោក មោក កោ។
រហូតមកដល់ពេលនេះ សមត្ថកិច្ចមិនទាន់ចាប់ខ្លួនលោក សោម សារាវុត ទេ។ ប៉ុន្តែមេធាវីរបស់លោកប្រាប់ថា សាលាឧទ្ធរណ៍ចេញសាលដីការក្សាសាលក្រមសាលាដំបូងនេះ គឺសាលាឧទ្ធរណ៍ក៏ចេញដីកាចាប់ខ្លួនដែរ។
បណ្ដឹងនេះធ្វើឡើងក្រោយពីរដ្ឋាភិបាលចេញសេចក្ដីជូនដំណឹងកំណត់ដីទំហំ ៥០០ហិកតារ នៅចំណុចអន្សរក្ដាម ធ្វើជាព្រៃសហគមន៍ កាលពីឆ្នាំ២០១១។
សាច់ញាតិលោក សោម សារាវុត គឺអ្នកស្រី ហម រ៉ា ថ្លែងបន្ទាប់ពីស្ដាប់សវនាការថា ប្អូនប្រុសលោកស្រីមិនមានកំហុសដូចការចោទប្រកាន់ទេ។ លោកស្រីបន្ថែមថា អាជ្ញាធរ និងជំនាញរដ្ឋបាលព្រៃឈើ បានរំលោភយកដីទំហំ ៦៣ហិកតាររបស់អ្នកភូមិសន្សក្ដាម នៃឃុំស្នាអន្សា ចំនួន ២១គ្រួសារ ទៅធ្វើជាព្រៃសហគមន៍។ ត្បិតដីនេះគ្មានប្លង់កម្មសិទ្ធិ ប៉ុន្តែអ្នកភូមិបានកាន់កាប់ និងអាស្រ័យផលតាំងពីឆ្នាំ១៩៨៣ មក បែរជានៅឆ្នាំ២០១៣ អាជ្ញាធរបានប្ដឹងពលរដ្ឋទៅតុលាការដោយចោទថា លោកបានកាប់រានដីព្រៃទៅវិញ៖ «បើខ្ញុំមានខ្ញុំអត់ចង់បានទេ ប៉ុន្តែខ្ញុំអត់ អ៊ីចឹងបានខ្ញុំឆ្អែត។ យុត្តិធម៌វាគ្មាននៅលើលោកនេះមែន យុត្តិធម៌ទៅជាខ្ញុំខុស យកដីរបស់ខ្ញុំហើយ ខ្ញុំខុសទៀត។ បើខ្ញុំយករបស់គេខ្ញុំខុស ខ្ញុំមិនថា ខ្ញុំបានអីចិញ្ចឹមកូនខ្ញុំ។ តាំងពីឆ្នាំ១៩៨៣ ខ្ញុំកាន់កាប់រហេមរហាមដែលមានព្រៃអីកាប់សូម្បីតែបន្តិចបើសិនជា មេឃុំបានប្រាប់ប្រជាពលរដ្ឋខ្ញុំអត់មានសោកស្ដាយទេ តែនេះម៉ែឪធ្វើបាបកូនចៅខ្លួនឯង។ ជួយរកយុត្តិធម៌ឲ្យខ្ញុំផង»។
បើខ្ញុំមាន ខ្ញុំអត់ចង់បានទេ ប៉ុន្តែខ្ញុំអត់ អ៊ីចឹងបានខ្ញុំឆ្អែត។ យុត្តិធម៌វាគ្មាននៅលើលោកនេះមែន យុត្តិធម៌ទៅជាខ្ញុំខុស យកដីរបស់ខ្ញុំហើយ ខ្ញុំខុសទៀត។ បើខ្ញុំយករបស់គេខ្ញុំខុស ខ្ញុំមិនថា។
ពលរដ្ឋមកពីភូមិស្វាយស ឃុំស្នាអន្សា ស្រុកក្រគរ លោកស្រី ស្វាយ ឌី ថ្លែងថា សំណុំរឿងនេះមានភាពមិនប្រក្រតីដែលពាក់ព័ន្ធនឹងអាជ្ញាធរមូលដ្ឋាន ហើយការសម្រេចរបស់តុលាការនៅពេលនេះ គឺធ្វើឲ្យប៉ះពាល់ពលរដ្ឋដល់ទៅ ២១គ្រួសារ ដែលមានជីវភាពក្រលំបាក៖ «ចុះ ចំណែកអ្នកទីក្រុង ឈ្មោះ លោក សោម ប៊ុនធឿន ក្នុងចំណោមដីនោះគឺមានដីលោកមេឃុំ លោកមេឃុំ ផាន លោកតា មាន និងលោក សោម ប៊ុនធឿន គាត់បានលក់ឲ្យអ្នកទាំងអស់នោះ។ ចំណែកដីខ្ញុំនៅពីក្រោយគាត់ គាត់ថាដីសហគមន៍។ ចំណែកដីដែលគេឲ្យបង្កើតធ្វើសហគមន៍ គាត់និយាយថា គាត់រឹបអូសយកពីចិន។ តែចំណែកដីចិន នៅតែដីចិន ត្រង់ហ្នឹងហើយដីដែលគេបង្កើតសហគមន៍គាត់លក់ឲ្យគេអស់ ទើបគាត់មករឹបអូសយកដីប្រជាជនធ្វើជាសហគមន៍វិញ»។
តំណាងសហគមន៍ការពារធនធានធម្មជាតិ លោក គុជ វេង ដែលធ្លាប់ចុះស្វែងយល់ពីបញ្ហានេះ បានស្នើឲ្យមន្ត្រីពាក់ព័ន្ធនឹងស្ថាប័នយុត្តិធម៌ ចុះសិក្សាស្រាវជ្រាវមុននឹងធ្វើការកាត់សេចក្ដីដើម្បីរកយុត្តិធម៌ជូនពលរដ្ឋ និងកុំរើសអើងនិន្នាការបក្សនយោបាយ៖ «មុនចាត់ វិធានការសុំឲ្យទៅពិនិត្យភាពជាក់ស្ដែងសិន រកហេតុផលរកយុត្តិធម៌ឲ្យច្បាស់លាស់សិន ចាប់ដាក់គុក ឬដាក់ទោសពិន័យអីក៏ខ្ញុំអាចទទួលយកបានដែរ ហេតុផលនេះខ្ញុំបានទៅផ្ទាល់ ប៉ុន្តែរឿងនេះអយុត្តិធម៌ទាំងស្រុង យកបង្គោលទៅបោះលើដីអាស្រ័យរបស់ពួកគាត់ ជាភូមិកំណើតតាំងពីបរុមបុរាណមក មិនទំនងដកដីទៅធ្វើដីសហគមន៍អ៊ីចឹងម៉េចកើត ដកពីឯកជនទៅបម្រើប្រយោជន៍សាធារណៈមានតែឲ្យបុគ្គលនោះស្លាប់បាត់ ហើយ»។
អ្នកភូមិអះអាងថា សាលដីការបស់សាលាឧទ្ធរណ៍អយុត្តិធម៌។ ពួកគាត់នឹងហែញត្តិទៅក្រសួងរៀបចំដែនដី នគរូបនីយកម្ម និងសំណង់ទៀត ដើម្បីស្វែងរកយុត្តិធម៌ជូនគ្រូបង្រៀនរូបនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។