ប្រធានក្រុមប្រឹក្សាជំនុំជម្រះសាលាឧទ្ធរណ៍ សម្រេចបន្តឃុំខ្លួន លោកឧកញ៉ា ថោង សារ៉ាត់ ដោយតម្កល់សាលក្រមរបស់សាលាដំបូងរាជធានីភ្នំពេញ ទុកជាបានការដដែល។ មេធាវីការពារក្តីរបស់ លោក ថោង សារ៉ាត់ ចាត់ទុកសេចក្ដីសម្រេចរបស់ក្រុមប្រឹក្សាជំនុំជម្រះនៃសាលាឧទ្ធរណ៍នៅពេលនេះ ថាជាការសម្រេចមិនអាចទទួលយកបាន ព្រោះជាសេចក្ដីសម្រេចមិនបានផ្អែកលើអង្គហេតុ និងខ្វះការពិចារណាឲ្យបានពេញលេញ។
មេធាវីការពារក្ដីរបស់ លោកឧកញ៉ា ថោង សារ៉ាត់ បញ្ជាក់ថា នឹងប្ដឹងបន្តទៀតប្រឆាំងសេចក្ដីសម្រេចរបស់ក្រុមប្រឹក្សាជំនុំជម្រះសាលាឧទ្ធរណ៍នៅពេលនេះ ទៅតុលាការកំពូល បន្ទាប់ពីឯកភាពគ្នារួចពីកូនក្ដីរបស់ខ្លួន។
ការប្រកាសសាលដីកាដ៏ប្រញាប់ ដោយពុំបានទុកពេលអ្វីច្រើនសម្រាប់តតាំងកាលពីព្រឹកថ្ងៃទី២៤ ធ្នូ ដោយប្រធានក្រុមប្រឹក្សាជំនុំជម្រះនៃសាលាឧទ្ធរណ៍នោះ គឺពាក់ព័ន្ធនឹងសំណុំរឿង ការប្រើប្រាស់អាវុធដោយខុសច្បាប់។ ដោយឡែកបទចោទផ្សេងទៀត គឺតុលាការពុំបានលើកមកពិចារណាទេ។ នៅក្នុងអង្គសវនាការ ពុំមានវត្តមាន លោក ថោង សារ៉ាត់ និងឪពុកម្ដាយរបស់លោកឡើយ គឺតំណាងដោយមេធាវីការពារក្តីប៉ុណ្ណោះ។
មេធាវីការពារក្ដីរបស់ លោក ថោង សារ៉ាត់ គឺលោក ទួត លុច អះអាងថា លោកនឹងធ្វើបណ្ដឹងសាទុក្ខបន្តទៀតទៅតុលាការកំពូល បន្ទាប់ពីសេចក្ដីសម្រេចនេះទៅ។ លោកបន្តថា ការប្រកាសសាលដីកាដោយក្រុមប្រឹក្សាជំនុំជម្រះសាលាឧទ្ធរណ៍ កាលពីព្រឹកថ្ងៃទី២៤ ធ្នូ នោះ គឺជាការសម្រេចដែលពុំអាចទទួលបានឡើយ។ លោកបន្ថែមថា សេចក្ដីសម្រេចនេះ ធ្វើឡើងមិនគ្រប់ជ្រុងជ្រោយ ខ្វះការពិចារណា ជាពិសេសពុំមានភស្តុតាងណាមួយដែលរកឃើញថា លោក ថោង សារ៉ាត់ មានជាប់ពាក់ព័ន្ធនឹងអង្គហេតុនេះថែមទៀតផង។ លោកបន្តថា «សេចក្ដីសម្រេចនេះបានធ្វើការសម្រេច ដោយមិនបានធ្វើការពិចារណាឲ្យបានពេញលេញ រាល់ភស្តុតាងរបស់ខ្ញុំ និងកូនក្តីខ្ញុំនៅពេលសវនាការ។ អ្នកទាំងអស់គ្នាពិតជាបានឃើញ និងឮដោយផ្ទាល់ក្នុងពេលសវនាការ គឺពុំមានភស្តុតាងណាដែលជាភស្តុតាងដាក់បន្ទុកទៅលើឧកញ៉ា ថោង សារ៉ាត់ ទេ»។
លោកឧកញ៉ា ថោង សារ៉ាត់ កាលពីខែមិថុនា ត្រូវបានចៅក្រមជំនុំជម្រះនៃតុលាការក្រុងភ្នំពេញ ផ្ដន្ទាទោសដាក់ពន្ធនាគារ ២ឆ្នាំកន្លះ (២ឆ្នាំ ៦ខែ) ពីបទលាក់ទុកអាវុធដោយខុសច្បាប់។ ចំណែកឪពុកម្ដាយរបស់លោកវិញ គឺលោក ថោង ចំរើន និងអ្នកស្រី កែវ សារី ត្រូវបានតុលាការផ្ដន្ទាទោសដាក់ពន្ធនាគារ ២ឆ្នាំ និងពិន័យជាប្រាក់ក្នុងម្នាក់ៗ ៦លានរៀល។
បើទោះជាបែបណា ការប្រកាសសាលដីកាកាលពីព្រឹកថ្ងៃទី២៤ ធ្នូ របស់ប្រធានក្រុមប្រឹក្សាជំនុំជម្រះសាលាឧទ្ធរណ៍ គឺអ្នកស្រី ទិត សុទ្ធីបូរ៉ាលក្ខណ៍ គឺអ្នកស្រីសម្រេចបដិសេធបណ្ដឹងឧទ្ធរណ៍របស់មេធាវីការពារក្ដី លោក ថោង សារ៉ាត់ និងតម្កល់សេចក្ដីសម្រេចរបស់សាលាដំបូងរាជធានីភ្នំពេញ ទុកជាបានការ ហើយចុងក្រោយ សម្រេចបន្តឃុំខ្លួន លោក ថោង សារ៉ាត់ និងឪពុកម្ដាយរបស់លោកបន្តទៀត។
ពាក់ព័ន្ធសំណុំរឿងនេះ អង្គការសិទ្ធិមនុស្សចាត់ទុកថា បញ្ហានេះនៅតែមានភាពស្មុគស្មាញ ដោយហេតុថា តុលាការនៅកម្ពុជា អនុវត្តនីតិវិធីរបស់ខ្លួនទៅតាមទំនោរនៃរបត់នយោបាយច្រើនជាងជំនាញវិជ្ជាជីវៈ។
មន្ត្រីការពារសិទ្ធិមនុស្សនៃសមាគមអាដហុក (ADHOC) លោក យី សុខសាន យល់ឃើញថា ដោយសារតុលាការនៅកម្ពុជា អនុវត្តគោលការណ៍ដោយពុំមានភាពឯករាជ្យ និងប្រាកដនិយម ហេតុនេះជាកត្តាដែលជំរុញឲ្យមានអំពើនិទ្ទណ្ឌភាព ឬភាពគ្មានទោសពៃរ៍ចំពោះអ្នកប្រព្រឹត្តិបទល្មើសកាន់តែមានកម្រិតខ្ពស់នៅកម្ពុជា។ លោកបន្ថែមថា ម្យ៉ាងបើរកឃើញថា លោក ថោង សារ៉ាត់ ពិតជាបានប្រព្រឹត្តបទល្មើសមែន គួរអនុវត្តតាមនីតិវិធី ក៏ប៉ុន្តែបើរកឃើញថា ពុំមានបទល្មើសទេ តុលាការគួរហ៊ានដោះលែងឲ្យមានសេរីភាពវិញ។ លោកបន្តថា «ខ្ញុំយល់ថាកន្លងមក ស្ថាប័នតុលាការតែងចាត់ទុកថាជាស្ថាប័នដែលឯករាជ្យ ក៏ប៉ុន្តែយើងមើលពីដំណើរនីតិវិធីក្នុងការអនុវត្ត ហាក់ដូចជាពេលខ្លះទៅហាក់ដូចជារឿងនយោបាយខ្លះទៅ និងពេលខ្លះ ធ្វើតាមច្បាប់ខ្លះទៅ»។
លោកឧកញ៉ា ថោង សារ៉ាត់ ត្រូវបានតុលាការក្រុងភ្នំពេញ ចោទប្រកាន់ពីបទផ្ដួចផ្ដើមគំនិតបញ្ជាឲ្យអង្គរក្សបាញ់សម្លាប់ លោកឧកញ៉ា អ៊ឹង ម៉េងជឺ ដែលបានប្រព្រឹត្តកាលពីខែវិច្ឆិកា ឆ្នាំ២០១៤ នៅមុខហាងលក់ផ្លែឈើមួយកន្លែងក្បែរអាងទឹកអូឡាំពិក។ បទចោទតាមមាត្រា២៨ នៃក្រមព្រហ្មទណ្ឌ លោក ថោង សារ៉ាត់ អាចប្រឈមមុខជាប់ពន្ធនាគារអស់មួយជីវិត។ ស្ថានទម្ងន់ទោសនេះ នៅមិនទាន់គិតដល់បទចោទសំណុំរឿងផ្សេងទៀត គឺការប្រើប្រាស់អាវុធដោយពុំមានលិខិតអនុញ្ញាតត្រឹមត្រូវនៅឡើយទៀតផង។
បើទោះជាបែបនេះក៏ដោយចុះ ក្រុមគ្រួសាររបស់ លោក ថោង សារ៉ាត់ ធ្លាប់បានអះអាងថា លោក ថោង សារ៉ាត់ ពុំបានប្រព្រឹត្តបទល្មើសដូចការចោទប្រកាន់នេះឡើយ។ ម្យ៉ាងវិញទៀត ការចោទប្រកាន់នេះ គឺជាការទម្លាក់កំហុស និងអាចជាការកាច់កុងក្នុងមុខជំនួញថែមទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។