សកម្មជនដីធ្លីដែលលេចធ្លោក្នុងសកម្មភាពតវ៉ារកដំណោះស្រាយរឿងដីធ្លី រហូតដល់មានការចាប់ឃុំខ្លួនជាច្រើនដងផងនោះ អ្នកស្រី ទេព វន្នី ត្រូវបានចៅក្រមសាលាឧទ្ធរណ៍ សម្រេចតម្កល់ទុកជាបានការចំពោះសាលក្រមរបស់សាលាដំបូងរាជធានីភ្នំពេញ ក្នុងរឿងជេរប្រមាថមន្ត្រីសាធារណៈកាលពី ៦ឆ្នាំមុន។ អ្នកស្រី ទេព វន្នី ស្នើឲ្យលោកនាយករដ្ឋមន្ត្រី ហ៊ុន សែន គោរពសម្ដីរបស់ខ្លួនថា នឹងស្នើសុំព្រះមហាក្សត្រលើកលែងទោសអ្នកស្រីឲ្យមានសេរីភាព។
ដោយមិនសុខចិត្តទៅនឹងសាលក្រមរបស់សាលាដំបូងរាជធានីភ្នំពេញ ដែលសម្រេចកាត់ទោសឲ្យជាប់ពន្ធនាគារ ៦ខែ ស្ត្រីនៅតំបន់បឹងកក់ ៤នាក់ សម្រេចប្ដឹងទាស់ទៅសាលាឧទ្ធរណ៍ តាមរយៈមេធាវីរបស់ខ្លួន។ ការប្ដឹងទាស់នេះ ត្រូវបានចៅក្រមសាលាឧទ្ធរណ៍ លោក ញូង ធុល ច្រានចោលចម្លើយរបស់ជនជាប់ចោទទាំង ៤នាក់ ថាគ្រាន់តែជាការដោះសា ហើយការលើកឡើងរបស់មេធាវី ក៏មិនអាចទទួលយកទៅពិចារណាបាន។
ក្រោយពីចៅក្រមសម្រេចដូច្នេះ អ្នកស្រី ទេព វន្នី ស្ថិតក្នុងសម្លៀកបំពាក់អ្នកទោសពណ៌ក្រហមចាស់ ដៃជាប់ខ្នោះ ស្រែកថា ការសម្រេចរបស់តុលាការមិនដែលកាត់ក្ដីរូបអ្នកស្រីប្រកបដោយភាពសុក្រឹត យុត្តិធម៌ម្ដងណានោះទេ គឺកាត់ទោសទៅតាមការបញ្ជា៖ « ការកាត់ក្ដីរបស់លោកចៅក្រមពីតុលាការដំបូងមកតុលាការឧទ្ធរណ៍ជារៀងរាល់ប្រៀបបានដូចជាធ្វើភាពអាក្រាតកាយមួយឲ្យពិភពលោកបានដឹង។ តុលាការនៅស្រុកខ្មែរ គឺជាតុលាការដែលស្អុយ គ្មានប្រសិទ្ធភាព មិនអាចផ្ដល់យុត្តិធម៌ជូនប្រជាពលរដ្ឋបានទេ » ។
ខណៈឆ្មាំពន្ធនាគារនាំខ្លួនទៅឃុំខ្លួនវិញ អ្នកស្រី ទេព វន្នី ស្រែកដង្ហោយហៅរកកិច្ចអន្តរាគមន៍ពីលោកនាយករដ្ឋមន្ត្រី និងការស្នើសុំលើកលែងពីព្រះមហាក្សត្រ៖ « សូមសម្ដេចគោរពតាមអនុសាសន៍របស់សម្ដេចដែលថា នឹងស្នើសុំទៅព្រះមហាក្សត្រលើកលែងទោសនាងខ្ញុំឲ្យមានសេរីភាពឡើងវិញ ជាទោសដែលក្លែងក្លាយ ជាទោសដែលស្ដាប់បញ្ជាតាមទូរស័ព្ទ » ។
អ្នកស្រី ទេព វន្នី រួមនឹងស្ត្រីបឹងកក់ ៣នាក់ទៀត មានលោកស្រី គង់ ចន្ថា លោកស្រី បូ ឆវី និងលោកស្រី ហេង ម៉ុំ ត្រូវបានចៅក្រមសាលាដំបូងរាជធានីភ្នំពេញ ផ្ដន្ទាទោសដាក់ពន្ធនាគាររយៈពេល ៦ខែ កាលពីថ្ងៃទី១៩ ខែកញ្ញា ឆ្នាំ២០១៦ ពីបទប្រមាថ និងប្រឆាំងអ្នករាជការសាធារណៈ ពេលដែលពួកគេតវ៉ាសុំអន្តរាគមន៍ដោះស្រាយវិវាទដីធ្លីតំបន់បឹងកក់ នៅមុខសាលាក្រុងភ្នំពេញ កាលពីឆ្នាំ២០១១។
ក្នុងរឿងនេះ តុលាការក្រុងភ្នំពេញមិនអាចចេញដីកាបង្គាប់ឲ្យឃុំស្ត្រីទាំងបួននាក់បានទេ ដោយសារតែសាលក្រមនោះនៅមិនទាន់ចូលជាស្ថាពរ ដោយទុកពេល ១ខែឲ្យជនជាប់ចោទប្ដឹងទៅសាលាឧទ្ធរណ៍។ ក្នុងករណីដែលស្ត្រីបឹងកក់ទាំងបួននាក់នឹងប្ដឹងសារទុក្ខសេចក្ដីសម្រេចនេះទៅតុលាការកំពូល ប្រសិនបើចៅក្រមតុលាការកំពូល ច្រានចោលសេចក្ដីសម្រេចរបស់ឧទ្ធរណ៍ នោះពួកគាត់នឹងរួចផុតពីការឃុំខ្លួន ប៉ុន្តែបើតុលាការកំពូលសម្រេចតម្កល់សាលដីការបស់សាលាឧទ្ធរណ៍ទុកជាបានការទៀត នោះពួកគាត់នឹងប្រឈមការឃុំខ្លួនក្នុងពន្ធនាគារ ក្រោយពេលសាលដីការបស់តុលាការកំពូលចូលជាស្ថាពរ។
ចំពោះអ្នកស្រី ទេព វន្នី ដែលកំពុងឃុំក្នុងពន្ធនាគារនេះ គឺសំណុំរឿងដាច់ដោយឡែកមួយទៀត។ កាលពីថ្ងៃទី២៣ កុម្ភៈ អ្នកស្រី ទេព វន្នី ត្រូវតុលាការក្រុងភ្នំពេញសម្រេចផ្ដន្ទាទោសដោយដាក់ពន្ធនាគារចំនួន ២ឆ្នាំកន្លះ និងពិន័យប្រាក់សរុប ១៤លានរៀល ក្រោមបទចោទថាប្រើហិង្សាលើសន្តិសុខសណ្ដាប់ធ្នាប់សាលាខណ្ឌដូនពេញ នៅក្បែរផ្ទះលោកនាយករដ្ឋមន្ត្រី ហ៊ុន សែន កាលពីខែមីនា ឆ្នាំ២០១៣។
សកម្មជនដីធ្លីនៅតំបន់បឹងកក់ដែលចូលក្នុងបន្ទប់សវនាការនៅព្រឹកនេះ លោកស្រី បូ ឆវី យល់ថា ការសម្រេចរបស់ចៅក្រមសាលាឧទ្ធរណ៍នេះ មិនឈរលើគោលការណ៍យុត្តិធម៌នោះទេ៖ « ភាពអយុត្តិធម៌នៅតុលាការស្រុកខ្មែរយើងនេះ គឺខ្ញុំអត់មានជំនឿលើតុលាការស្រុកខ្មែរទេ គឺមិនមែនតុលាការកាត់ក្ដីដោយឆន្ទៈរបស់ខ្លួន កាត់ដោយយុត្តិធម៌ឲ្យប្រជាពលរដ្ឋ។ តុលាការស្រុកខ្មែរ គឺតុលាការតេឡេ » ។
មន្ត្រីផ្នែកសិទ្ធិមនុស្សនៃអង្គការលីកាដូ (LICADHO) ដែលតាមដានរឿងនេះ លោក អំ សំអាត ថាការប្រើរូបភាពដោយបន្តឃុំខ្លួនសកម្មជនដីធ្លី រួមទាំងមន្ត្រីសិទ្ធិមនុស្ស និងមន្ត្រី គ.ជ.ប អស់ជាច្រើនខែមកនេះ មិនបានផ្ដល់ផលចំណេញសម្រាប់កម្ពុជា លើឆាកអន្តរជាតិនោះទេ ដោយសារតែមានការថ្កោលទោសជាបន្តបន្ទាប់ពីមជ្ឈដ្ឋានអន្តរជាតិ៖ « ការចាប់អ្នកទាំងអស់នោះ ដូចខ្ញុំលើកឡើងដូចអ្នកស្រី ទេព វន្នី សកម្មជនដីធ្លី គឺជាសកម្មជន គឺជនសកម្មតវ៉ា និងធ្វើបាតុកម្ម ហើយមន្ត្រីអង្គការសិទ្ធិមនុស្សហ្នឹង គឺជាអ្នកដែលជួយជំរុញឲ្យមានការយល់ដឹងអំពីសិទ្ធិសេរីភាពរបស់ប្រជាពលរដ្ឋតាមបណ្ដាសហគមន៍នានា។ នេះខ្ញុំគិតថាការឃុំខ្លួន គឺវាពាក់ព័ន្ធបញ្ហាហ្នឹង ហើយអ្វីដែលសំខាន់គេគិតថា បើសិនជាពលរដ្ឋគាត់មានការផុលផុសច្រើនហ្នឹង វាប៉ះពាល់ » ។
ចំណែកក្រុមស្ត្រីបឹងកក់ និងបុរីកីឡា ដែលតែងតែនាំគ្នាធ្វើយុទ្ធនាការថ្ងៃច័ន្ទពណ៌ខ្មៅ ទាមទារឲ្យដោះលែងសកម្មជនដីធ្លី មន្ត្រីសិទ្ធិមនុស្ស និងមន្ត្រី គ.ជ.ប ប្រមូលផ្ដុំគ្នាមុខសាលាឧទ្ធរណ៍ ដោយស្រែកថា មន្ត្រីដែលបម្រើការឲ្យស្ថាប័នតុលាការ មិនមែនជារបស់រដ្ឋ គឺជារបស់ឯកជន ដែលធ្វើឲ្យពួកគាត់ទទួលរងអយុត្តិធម៌ជាបន្តបន្ទាប់៖ « តុលាការនេះក៏មិនមែនជារបស់រដ្ឋនោះដែរ គឺជារបស់ឯកជន របស់បុគ្គល អ៊ីចឹងពួកខ្ញុំចង់បញ្ជាក់ឲ្យច្បាស់។ ឲ្យលោកនាយករដ្ឋមន្ត្រីគាត់ដឹងថា ប្រជាពលរដ្ឋរងគ្រោះដីធ្លីមិនជួយអន្តរាគមន៍ បែរជាប្រើប្រព័ន្ធតុលាការហ្នឹងមកគាបសង្កត់ប្រជាពលរដ្ឋឯងទៅវិញ។ ចង់បញ្ជាក់ដែរថា តុលាការហ្នឹងមិនមែនជារបស់រដ្ឋ គឺជារបស់ឯកជន ចង់ឲ្យគាត់ទាំងអស់គ្នាដឹងឲ្យច្បាស់ផង » ។
ក្រៅពីនេះ ក្រុមអ្នកបឹងកក់ និងបុរីកីឡា ក៏ធ្វើពិធីដាក់បណ្ដាសាចំពោះចៅក្រមរូបណាដែលកាត់ក្ដីមិនផ្ដល់យុត្តិធម៌ដល់ពួកគាត់ជាអ្នករងគ្រោះពីការប្រើហិង្សាពីសំណាក់អាជ្ញាធរ ហើយប្រែក្រឡាស់ពួកគាត់ទៅជាអ្នកប្រើហិង្សាទៅវិញ៖ « សូមឲ្យតុលាការហ្នឹងកាត់ក្ដីឲ្យយុត្តិធម៌សម្រាប់ជនរងគ្រោះ បើតុលាការណាកាត់ក្ដីដោយមិនយុត្តិធម៌ សូមឲ្យព្រះដងកើស័ក្ដិសិទ្ធិវាយបំបាក់កតុលាការហ្នឹង នៅលើកៅអីកាត់ក្ដីហ្នឹង ឲ្យប្រជាជនគេមើលឃើញឲ្យជាក់ស្ដែង » ។
ទោះបីជាគ្មានក្ដីសង្ឃឹមលើប្រព័ន្ធតុលាការថានឹងផ្ដល់យុត្តិធម៌ដល់ខ្លួនយ៉ាងណាក្ដី ក្រុមស្ត្រីបឹងកក់នឹងពិភាក្សាជាមួយមេធាវី ដើម្បីប្ដឹងសារទុក្ខលើសេចក្ដីសម្រេចរបស់សាលាឧទ្ធរណ៍នេះទៅតុលាការកំពូល បន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។