តុលាការខេត្តបន្ទាយមានជ័យ បានសម្រេចឃុំជនជាតិអង់គ្លេសម្នាក់ ដែលជាអគ្គនាយកក្រុមហ៊ុនអន្តរជាតិមួយ ដោយចោទប្រកាន់ពីបទក្លែងឯកសារសាធារណៈ រំលោភបំពានកាន់កាប់ដីធ្លីនៅខេត្តបន្ទាយមានជ័យ។ កន្លងទៅថ្មីៗនេះ តុលាការខេត្តបន្ទាយមានជ័យ ក៏បានសម្រេចឃុំខ្លួនជនជាតិខ្មែរពីរនាក់ ដែលពាក់ព័ន្ធទៅនឹងការក្លែងឯកសារសាធារណៈដូចគ្នា ជាមួយនឹងជនជាតិអង់គ្លេសនេះដែរ។ ជនសង្ស័យទាំងពីរនាក់នោះម្នាក់មានតួនាទីអគ្គនាយកក្រុមហ៊ុន និងម្នាក់ទៀតជាមេការរបស់ក្រុមហ៊ុន។
ជនជាតិអង់គ្លេសមួយរូបដែលត្រូវបានកងកម្លាំងមានសមត្ថកិច្ចរបស់រដ្ឋាភិបាលចាប់ខ្លួននៅក្នុងហាងកាហ្វេមួយ នាទីក្រុងភ្នំពេញ កាលពីថ្ងៃទី២៣ ខែមីនា ត្រូវបានតុលាការខេត្តបន្ទាយមានជ័យ សម្រេចចោទប្រកាន់ និងឃុំខ្លួនហើយ ដោយសារមានជាប់ពាក់ព័ន្ធជាមួយឯកសារដីមិនត្រឹមត្រូវ។ សរុបមកមានមនុស្ស ៣នាក់ ដែលតុលាការបានសម្រេចឃុំខ្លួនទាក់ទងរឿងវិនិយោគដាំដំណាំលើដីនៅខេត្តបន្ទាយមានជ័យ។
តំណាងអយ្យកាអមសាលាដំបូងខេត្តបន្ទាយមានជ័យ លោក ផាន់ វណ្ណារ័ត្ន ថ្លែងនៅថ្ងៃទី២៤ ខែមីនា ថា ជនជាតិអង់គ្លេសរូបនោះ មានឈ្មោះ ហ្គិក ហ្វ្រីយេត (Gregg Fryett) ជាអគ្គនាយក និងជាម្ចាស់ហ៊ុនធំរបស់ក្រុមហ៊ុន Sustainable Growth Group Ltd. ហើយក៏ជាម្ចាស់ក្រុមហ៊ុនមួយទៀតឈ្មោះ Sustainable AgroEnery PLC មកពីប្រទេសអង់គ្លេស។
ក្រោយពីការសាកសួរទាំងយប់រួចមក តំណាងអយ្យការបានសម្រេចចោទប្រកាន់ពីបទក្លែងឯកសារសាធារណៈ ហើយបញ្ជូនទៅឲ្យចៅក្រមស៊ើបសួរ។ ចៅក្រុមស៊ើបសួរបានសម្រេចឃុំខ្លួនជាបណ្ដោះអាសន្ននៅក្នុងពន្ធនាគារ។
លោក ផាន់ វណ្ណារ័ត្ន៖ «រឿងហ្នឹងខាងចៅក្រមស៊ើបសួរគេដាក់ស្ថិតនៅក្រោមការពិនិត្យពីបទក្លែងលិខិត និងប្រើប្រាស់ឯកសារក្លែង។ ឃុំខ្លួននៅបន្ទាយមានជ័យ តែយកគាត់ទៅឃុំខ្លួននៅភ្នំពេញ អត់ដាក់គាត់នៅពន្ធនាគារបន្ទាយមានជ័យ ទេ ដោយសារតែយើងបារម្ភថា គាត់អាចឆ្លើយឆ្លងជាមួយគ្នាគាត់នៅក្នុងគុក យើងបំបែកទីតាំងដើម្បីយើងអង្កេតបន្ថែម។ គាត់តំណាងក្រុមហ៊ុននៅអង់គ្លេសផង នៅស្រុកខ្មែរផង»។
កាលពីខែកុម្ភៈ ឆ្នាំ២០១៣ តុលាការក៏បានបញ្ជូនជនសង្ស័យពីរនាក់ទៅឃុំខ្លួននៅក្នុងពន្ធនាគារ ខេត្តបន្ទាយមានជ័យ ក្រោមការចោទប្រកាន់ពីបទក្លែងឯកសារសាធារណៈរបស់រដ្ឋាភិបាល ដើម្បីកាន់កាប់ដីធ្លីនៅស្រុកស្វាយចេក ខេត្តបន្ទាយមានជ័យ។ ការចាប់ខ្លួនជនសង្ស័យទាំងបីនាក់នេះ បានធ្វើឡើងក្រោមកិច្ចសហការគ្នារវាងស្ថាប័នតុលាការ និងអង្គភាពប្រឆាំងអំពើពុករលួយរបស់រដ្ឋាភិបាល។
ជនសង្ស័យនោះមានឈ្មោះ អ៊ុំ សំអាង ជាអគ្គនាយកក្រុមហ៊ុនមួយដែលមានឈ្មោះជាអក្សរកាត់ថា អាយជីអ៊ី (IGE) និងម្នាក់ទៀតឈ្មោះ សឿម ស៊ីដែន ជាមេការរបស់ក្រុមហ៊ុន។ អ្នកទាំង២នាក់បច្ចុប្បន្នកំពុងជាប់ឃុំខ្លួនជាបណ្ដោះអាសន្ននៅក្នុងពន្ធនាគារខេត្តបន្ទាយមានជ័យ។
តំណាងអយ្យកាអមសាលាដំបូងខេត្តបន្ទាយមានជ័យ លោក ផាន់ វណ្ណារ័ត្ន បញ្ជាក់ថា លោក ហ្គិក ហ្វ្រីយេត ត្រូវចាប់ខ្លួនតាមដីកានាំខ្លួនរបស់ចៅក្រមស៊ើបសួរ ដោយមានមន្ត្រីនគរបាលយុត្តិធម៌នៃអង្គភាពប្រឆាំងអំពើពុករលួយជាអ្នកចុះប្រតិបត្តិផ្ទាល់៖ «ក្នុងនីតិវិធីយើងចោទគូកន បន្ទាប់ពីការស៊ើបអង្កេតរបស់ចៅក្រមមួយរយៈទៅគេរកឃើញថា ជនជាតិអង់គ្លេសហ្នឹង គាត់ប្រើប្រាស់ឯកសារ ក្លែង... អ៊ីចឹងចៅក្រមគេដាក់ឲ្យស្ថិតនៅក្រោមការចោទប្រកាន់ពីបទក្លែងឯកសារ ហើយតំណាងអយ្យការបានស្នើសុំឃុំខ្លួនបណ្ដោះអាសន្នសិន ដើម្បីស៊ើបអង្កេតឲ្យបានច្បាស់លាស់»។
មន្ត្រីសមាគមអាដហុក ប្រចាំខេត្តបន្ទាយមានជ័យ លោក ស៊ុំ ច័ន្ទគា ថ្លែងថា ទំនាស់នេះកើតមានឡើងរវាងអ្នកមានអំណាច និងអ្នកមានអំណាចដូចគ្នា។ លោកបានឲ្យដឹងថា ដំណាំល្ហុងខ្វង ដែលគេដាំនៅលើដីមានទំនាស់នោះ បច្ចុប្បន្នត្រូវបានភ្លើងឆេះបំផ្លាញអស់ហើយ នៅក្រោយការចាប់ខ្លួន ជនសង្ស័យពីរនាក់ ឈ្មោះ អ៊ុំ សំអាង និង សឿម ស៊ីដែន នោះរួចមក។
វិទ្យុអាស៊ីសេរី នៅពុំទាន់អាចទាក់ទងតំណាងក្រុមហ៊ុន និងមេធាវីរបស់ជនសង្ស័យទាំងបីនាក់ដើម្បីសុំប្រតិកម្មបានទេ។ ប៉ុន្តែនៅក្នុងឯកសារថតចម្លងមួយរបស់លោក ហ្គិក ហ្វ្រីយេត ដែលបានសរសេរជាភាសាអង់គ្លេសដាក់ជូនលោក ហ៊ុន សែន នាយករដ្ឋមន្ត្រី កាលពីថ្ងៃទី១៥ កុម្ភៈ ឆ្នាំ២០១៣ មុនការចាប់ខ្លួនរូបលោកនោះ មានខ្លឹមសារសុំឲ្យលោកនាយករដ្ឋមន្ត្រី ពិចារណាចំពោះក្រុមវិនិយោគលើវិស័យកសិកម្ម និងករណីដីធ្លីដែលបានវិនិយោគនៅស្រុកស្វាយចេក និងនៅកន្លែងជាច្រើនទៀតនៅក្នុងប្រទេសកម្ពុជា។ លោកបញ្ជាក់ក្នុងលិខិតថា រឿងដីនោះមានមនុស្សឆ្លៀតឱកាសកេងចំណេញអំពីស្ថានការណ៍នេះច្រើននាក់ណាស់។ ក្រុមហ៊ុនលោកបានបោះដើមទុនវិនិយោគលើវិស័យកសិកម្មនៅកម្ពុជា សរុប ១១លានដុល្លារ។
កាលពីខែមីនា ឆ្នាំ២០១២ អធិការដ្ឋានរដ្ឋបាលព្រៃឈើខាងជើងបឹងទន្លេសាប បានធ្វើពាក្យបណ្ដឹងមួយប្ដឹងទៅព្រះរាជអាជ្ញាអមសាលាដំបូងខេត្តបន្ទាយមានជ័យ ដោយចោទប្រកាន់ក្រុមហ៊ុនអភិវឌ្ឍន៍ និងក្រុមហ៊ុន អ៊ិនធឺណេសិនណល ហ្គ្រីន អេនើជី ពីបទកាប់រានដុតឈូសឆាយដីព្រៃរបស់រដ្ឋធ្វើជាកម្មសិទ្ធិ ស្ថិតក្នុងភូមិខ្លែងពណ៌ និងភូមិស្លក្រាម ស្រុកស្វាយចេក ខេត្តបន្ទាយមានជ័យ។
ប៉ុន្តែនៅថ្ងៃទី៥ ខែកក្កដា ឆ្នាំ២០១២ អភិបាលខេត្តបន្ទាយមានជ័យ លោក អ៊ុង អឿន បានធ្វើលិខិតរាយការណ៍មួយសុំកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន។ លិខិត ៤ទំព័រនោះ បានបកស្រាយលើពាក្យបណ្ដឹងរបស់អធិការដ្ឋានរដ្ឋបាលព្រៃឈើខាងជើងបឹងទន្លេសាបថា លោក វណ្ណ សុផាណ្ណា ជានាយកអធិការដ្ឋានរដ្ឋបាលព្រៃឈើខាងជើងបឹងទន្លេសាប បានដាក់ពាក្យបណ្ដឹងទៅព្រះរាជអាជ្ញាអមសាលាដំបូងខេត្ត ដោយពុំមានការសុំយោបល់ឯកភាពពីរដ្ឋមន្ត្រីក្រសួងកសិកម្ម និងរដ្ឋបាលខេត្តឡើយ។ ពាក្យបណ្ដឹងនោះបានចោទបំផ្លើសការពិត គ្មានមូលដ្ឋានច្បាស់លាស់ ផ្ទុយពីសិទ្ធិអំណាច និងសមត្ថកិច្ចរបស់ខ្លួន។
លិខិតរបស់ លោក អ៊ុង អឿន បន្តថា ក្នុងករណីនេះ ព្រះរាជអាជ្ញាអមសាលាដំបូងបានកោះហៅភាគីទាំងពីរ ដើម្បីធ្វើការបំភ្លឺតាមនីតិវិធីតុលាការ កំណត់ជាអង្គហេតុ និងអង្គច្បាប់សម្រាប់ដាក់បន្ទុកចោទប្រកាន់តាមរយៈមេធាវីការពារក្ដីរបស់ចុងបណ្ដឹង ហើយបានធ្វើលិខិត និងចូលបំភ្លឺចំពោះមុខ ព្រះរាជអាជ្ញាដោយមានឯកសារផ្លូវច្បាប់គ្រប់គ្រាន់ សម្រាប់ការពារកូនក្ដីរបស់ខ្លួនដែលគ្មានកំហុសតាមការចោទប្រកាន់របស់លោក វណ្ណ សុផាណ្ណា ដែលធ្វើឲ្យព្រះរាជអាជ្ញាគ្មានមូលដ្ឋានផ្លូវច្បាប់ ណាមួយ អាចដាក់បន្ទុកចោទប្រកាន់ចុងបណ្ដឹងបានឡើយ។ ប៉ុន្តែលិខិតរបស់អន្តរាគមន៍របស់អភិបាលខេត្តនោះ មិនមានប្រសិទ្ធភាពទេដោយសារតែតុលាការរកឃើញថា លិខិតនោះក្លែងក្លាយ។
រហូតមកដល់ពេលនេះ តុលាការបានចាប់ជនសង្ស័យបីនាក់ឃុំខ្លួនជាបណ្ដោះអាសន្ន នៅក្នុងពន្ធនាគារ។ ប្រភពបានបញ្ជាក់ថា សំណុំរឿងខាងលើនេះនៅមានជនសង្ស័យជាច្រើននាក់ជាប់ពាក់ព័ន្ធ ក្នុងនោះមានទាំងមន្ត្រីយោធា និងមន្ត្រីអាជ្ញាធរពាក់ព័ន្ធមួយចំនួនទៀត ក្នុងជួររដ្ឋាភិបាលដែល អង្គភាពប្រឆាំងអំពើពុករលួយ និងតុលាការកំពុងបើកការស៊ើបសួរពាក់ព័ន្ធក្នុងករណីក្លែងឯកសារសាធារណៈរបស់រដ្ឋាភិបាលទៅរំលោភកាន់កាប់ដីរបស់រដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។