មជ្ឈមណ្ឌលសិទ្ធិមនុស្សកម្ពុជា សម្ដែងការបារម្ភចំពោះឥទ្ធិពលហួសហេតុរបស់ស្ថាប័ននីតិប្រតិបត្តិទៅលើការបំពេញមុខងាររបស់តុលាការនៅកម្ពុជា។ ការបារម្ភនេះ គឺនៅក្រោយពីអតីតប្រធានសាលាដំបូងរាជធានីភ្នំពេញ ត្រូវបានឧត្ដមក្រុមប្រឹក្សានៃអង្គចៅក្រមដកតំណែងភ្លាមៗ បន្ទាប់ពីលោកនាយករដ្ឋមន្ត្រី ហ៊ុន សែន ស្នើឲ្យក្រសួងយុត្តិធម៌ បើកការស៊ើបអង្កេតទៅលើចៅក្រមដែលកាន់សំណុំរឿងក្តីរបស់ឪពុកម្ដាយលោក ថោង សារ៉ាត់។
បញ្ហាទាក់ទងការដកតំណែងអតីតប្រធានសាលាដំបូងរាជធានីភ្នំពេញ លោក អាំង មាលតី កាលពីពេលថ្មីៗនេះ ពាក់ព័ន្ធទៅនឹងការដោះលែងឪពុកម្ដាយលោក ថោង សារ៉ាត់ ឲ្យនៅក្រៅឃុំ នៅមិនទាន់ស្ងប់ស្ងាត់នៅឡើយ។
មជ្ឈមណ្ឌលសិទ្ធិមនុស្សកម្ពុជា នៅក្នុងវិចារណកថាព័ត៌មានរបស់ខ្លួនដែលផ្សព្វផ្សាយនៅថ្ងៃទី២២ ខែកុម្ភៈ លើកឡើងថា ពួកគេព្រួយបារម្ភចំពោះការដកតំណែងលោក អាំង មាលតី ដែលពួកគេអះអាងថា ឧត្ដមក្រុមប្រឹក្សានៃអង្គចៅក្រមបានធ្វើឡើងដោយប្រញាប់ប្រញាល់។
មជ្ឈមណ្ឌលសិទ្ធិមនុស្សកម្ពុជា កត់សម្គាល់ថា វិធានការដែលឧត្ដមក្រុមប្រឹក្សានៃអង្គចៅក្រមធ្វើទៅលើចៅក្រមសាលាដំបូងរាជធានីភ្នំពេញ លោក លី សុខលេង ដែលជាចៅក្រមទទួលបន្ទុកសំណុំរឿងរបស់លោក ថោង សារ៉ាត់ និងទៅលើលោក អាំង មាលតី កាលពីពេលថ្មីៗនេះ ហាក់បីដូចជាវិធានការភ្លាមៗ បន្ទាប់ពីមានការលើកឡើងរបស់លោកនាយករដ្ឋមន្ត្រី ហ៊ុន សែន។
មជ្ឈមណ្ឌលសិទ្ធិមនុស្សកម្ពុជា លើកឡើងថា ខណៈដែលករណីពាក់ព័ន្ធទៅនឹងអំពើពុករលួយនៅតុលាការត្រូវតែចាត់វិធានការជាចាំបាច់ ឧត្ដមក្រុមប្រឹក្សានៃអង្គចៅក្រមក៏ត្រូវត្រួតពិនិត្យមើលឲ្យបានប្រាកដប្រជា និងឥតលំអៀងទៅលើភស្តុតាងដែលមាន ហើយឧត្ដមក្រុមប្រឹក្សានៃអង្គចៅក្រម មិនត្រូវយកចិត្តទុកដាក់តែទៅលើសម្ពាធ និងការជ្រៀតជ្រែកផ្នែកនយោបាយណាមួយនោះទេ។
លោក ហ៊ុន សែន កាលពីថ្ងៃទី១៧ ខែកុម្ភៈ សម្ដែងការមិនពេញចិត្តចំពោះការដោះលែងឪពុកម្ដាយលោក ថោង សារ៉ាត់ គឺលោក ថោង ចំរើន និងអ្នកស្រី កែវ សារី ឲ្យនៅក្រៅឃុំ ដោយចៅក្រមសាលាដំបូងរាជធានីភ្នំពេញ។ លោក ហ៊ុន សែន សង្ស័យថា ការដោះលែងនោះ គឺអាចមានពាក់ព័ន្ធនឹងអំពើពុករលួយច្រើនលានដុល្លារ។ លោកបានស្នើឲ្យរដ្ឋមន្ត្រីក្រសួងយុត្តិធម៌ ដែលជាសមាជិកនៃឧត្ដមក្រុមប្រឹក្សានៃអង្គចៅក្រម បើកការស៊ើបអង្កេតទៅលើចៅក្រមដែលកាន់សំណុំរឿងនេះ។
មួយថ្ងៃក្រោយការថ្លែងរបស់លោក ហ៊ុន សែន ឧត្ដមក្រុមប្រឹក្សានៃអង្គចៅក្រមដែលជាស្ថាប័នមានសិទ្ធិសម្រេចអំពីការតែងតាំង ការផ្លាស់ប្ដូរ ការផ្ដាច់ពីមុខងារ ការដាក់ឲ្យនៅក្រៅក្របខ័ណ្ឌ ការដាក់ឲ្យនៅទំនេរ និងការលុបឈ្មោះចៅក្រមទាំងអស់នោះ បានសម្រេចដកលោក អាំង មាលតី ប្រធានសាលាដំបូងរាជធានីភ្នំពេញ ចេញពីតំណែង។
អ្នកសម្របសម្រួលគម្រោងកំណែទម្រង់ប្រព័ន្ធតុលាការនៃមជ្ឈមណ្ឌលសិទ្ធិមនុស្សកម្ពុជា លោក សួន ប៊ុនធឿន មានប្រសាសន៍បន្ថែមថា ទោះជាមានសញ្ញាបង្ហាញថា ការដោះលែងឪពុកម្តាយលោក ថោង សារ៉ាត់ អាចបណ្ដាលមកពីការអនុវត្តខុសនីតិវិធីនៅក្នុងតុលាការកម្ពុជាក្តី ក៏ឧត្ដមក្រុមប្រឹក្សានៃអង្គចៅក្រម ត្រូវតែជាស្ថាប័នឯករាជ្យ។
លោក សួន ប៊ុនធឿន បញ្ជាក់ថា ស្របពេលដែលសង្គមស៊ីវិលស្វាគមន៍រាល់សញ្ញាវិជ្ជមានដែលនាំទៅរកការកែទម្រង់ប្រព័ន្ធតុលាការពិតប្រាកដ គេក៏ចង់ឃើញដែរថា ស្ថាប័នតុលាការជាស្ថាប័នឯករាជ្យ មិនមែនជាការឆ្លុះបញ្ចាំងពីការជ្រៀតជ្រែកហួសហេតុរបស់ស្ថាប័ននីតិប្រតិបត្តិទៅក្នុងស្ថាប័នតុលាការឡើយ។
ឆ្លើយតបចំពោះការលើកឡើងរបស់សង្គមស៊ីវិលបែបនេះ អគ្គលេខាធិការឧត្ដមក្រុមប្រឹក្សានៃអង្គចៅក្រម លោក សំ ប្រជាមានិត មានប្រសាសន៍ថា ការដកតំណែងលោក អាំង មាលតី ចេញពីប្រធានសាលាដំបូងរាជធានីភ្នំពេញ មិនមែនធ្វើតាមការលើកឡើងរបស់ស្ថាប័នណាមួយនោះទេ។ លោកថា អ្វីដែលឧត្ដមក្រុមប្រឹក្សានៃអង្គចៅក្រមបានធ្វើ គឺដើម្បីបង្កើនប្រសិទ្ធភាពនៃការគ្រប់គ្រងនៅក្នុងស្ថាប័នតុលាការរាជធានីភ្នំពេញ ឲ្យកាន់តែប្រសើរប៉ុណ្ណោះ។
លោក សំ ប្រជាមានិត បញ្ជាក់ដែរថា នេះគឺជាការងារដែលឧត្ដមក្រុមប្រឹក្សានៃអង្គចៅក្រមបានធ្វើជាហូរហែកន្លងមក។ លោកថា ការផ្លាស់ប្ដូរ តែងតាំងចៅក្រម ព្រះរាជអាជ្ញា គឺជាសិទ្ធិរបស់ឧត្ដមក្រុមប្រឹក្សានៃអង្គចៅក្រម។ លោកថា ប្រសិនបើឧត្ដមក្រុមប្រឹក្សានៃអង្គចៅក្រមមើលឃើញការគ្រប់គ្រងមានបញ្ហាដែលអាចប៉ះពាល់ទៅដល់ប្រសិទ្ធភាពនៃការផ្តល់សេវាយុត្តិធម៌ គឺឧត្ដមក្រុមប្រឹក្សានៃអង្គចៅក្រមត្រូវតែធ្វើការផ្លាស់ប្ដូរ។
យ៉ាងណាក៏ដោយ មជ្ឈមណ្ឌលសិទ្ធិមនុស្សកម្ពុជា កត់សម្គាល់ថា បើទោះជារដ្ឋធម្មនុញ្ញកម្ពុជា ចែងអំពីឯករាជភាពរបស់ស្ថាប័នតុលាការក្តី ក៏ប៉ុន្តែច្បាប់ស្ដីពីការរៀបចំអង្គការតុលាការ ច្បាប់ស្ដីពីការរៀបចំ និងការប្រព្រឹត្តទៅនៃឧត្ដមក្រុមប្រឹក្សានៃអង្គចៅក្រម និងច្បាប់ស្ដីពីលក្ខន្តិកៈនៃចៅក្រម និងព្រះរាជអាជ្ញាដែលទើបតែបានអនុម័តកាលពីពេលកន្លងមកនេះ ពុំបានធានាដល់ឯករាជភាព និងអព្យាក្រឹតភាពរបស់ស្ថាប័នតុលាការនោះទេ។ មជ្ឈមណ្ឌលសិទ្ធិមនុស្សកម្ពុជា លើកឡើងថា នេះជាការធ្វើឲ្យប៉ះពាល់ដល់ការបំពេញមុខងាររបស់ស្ថាប័នតុលាការ និងធ្វើឲ្យស្ថាប័ននេះទទួលរងឥទ្ធិពលយ៉ាងខ្លាំងពីស្ថាប័ននីតិប្រតិបត្តិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។