ក្រុមអ្នកច្បាប់របស់មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) លើកឡើងថា សាលាដំបូងរាជធានីភ្នំពេញ មិនបានចាត់ការសំណុំរឿងអាជ្ញាធរខណ្ឌដូនពេញ ប្រើអំពើហិង្សាលើអ្នកសារព័ត៌មានវិទ្យុសំឡេងប្រជាធិបតេយ្យ ឬ វី.អូ.ឌី (VOD) ឲ្យបានទាន់ពេលវេលានោះទេ។
នៅក្នុងសេចក្ដីប្រកាសព័ត៌មានរបស់មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យចេញផ្សាយនៅថ្ងៃទី២៥ សីហា ដែលទាមទារយុត្តិធម៌សម្រាប់អ្នកសាព័ត៌មានដែលរងរបួសនោះថា ក្រុមអ្នកច្បាប់របស់ CCIM បានដាក់លិខិតទៅសាលាដំបូងរាជធានីភ្នំពេញ កាលពីសប្ដាហ៍មុនសុំឲ្យតុលាការពន្លឿនដំណើរការរបស់អង្គការក្នុងករណីអ្នកយកព័ត៌មានវិទ្យុសំឡេងប្រជាធិបតេយ្យ ត្រូវគេវាយដំរបួសយ៉ាងធ្ងន់ធ្ងរនៅក្បែរស្ពាននាគកាលពីខែឧសភា។
តំណាង CCIM បានដាក់ពាក្យប្ដឹងអភិបាលរាជធានីភ្នំពេញ អភិបាល និងអភិបាលរងខណ្ឌដូនពេញ ថាជាអ្នកបញ្ជាជាប្រព័ន្ធ និងរៀបចំការវាយប្រហារលើក្រុមអ្នកតវ៉ា ក្នុងនោះកងសន្តិសុខខណ្ឌបានវាយប្រហារអ្នកយកព័ត៌មានវិទ្យុសំឡេងប្រជាធិបតេយ្យ លោក ឡាយ សាមាន ឲ្យរងរបួសធ្ងន់ធ្ងរ។
សេចក្ដីប្រកាសព័ត៌មាននេះបញ្ជាក់ថា កាលពីថ្ងៃទី១៦ មិថុនា តុលាការបានកោះហៅតំណាង CCIMដើម្បីផ្ដល់ការពន្យល់ និងផ្ដល់ភស្តុតាង តែមកទល់ពេលនេះតុលាការមិនទាន់កោះហៅភាគីចុងចោទនៅឡើយ។
ប្រធានមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ លោក ប៉ា ងួនទៀង មានប្រសាសន៍ថា តុលាការមិនបានចាត់ការរឿងក្ដីនេះ បានឆ្លុះបញ្ចាំងពីភាពផ្ទុយគ្នាស្រឡះទៅនឹងសកម្មភាពដូចផ្លេកបន្ទោរ ដែលត្រូវបានគេមើលឃើញកាលពីខែមុន នៅពេលដែលកងសន្តិសុខខណ្ឌដូនពេញ បានរងរបួសកាលពីថ្ងៃទី១៥ កក្កដា នោះ តុលាការបានចាប់ខ្លួនបេក្ខជនតំណាងរាស្ត្រជាប់ឆ្នោតគណបក្សសង្គ្រោះជាតិ និងសកម្មជនគណបក្សនេះជាបន្តបន្ទាប់ តែករណីលោក ឡាយ សាមាន វិញ គ្មានជនសង្ស័យណាម្នាក់ត្រូវបានតុលាការកោះហៅឡើយ។
វិទ្យុអាស៊ីសេរីមិនអាចសុំការបំភ្លឺពីមន្ត្រីសាលាដំបូងរាជធានីភ្នំពេញ ដើម្បីសួរអំពីបញ្ហានេះបាននៅឡើយទេ នៅថ្ងៃទី២៥ សីហា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។