មន្ត្រីជាន់ខ្ពស់គណបក្សសង្គ្រោះជាតិ ប្រចាំខេត្តតាកែវ ឲ្យដឹងថា នៅថ្ងៃច័ន្ទ ទី៧ ខែកញ្ញា គណបក្សនឹងរកមេធាវីដើម្បីការពារក្ដីឲ្យលោក ឈា តាំងស៊ន។
អនុប្រធានគណៈកម្មការប្រតិបត្តិស្រុកព្រៃកប្បាស ខែត្រតាកែវ ត្រូវបានសមត្ថកិច្ចឃុំខ្លួននៅស្នងការនគរបាលព្រហ្មទណ្ឌកម្រិតធ្ងន់នៅឡើយ បន្ទាប់ពីសមត្ថកិច្ចចាប់ខ្លួនកាលពីថ្ងៃទី៥ ខែកញ្ញា។
រដ្ឋាភិបាលបានបើកយុទ្ធនាការចាប់ខ្លួនអ្នកដែលហ៊ានរិះគន់ចំៗប្រឆាំងផែនទីក្លែងក្លាយ និងពាក់ព័ន្ធការបោះបង្គោលព្រំដែនកម្ពុជា-វៀតណាម ជាបន្តបន្ទាប់ ដែលការចាប់ខ្លួននេះ បានកើនឡើងរហូតដល់ ១៦នាក់ហើយ។ តួលេខនេះ គឺនៅមិនទាន់គិតដល់សកម្មជនដីធ្លី បុគ្គលិកអង្គការមិនមែនរដ្ឋាភិបាល និងយុវជនដែលគំរាមតាមបណ្ដាញសង្គមហ្វេសប៊ុក (Facebook) សម្លាប់លោក សុខ ទូច នៅឡើយផង។
លោក ម៉ៅ សុផល ប្រធានគណៈកម្មការប្រតិបត្តិខេត្តតាកែវ របស់គណបក្សសង្គ្រោះជាតិ ឲ្យដឹងនៅថ្ងៃទី៦ ខែកញ្ញា ថា គណបក្សជំទាស់ប្រចាំខេត្តតាកែវ នឹងស្វះស្វែងរកជំនួយមេធាវីពីអង្គការលីកាដូ (LICADHO) ឬសមាគមអាដហុក (ADHOC) ដើម្បីជួយការពារក្ដី លោក ឈា តាំងស៊ន នៅថ្ងៃច័ន្ទ ទី៧ ខែកញ្ញា។ លោក ម៉ៅ សុផល ថ្លែងបន្តថា ចាប់ពីថ្ងៃចាប់ខ្លួនលោក ឈា តាំងស៊ន រហូតមកពេលនេះ សមត្ថកិច្ចនៅបន្តឃុំខ្លួនលោកនៅស្នងការនគរបាលព្រហ្មទណ្ឌកម្រិតធ្ងន់ខេត្តតាកែវ នៅឡើយ។ លោកចាត់ទុកថា ការចាប់ខ្លួននេះ គឺធ្វើឡើងក្រោមហេតុផលនយោបាយសុទ្ធសាធ និងអំពាវនាវដល់ភាគីពាក់ព័ន្ធជួយអន្តរាគមន៍ដើម្បីស្វែងរកយុត្តិធម៌ឲ្យលោក ឈា តាំងស៊ន៖ «នៅទេ ចាំរក អាដហុក ឬ លីកាដូ ដើម្បីចាំថ្ងៃច័ន្ទ បានរៀបចំមេធាវីដើម្បីជួយគាត់ ដើម្បីដោះស្រាយបញ្ហាហ្នឹង»។
លោក ឈា តាំងស៊ន អនុប្រធានគណៈកម្មការប្រតិបត្តិស្រុកព្រៃកប្បាស ត្រូវបានកម្លាំងសមត្ថកិច្ចខេត្តតាកែវ ចាប់ខ្លួនកាលពីថ្ងៃទី៥ ខែកញ្ញា បន្ទាប់ពីសួរចម្លើយរួចនៅអធិការស្រុកព្រៃកប្បាស មុនបញ្ជូនទៅឃុំខ្លួននៅស្នងការនគរបាលព្រហ្មទណ្ឌកម្រិតធ្ងន់ខេត្ត។
វិទ្យុអាស៊ីសេរី មិនអាចទាក់ទងស្នងការនគរបាលខេត្តតាកែវ លោក អ៊ុក សំណាង បាននៅឡើយទេ នៅថ្ងៃទី៦ ខែកញ្ញា។
មន្ត្រីដែលស្និទ្ធនឹងលោក ឈា តាំងស៊ន បញ្ជាក់ថា មូលហេតុដែលនាំឲ្យសមត្ថកិច្ចចាប់ខ្លួននេះ បន្ទាប់ពីលោក ឈា តាំងស៊ន យកឯកសារចេញពីបណ្ដាញសង្គមហ្វេសប៊ុក ដែលនិយាយអំពីយុទ្ធសាស្ត្រ ២០ចំណុចរបស់វៀតណាម កាលពីថ្ងៃទី២៩ ខែសីហា កន្លងទៅ។ ឯកសារបានសរសេរពីយុទ្ធសាស្ត្រ ២០ចំណុចនោះថា ខ្មែរត្រូវតែរលាយដោយវិធី ២០យ៉ាងរបស់វៀតណាម។ ឯកសារបន្តថា បំបែកញាតិវង្សស្ដេចខ្មែរ និងបន្ថយជំនឿ និងពិធីលើកបន្តុបមនុស្សលក់ជាតិរបស់ខ្លួន និងឲ្យកាន់អំណាចតំណែងជាដើម។
លោក អំ សំអាត មន្ត្រីជាន់ខ្ពស់អង្គការលីកាដូ អះអាងថា គិតមកដល់ពេលនេះ ស្ថាប័នមិនមែនរដ្ឋាភិបាលមួយនេះ នៅពុំទាន់ទទួលបានការពឹងពាក់រកមេធាវីពីជនរងគ្រោះនៅឡើយទេ។ លើសពីនេះទៀត លោក អំ សំអាត អះអាងថា ថ្វីបើមានបទបញ្ជាពីលោក ហ៊ុន សែន ឲ្យចាប់ខ្លួនអ្នកដែលឈឺឆ្អាលរឿងព្រំដែននេះក៏ដោយចុះ ការអនុវត្តរបស់មន្ត្រីនៅថ្នាក់ក្រោមជាតិ ឬកម្លាំងសមត្ថកិច្ចតែងធ្វើហួសព្រំដែនកំណត់៖ «ទាល់តែមានបទបញ្ជាកន្លងមកគឺអាជ្ញាធរគាត់អនុវត្ត ហើយអនុវត្តលើសទៅទៀត ដោយសារតែការភិតភ័យ និងការអនុវត្តតាមបទបញ្ជារបស់ប្រមុខរដ្ឋាភិបាល។ អ៊ីចឹងយើងគិតថា អនុវត្តតាមបទបញ្ជាវាហួសពីបទបញ្ជាវាធ្វើឲ្យប៉ះពាល់ដល់សិទ្ធិ សេរីភាពក្នុងការបញ្ចេញមតិរបស់ប្រជាពលរដ្ឋ»។
ពាក់ព័ន្ធរឿងនេះ លោក ម៉ៅ សុផល ប្រធានគណៈកម្មការប្រតិបត្តិខេត្តតាកែវ ឲ្យដឹងថា កម្លាំងនគរបាលនៅស្នងការខេត្ត បានរឹតបន្តឹងសន្តិសុខដ៏តឹងរ៉ឹង ពុំផ្ដល់ឲ្យសាច់ញាតិរបស់ជនត្រូវចោទគឺលោក ឈា តាំងស៊ន បានចូលសួរសុខទុក្ខឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។