សាលាដំបូងរាជធានីភ្នំពេញ នៅព្រឹកថ្ងៃទី១៥ ខែកក្កដា ចាប់ផ្ដើមបើកសវនាការលើសំណុំរឿងឃាតកម្មបាញ់សម្លាប់លោកឧកញ៉ា អ៊ឹង ម៉េងជឺ ដែលកើតឡើងកាលពីឆ្នាំ ២០១៤។ លោកឧកញ៉ា អ៊ឹង ម៉េងជឺ ជាថៅកែហាងមាសហុងកុង នៅរាជធានីភ្នំពេញ។
មន្ត្រីនាំពាក្យសាលាដំបូងរាជធានីភ្នំពេញ លោក លី សុផាណា ឱ្យដឹងថា សវនាការនៅព្រឹកថ្ងៃទី១៥ ខែកក្កដា នេះ អង្គសវនាការបានសួរចម្លើយជនជាប់ចោទមួយរូបឈ្មោះ កូយ ចន្ទថុល ក្នុងករណីឃាតកម្មនេះ។
លោក អ៊ឹង ម៉េងជឺ ដែលជាម្ចាស់ហាងលក់ត្បូងពេជ្រ ឈ្មោះ ហុងកុង នៅក្បែរផ្សារថ្មី រាជធានីភ្នំពេញ ត្រូវបានឃាតក ២នាក់ បាញ់សម្លាប់នៅម៉ោងប្រមាណ ៧យប់ នៃថ្ងៃទី២២ វិច្ឆិកា ឆ្នាំ២០១៤។ លោក អ៊ឹង ម៉េងជឺ ស្លាប់ដោយត្រូវគ្រាប់កាំភ្លើងឃាតកបាញ់ជាច្រើនគ្រាប់ ពេលលោកចុះពីឡានទៅរកទិញផ្លែឈើនៅហាងលក់ផ្លែឈើមួយកន្លែងយីហោ ឡោ តិចសេង ដែលស្ថិតនៅជិតស្តាតអូឡាំពិក។
លោក លី សុផាណា ឱ្យដឹងថា សវនាការសាលាដំបូងរាជធានីភ្នំពេញ លើរឿងក្ដីឃាតកម្មទៅលើលោក អ៊ឹង ម៉េងជឺ នៅព្រឹកថ្ងៃទី១៥ កក្កដា គឺទាក់ទងជនជាប់ចោទ ៦រូប ដែលមានឈ្មោះ ថោង សារ៉ាត់ សៀង វាសនា លី សៅ មាស សម្បត្តិ កូយ ចន្ទ័ថុល និងលោក ឈុន ចិត្រា។ ក្នុងសវនាការនោះមានជនជាប់ចោទ ២រូបអវត្តមាន គឺជនជាប់ចោទ ថោង សារ៉ាត់ អវត្តមានដោយមូលហេតុមានជំងឺ ហើយជនជាប់ចោទមួយរូបទៀតឈ្មោះ លី សៅ បានស្លាប់។
ជនជាប់ចោទទាំង ៦រូប មានជនជាប់ចោទ ថោង សារ៉ាត់ ជាប្រធានក្រុមហ៊ុនមានជ័យ ៩៩៩ ត្រូវបានអាជ្ញាធរចាប់ខ្លួនកាលពីខែមេសា ឆ្នាំ២០១៥។ ជនជាប់ចោទផ្សេងទៀត ដែលជាអង្គរក្សរបស់លោក ថោង សារ៉ាត់ ត្រូវអាជ្ញាធរចាប់ខ្លួនបានជាបន្តបន្ទាប់ ក្នុងរយៈពេលជាងមួយសប្ដាហ៍ក្រោយការបាញ់ប្រហារសម្លាប់លោក អ៊ឹង ម៉េងជឺ។
ករណីបាញ់សម្លាប់លោក អ៊ឹង ម៉េងជឺ ប្រភពពីសមត្ថកិច្ចកាលពីដំបូងត្រូវបានគេសង្ស័យថា អាចពាក់ព័ន្ធនឹងរឿងគំនុំ ព្រោះឃាតកមិនបានយកទ្រព្យសម្បត្តិអ្វីពីជនរងគ្រោះទេ បន្ទាប់ការបាញ់សម្លាប់ជនរងគ្រោះរួចហើយ។
ជនជាប់ចោទ ថោង សារ៉ាត់ នៅមុនពេលអាជ្ញាធរចាប់ខ្លួន កាលពីខែធ្នូ ឆ្នាំ២០១៥ បានបដិសេធតាមរយៈវីដេអូ ពីកន្លែងលាក់ខ្លួនថា ការចោទប្រកាន់លោក និងអង្គរក្ស ថាពាក់ព័ន្ធការបាញ់ប្រហារនេះមិនយុត្តិធម៌៖ «ខ្ញុំបាទ និងអង្គរក្សទាំងបួន បានទទួលរងនូវអំពើអយុត្តិធម៌។ ខ្ញុំបាទ និងអង្គរក្ស សូមអំពាវនាវដល់សម្ដេចនាយករដ្ឋមន្ត្រី សូមមេត្តាជួយរកយុត្តិធម៌ឱ្យយើងខ្ញុំទាំងអស់គ្នាផង។ យើងខ្ញុំមានមូលហេតុពីរយ៉ាងដែលបញ្ជាក់ថា ខ្ញុំទាំងអស់គ្នា គឺគ្មានការពាក់ព័ន្ធនឹងអំពើឃាតកម្មរបស់លោកឧកញ៉ា អ៊ឹង ម៉េងជឺ ឡើយ។ ទីមួយ រូបខ្ញុំបាទ និងលោកឧកញ៉ា អ៊ឹង ម៉េងជឺ មិនដែលធ្លាប់ស្គាល់គ្នាពីមុនមក គ្មានទំនាក់ទំនងរកស៊ីអ្វីជាមួយគ្នា គ្មានដីជាប់ព្រំគ្នា គ្មានមូលហេតុអ្វីដែលខ្ញុំត្រូវសម្លាប់គាត់។ ទីពីរ បើសិនជាអង្គរក្សរបស់ខ្ញុំបាទជាឃាតក សួរថា ពួកគាត់ហ៊ានជិះម៉ូតូតាមខ្ញុំទៅគ្រប់ទីកន្លែងឬអត់ នៅពេលដែលរូបឃាតកបានបង្ហោះពេញបណ្ដាញហ្វេសប៊ុក»។
លោក លី សុផាណា បញ្ជាក់ថា សវនាការសាលាដំបូងរាជធានីភ្នំពេញនេះ គឺជាសវនាការលើអង្គសេចក្ដីលើកដំបូង បន្ទាប់ពីបានបញ្ចប់ការសាកសួរនៅក្នុងរឿងក្ដីសម្លាប់លោកឧកញ៉ា អ៊ឹង ម៉េងជឺ។ សវនាការនេះ មានសមាសភាពក្រុមប្រឹក្សាជំនុំជម្រះ ៤រូប គឺលោក តុប ឈុនហេង លោក ហេង កេសរោ លោក ម៉េង តូនី និងចូលរួមដោយតំណាងអយ្យការ គឺលោក ហ៊ឹង ប៊ុនថន។ អង្គសវនាការសម្រេចផ្អាកសវនាការនៅម៉ោង ១១ និង ១៥ នាទី ហើយអង្គសវនាការនឹងលើកទៅជំនុំជម្រះបន្តទៀត នៅវេលាម៉ោង ៨ព្រឹក ថ្ងៃទី៨ ខែសីហា ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។