ក្រុមគ្រួសារជនរងគ្រោះនិងមន្ត្រីអង្គការក្រៅរដ្ឋាភិបាល ប្រតិកម្មចំពោះចៅក្រមតុលាការខេត្តប៉ៃលិន ដែលបានដោះលែងជនជាប់ចោទទាក់ទងករណីគប់គ្រាប់បែកពីរនាក់ ឲ្យឋិតនៅក្រៅឃុំជាបណ្ដោះអាសន្ន។
ជនជាប់ចោទទាំងពីរនាក់ ត្រូវបានសមត្ថកិច្ចចាប់ខ្លួនក្រោយបានយកគ្រាប់បែកដៃមួយគ្រាប់គប់ទៅជនរងគ្រោះ នៅក្នុងវង់ផឹកស៊ីមួយ នៅស្រុកសាលាក្រៅ ខេត្តប៉ៃលិន កាលពីខែកុម្ភៈ ឆ្នាំ២០១៤។
អង្គការការពារយុត្តិធម៌កុមារដែលមានមូលដ្ឋាននៅទីក្រុងភ្នំពេញ សម្ដែងការសោកស្ដាយចំពោះចៅក្រមតុលាការខេត្តប៉ៃលិន ដែលបានសម្រេចដោះលែងជនជាប់ចោទពីរនាក់ ឲ្យឋិតនៅក្រៅឃុំជាបណ្ដោះអាសន្ន។ ជនជាប់ចោទទាំងពីរនាក់នោះ ត្រូវបានសមត្ថកិច្ចចាប់ខ្លួនពាក់ព័ន្ធលើករណីវាយប្រហារគ្រាប់បែកដៃទៅលើប្រជាពលរដ្ឋម្នាក់ នៅខេត្តប៉ៃលិន បណ្ដាលរងរបួសធ្ងន់ធ្ងរ និងធ្លាក់ខ្លួនជាមនុស្សពិការ។
មន្ត្រីស៊ើបអង្កេតរបស់អង្គការការពារយុត្តិធម៌កុមារ លោក ច័ន្ទ វាសនា ថ្លែងថា កាលពីថ្ងៃទី១ ខែមេសា ឆ្នាំ២០១៤ ចៅក្រមតុលាការខេត្តប៉ៃលិន លោក ម៉ក់ ភាង បានចេញដីកាសម្រេចដោះលែង ឈ្មោះ ធិន សាមុត និងឈ្មោះ វិត ភេង ឲ្យឋិតនៅក្រៅឃុំជាបណ្ដោះអាសន្ន ដោយសំអាងថា គ្រួសាររបស់ជនជាប់ចោទទាំងពីរគ្មានអ្នករកស៊ីចិញ្ចឹម។ លោកចៅក្រមគ្រាន់តែបានតម្រូវឲ្យជនជាប់ចោទទាំងពីរនាក់ដាក់ប្រាក់តម្កល់ចំនួន ១លានរៀលប៉ុណ្ណោះ។
លោក ច័ន្ទ វាសនា៖ «ជនរងគ្រោះគ្រោះថ្នាក់ធ្ងន់ធ្ងរស្ទើរស្លាប់ទៅហើយ ក្លាយខ្លួនពិការជាអចិន្ត្រៃយ៍ ហើយគាត់លែងជនល្មើសទៅ។ រឿងនេះយើងមានការព្រួយបារម្ភជនរងគ្រោះទើបចេញពីមន្ទីរពេទ្យមក កាលពីថ្ងៃទី១១ ដើរអត់ទាន់រួចទេ អ៊ីចឹងគាត់យល់ថា បទល្មើសហ្នឹងមិនធ្ងន់ធ្ងរ។ ម្យ៉ាងទៀតគាត់ព្រួយបារម្ភ គ្រួសារប្រពន្ធកូនជនត្រូវចោទគ្មានអ្នកណារកស៊ីចិញ្ចឹមគាត់ហ្នឹងទៅ ព្រួយតែខាងជនត្រូវចោទវិញ ចំណែកគ្នាដែលរងគ្រោះធ្ងន់ធ្ងរពេក បែរជាគាត់លែងជនល្មើសអ៊ីចឹង»។
ជនរងគ្រោះក្នុងករណីវាយប្រហារគ្រាប់បែកក្នុងវង់ផឹកស៊ីនោះ មានឈ្មោះ ឌី ឡាយហេង អាយុ ១៩ឆ្នាំ រស់នៅឃុំសាលាក្រៅ ស្រុកសាលាក្រៅ ខេត្តប៉ៃលិន។ បច្ចុប្បន្នកំពុងដេកសម្រាកព្យាបាលបន្តនៅផ្ទះក្រោយពីចេញពីមន្ទីរពេទ្យកាលពីថ្ងៃទី១១ ខែមីនា ឆ្នាំ២០១៤។ ជនរងគ្រោះឈ្មោះ ឌី ឡាយហេង បញ្ជាក់ថា កាលពីថ្ងៃទី២៧ ខែកុម្ភៈ ឆ្នាំ២០១៤ រូបគាត់បានទៅអង្គុយផឹកស្រាបៀនៅផ្ទះរបស់ឈ្មោះ វិត ភេន រស់នៅភូមិឃុំជាមួយគ្នា។
ជនរងគ្រោះបញ្ជាក់ថា នៅក្នុងវង់ផឹកស៊ីនោះ ឈ្មោះ វិត ភេន បានយកគ្រាប់បែកដៃមួយគ្រាប់ដែលរើសបានពីចម្ការរបស់ខ្លួន ស្រាប់តែឈ្មោះ ធិន សាមុត ដណ្ដើមយកគ្រាប់បែកនោះដកគន្លឹះ (ស្លាបព្រា) បោះទៅលើឈ្មោះ ឌី ឡាយហេង បន្ទាប់មកពួកគេទាំងពីរបានរត់គេចចេញពីវង់ផឹកស៊ី៖ «នៅពេលកើតហេតុ ខ្ញុំអង្គុយហូបជាមួយនឹងពួកពូ មុត និងបង ភេន ហ្នឹងពេលអង្គុយហូបស្រាម្នាក់ ឈ្មោះ មុត គាត់សុំគ្រាប់បែកពីឈ្មោះ បង ភេន ដែលរើសបានពីចម្ការមកមើល។ ពេលមើលហើយគាត់ដោះគន្លឹះគ្រាប់បែកបោះមកលើខ្ញុំវាផ្ទុះ ហើយពួកគាត់រត់អស់ទៅ របួសចំពោះចំជើង ធ្លុះពោះវៀន ដាច់ពោះវៀន ហើយត្រូវថ្លើម ជើងធ្លុះជើងមិនទាន់ជាផងនៅព្យាបាលនៅផ្ទះចង់ឲ្យគេចាប់ គាត់ចូលពន្ធនាគារវិញ ដោយសារគាត់អត់បានសងថ្លៃព្យាបាលរបួស»។
ក្រោយមួយថ្ងៃនៃថ្ងៃកើតហេតុ គឺនៅថ្ងៃទី២៨ ខែកុម្ភៈ ឈ្មោះ ធិន សាមុត និងឈ្មោះ វិត ភេន ត្រូវបានសមត្ថកិច្ចចាប់ខ្លួនកសាងសំណុំរឿងបញ្ជូនទៅតុលាការខេត្តប៉ៃលិន។ នៅថ្ងៃទី២ ខែមីនា ឆ្នាំ២០១៤ តុលាការបានសម្រេចចោទប្រកាន់ឈ្មោះ ធិន សាមុត និង វិត ភេន ពីបទកាន់កាប់ ឬដឹកជញ្ជូនអាវុធខុសច្បាប់ និងការហិង្សាដោយចេតនាទៅលើជនរងគ្រោះ ហើយបានបញ្ជូនជនជាប់ចោទទាំងពីរនាក់ទៅឃុំខ្លួននៅក្នុងពន្ធនាគារ។
ការឃុំខ្លួននោះបានធ្វើឡើងរយៈពេល ១ខែប៉ុណ្ណោះ ស្រាប់តែនៅថ្ងៃទី១ ខែមេសា ឆ្នាំ២០១៤ ចៅក្រមតុលាការខេត្តប៉ៃលិន លោក ម៉ក់ ភាង បានសម្រេចដោះលែងឲ្យជនបង្កហេតុទាំងពីរនាក់ឋិតនៅក្រៅឃុំបណ្ដោះអាសន្ន ដោយគ្រាន់តែតម្រូវឲ្យជនត្រូវចោទទាំងពីរនាក់តម្កល់ប្រាក់ធានាចំនួន ១លានរៀល។
វិទ្យុអាស៊ីសេរី បានសុំការបញ្ជាក់ពីលោកចៅក្រម ម៉ក់ ភាង ជុំវិញហេតុផលនៃការសម្រេចឲ្យជនជាប់ចោទឋិតនៅក្រៅឃុំ ប៉ុន្តែលោកបដិសេធមិនផ្ដល់អត្ថាធិប្បាយនោះឡើយ។
លោក ច័ន្ទ វាសនា ជាមន្ត្រីស៊ើបអង្កេតរបស់អង្គការការពារយុត្តិធម៌កុមារថ្លែងថា លោក ម៉ក់ ភាង ជាចៅក្រមតុលាការខេត្តប៉ៃលិន មានភាពលំអៀងទៅលើជនជាប់ចោទ។ លោករហូតដល់ពេលជនរងគ្រោះ ឈ្មោះ ឌី ឡាយហេង ធ្លាក់ខ្លួនពិការ និងពុំទាន់បានព្យាបាលរបួសជាសះស្បើយនៅឡើយ៖ «ហើយគាត់ហ៊ានចិត្តធំលែង ហើយគាត់ថា របួសហ្នឹងមិនធ្ងន់ធ្ងរទេ សំដីគាត់អ៊ីចឹងមិនសាក សមជាចៅក្រមស៊ើបសួរ គាត់អត់កាន់ជំហរកណ្ដាល ឥឡូវហ្នឹងខាងខ្ញុំក៏ដូចជាដើមបណ្ដឹងដែរ ខ្លាចលោក ម៉ក់ ភាង គាត់លើកលែងការចោទប្រកាន់ឲ្យជនត្រូវចោទហ្នឹងទៀត»។
មន្ត្រីអង្គការការពារយុត្តិធម៌កុមារនិងជនរងគ្រោះថ្លែងថា ឈ្មោះ ធិន សាមុត និងឈ្មោះ វិត ភេន ក្រោយពីតុលាការសម្រេចដាក់ឲ្យឋិតនៅក្រៅឃុំជាបណ្ដោះអាសន្ន ពួកគេកំពុងរស់នៅក្នុងភូមិជាមួយជនរងគ្រោះក្នុងសង្កាត់សាលាក្រៅស្រុកសាលាក្រៅខេត្តប៉ៃលិន។ ទោះយ៉ាងនេះក្ដីជនរងគ្រោះនៅតែទាមទារយករកយុត្តិធម៌ ហើយសុំឲ្យតុលាការខេត្តប៉ៃលិន ផ្ដន្ទាទោសជនត្រូវចោទទាំងពីរនាក់ទៅតាមច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។