សាលាដំបូងរាជធានីភ្នំពេញ សន្យាថា នឹងលើកយកសំណុំរឿងគ្រោះថ្នាក់ចរាចរណ៍ដែលបានកើតឡើងលើគ្រួសារក្រីក្រមួយនៅខណ្ឌឫស្សីកែវ ជិតមួយឆ្នាំមកហើយនោះ មកជំនុំជម្រះនៅចុងខែមីនា ខាងមុខ។ សាលារាជធានីភ្នំពេញ កាលពីព្រឹកថ្ងៃទី២៤ ខែកុម្ភៈ បានហៅជនរងគ្រោះមកប្រាប់ដំណឹងនេះ ក្រោយពីមានបណ្ដាញសារព័ត៌មានចុះផ្សាយពីចំណាត់ការយឺតយ៉ាវរបស់តុលាការ។
ជនរងគ្រោះសម្ដែងក្ដីសង្ឃឹមថា យុត្តិធម៌ដែលគាត់បានទន្ទឹងរង់ចាំអស់រយៈពេលជិតមួយឆ្នាំទៅហើយនោះ ហាក់មានពន្លឺតិចៗមកវិញហើយ ក្រោយពីតុលាការហៅមកប្រាប់ដំណឹងនេះ។
ថ្លែងក្រោយពេលចេញពីតុលាការ ជនរងគ្រោះឈ្មោះ ខេង សុខុម ហៅ ម៉ៅ ដែលបានធ្លាក់ខ្លួនពិការដោយសារគ្រោះថ្នាក់ចរាចរណ៍ និងកូនប្រុសម្នាក់របស់គាត់បានបាត់បង់ជីវិត ឲ្យដឹងថា តុលាការសន្យាថា នឹងបញ្ជូនសំណុំរឿងរបស់គាត់យកទៅជំនុំជម្រះនៅចុងខែមីនា។ តុលាការប្រាប់គាត់ដែរថា មូលហេតុនៃការយឺតយ៉ាវកន្លងមក ដោយសារតុលាការកំពុងតែស៊ើបអង្កេត ហើយតុលាការបានស្នើលោកទុកពេលឲ្យតុលាការធ្វើការស៊ើបអង្កេតបន្ថែមទៀត។
លោក ខេង សុខុម៖ «គិតថា រង់ចាំបន្តិចសាកមើល ព្រោះគាត់បាននិយាយជាមួយខ្ញុំដែរថា នឹងអាចធ្វើនៅចុងខែ៣ តែបើគាត់ស៊ើបអង្កេតមិនទាន់មានន័យគ្រប់គ្រាន់នោះទេ តុលាការគេប្រាប់ថា រឹតតែយូរទៀតហើយ អ៊ីចឹងទេ មានតែទុកពេលវេលាឲ្យគាត់ស៊ើបអង្កេតច្បាស់លាស់សិន»។
កាលពីខែឧសភា ឆ្នាំ២០១៥ លោក ខេង សុខុម ហៅ ម៉ៅ និងកូនប្រុសឈ្មោះ ទឹង សុខា អាយុ ២០ឆ្នាំ ត្រូវបានរថយន្តដែលគេដឹងថា ជារបស់ក្រុមហ៊ុនលក់ទឹកកកមួយ បានបុកចំពីមុខ ហើយអូសជាច្រើនម៉ែត្រនៅក្នុងខណ្ឌឫស្សីកែវ រាជធានីភ្នំពេញ ក្នុងពេលលោកកំពុងដឹកកូនចេញពីផ្ទះទៅឡើងឡាននៅវិទ្យាស្ថានបច្ចេកទេសឧស្សាហកម្មក្នុងសង្កាត់ទឹកថ្លា ដើម្បីរួមដំណើរជាមួយមិត្តរួមថ្នាក់ទៅធ្វើទស្សនកិច្ចសិក្សានៅក្រុងព្រះសីហនុ។
គ្រោះថ្នាក់ចរាចរណ៍នោះបានផ្ដាច់យកជីវិតកូនប្រុសតែមួយគត់របស់គាត់ក្រោយបញ្ជូនដល់មន្ទីរពេទ្យ។ ចំណែកលោក ខេង សុខុម បានធ្លាក់ខ្លួនពិការរហូតមកទល់សព្វថ្ងៃ។
ទោះជាបែបនេះក្តី រហូតមកទល់ពេលនេះ គ្រួសារលោក ខេង សុខុម ពុំទាន់ទទួលបានយុត្តិធម៌ ឬសំណងពីជនបង្កហេតុនៅឡើយ បើទោះជារថយន្តបង្កហេតុត្រូវបានសមត្ថកិច្ចចាប់ប្រគល់ជូនតុលាការរក្សាទុករួចហើយក្តី។
កន្លងមកនៅពេលមានភាពស្ងប់ស្ងាត់ពីតុលាការ ក្រុមគ្រួសារលោក ខេង សុខុម បានសម្ដែងការអស់សង្ឃឹមយ៉ាងខ្លាំងចំពោះប្រព័ន្ធតុលាការកម្ពុជា។
លោក ខេង សុខុម មានប្រសាសន៍ថា នៅពេលនេះ លោកហាក់មានអារម្មណ៍ស្ងប់ជាងមុន បន្ទាប់ពីតុលាការហៅមកប្រាប់ថា នឹងលើកយកសំណុំរឿងរបស់គាត់ទៅជំនុំជម្រះ។ ទោះជាយ៉ាងណាក៏ដោយចុះ លោកនឹងនៅតាមដានចំណាត់ការរបស់តុលាការបន្តទៀត៖ «ឥឡូវតាមចិត្តខ្ញុំ ខ្ញុំសង្ឃឹមដល់ ៩០ភាគរយ នៅ ១០ភាគរយទៀត ទាល់តែចប់បានសង្ឃឹម ១០០ភាគរយ។ ពីមុននឹកឃើញថា ខ្លួនឯងជាកម្មករលីសែង អត់មានបងប្អូន សាច់ញាតិធ្វើការ មិនមានលុយមានកាក់ ដល់អ៊ីចឹងដូចជាមិនមានសង្ឃឹមទាល់តែសោះ»។
ជាកសិករមកពីស្រុកស្រីសន្ធរ ខេត្តកំពង់ចាម លោក ខេង សុខុម បច្ចុប្បន្នរស់នៅជាមួយភរិយាក្នុងបន្ទប់ជួលមួយតម្លៃ ២០ដុល្លារក្នុង១ខែ ឋិតនៅភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។ បើទោះជាមានជីវភាពទីទ័លក្រ គ្រួសារលោក ខេង សុខុម ខិតខំរកស៊ីដើម្បីចិញ្ចឹមកូនឲ្យបានរៀនសូត្ររហូតដល់ចប់ថ្នាក់មហាវិទ្យាល័យ។ ប៉ុន្តែ ជាអកុសលកូនប្រុសរបស់គាត់ត្រូវបានគ្រោះថ្នាក់ចរាចរណ៍ផ្ដាច់យកជីវិត ដោយបន្សល់ទុកនូវតែភាពសោកសៅ និងឈឺចាប់សម្រាប់គ្រួសារក្រីក្រមួយនេះ។
ចាប់ពីមានគ្រោះថ្នាក់កើតឡើង ប្រភពចំណូលរបស់គ្រួសារទាំងមូល គឺត្រូវពឹងផ្អែកទាំងស្រុងទៅលើការងាររបស់ភរិយាលោក ខេង សុខុម ដែលសព្វថ្ងៃប្រកបរបរជាកម្មករសែងដំឡូងនៅរោងចក្រមួយក្នុងខណ្ឌឫស្សីកែវ។ ការងារនេះផ្តល់ចំណូលជាមធ្យម ១៥.០០០រៀលក្នុង១ថ្ងៃ។
ចំពោះរឿងនេះ មន្ត្រីសង្គមស៊ីវិលលើកឡើងថា ដើម្បីជៀសវាងកុំឲ្យពលរដ្ឋចោទប្រកាន់ថា តុលាការមើលឃើញតែប្រាក់ ឬជៀសវាងពលរដ្ឋបាត់បង់ជំនឿលើប្រព័ន្ធតុលាការកម្ពុជា តុលាការគួរពន្លឿនការជំនុំជម្រះលើសំណុំរឿងនេះ ដើម្បីរកយុត្តិធម៌ជូនជនរងគ្រោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។