ចៅក្រមនៃសាលាដំបូងខេត្តពោធិ៍សាត់ កំពុងតែពន្លឿននីតិវិធីស៊ើបសួររបស់ខ្លួនទៅលើស្ត្រីម្នាក់ឈ្មោះ ស៊ិន សៀន ក្រោមបទចោទកាប់រានឈូសឆាយដីព្រៃហ៊ុមព័ទ្ធធ្វើជាកម្មសិទ្ធិ។
អ្នកស្រី ស៊ិន សៀន ត្រូវបានសមត្ថកិច្ចឃាត់ខ្លួនកាលពីថ្ងៃទី១២ ខែកុម្ភៈ នៅគ្រាដែលអាជ្ញាធរចុះបង្ក្រាប និងដុតបំផ្លាញផ្ទះប្រជាពលរដ្ឋជាង ៧០ខ្នង ស្ថិតក្នុងឃុំក្រពើពីរ ស្រុកវាលវែង ខេត្តពោធិ៍សាត់។ មន្ត្រីសមាគមការពារសិទ្ធិមនុស្សអាដហុក (Adhoc) ត្រៀមនឹងបង្កើតគណៈកម្មការប្រព្រឹត្តិកម្មមួយ ដើម្បីចុះស៊ើបអង្កេតក្នុងករណីនេះឲ្យបានច្បាស់លាស់។
ករណីជម្លោះដីធ្លីរវាងប្រជាពលរដ្ឋជាង ១០០គ្រួសារ និងអាជ្ញាធរខេត្តពោធិ៍សាត់ បានឈានដល់ការដុតបំផ្លាញផ្ទះ ចាប់មនុស្សដាក់គុក និងបណ្ដេញពលរដ្ឋចេញដោយបង្ខំក្នុងរូបភាពមួយដែលមន្ត្រីសិទ្ធិមនុស្សចាត់ទុកថា ជាអំពើអមនុស្សធម៌ និងរំលោភសិទ្ធិមនុស្ស។ អាជ្ញាធរបានប្រើវិធានការក្ដៅនេះ ដោយយោងលើហេតុផលថា ប្រជាពលរដ្ឋទាំងនោះកំពុងតែរស់នៅខុសច្បាប់នៅលើដីព្រៃការពាររបស់រដ្ឋ។
ប្រធានតុលាការខេត្តពោធិ៍សាត់ និងជាចៅក្រមស៊ើបសួរក្នុងសំណុំរឿងនេះ លោក ថោង អុល មានប្រសាសន៍នៅថ្ងៃទី២៦ ខែកុម្ភៈ ថា លោកកំពុងតែពិនិត្យមើល និងជជីកសួរបន្ថែមទៀតទៅលើជនសង្ស័យ ប៉ុន្តែលោកមិនអាចបង្ហើបពីលទ្ធផលនៃការសាកសួរ ឬថាអាចនឹងមានការឃាត់ខ្លួនពលរដ្ឋផ្សេងទៀតក្នុងករណីនេះឬអត់នោះទេ។
លោក ថោង អុល៖ «ការចោទប្រកាន់គេមានឯកសារមួយចំនួននោះវាមានស្រេចហើយបានយើងស៊ើបសួរបញ្ជាក់បន្ថែមទៀត វាលេចចេញទៅជាស្អីទៅណាមកណាទៀត អាហ្នឹងការងារក្រោយយើងអត់អាចនិយាយមុនបានទេ»។
ច្បាប់ស្ដីអំពីព្រៃឈើមាត្រា ៩៧ ត្រង់ចំណុចទី៦ ចែងថា ជនណាដែលកាប់រានព្រៃ ឈូសឆាយដីព្រៃ ហ៊ុមព័ទ្ធកាន់កាប់ដីព្រៃ ត្រូវផ្ដន្ទាទោសក្រោមបទល្មើសថ្នាក់ទី១ ដែលត្រូវជាប់ពន្ធនាគារចាប់ពី ៥ឆ្នាំ ដល់ ១០ឆ្នាំ និងត្រូវរឹបអូសវត្ថុតាងទាំងអស់មកធ្វើជាសម្បត្តិរដ្ឋ។
មន្ត្រីសម្របសម្រួលសមាគមអាដហុក (Adhoc) ប្រចាំខេត្តពោធិ៍សាត់ លោក ភួង សុធា បានថ្លែងរិះគន់ចំពោះអាជ្ញាធរ និងតុលាការថា ការចាប់ខ្លួនរបស់ស្ត្រីម្នាក់ឈ្មោះ ស៊ិន សៀន គឺជាការអនុវត្តខុសពីនីតិវិធីច្បាប់ ដោយការចាប់ខ្លួននោះធ្វើឡើងដោយគ្មានដីកា និងមិនមែនជាបទល្មើសជាក់ស្ដែង។ ចំណែកសកម្មភាពបណ្ដេញចេញដោយបង្ខំនេះ អាជ្ញាធរហាក់មិនបានគិតពីសិទ្ធិ និងតម្រូវការរបស់ប្រជាពលរដ្ឋឡើយ។
លោក ភួង សុធា៖ «ការបង្កើតហ្នឹង គឺយើងស្រាវជ្រាវឲ្យដល់ឫសគល់នៃបញ្ហា ថាតើប្រជាពលរដ្ឋទាំងអស់ហ្នឹងក្រីក្រពិតប្រាកដមែន ឬអត់? អាជ្ញាធរខេត្តគាត់បានរៀបចំដីសម្បទានសង្គមកិច្ចឲ្យពួកគាត់ហ្នឹងទៅតំបន់ទួលក្រួស ហើយតំបន់ទួលក្រួសហ្នឹង វាជាប្រភេទដីយ៉ាងដូចម្ដេច? នៅពេលដែលយើងរកឃើញបញ្ហាទាំងអស់ហ្នឹងហើយ យើងនឹងដាក់បញ្ហាទាំងអស់ហ្នឹងជូនខាងគណៈអភិបាលដើម្បីធ្វើការពិចារណាឡើងវិញ»។
កាលពីថ្ងៃទី១៨ ខែកុម្ភៈ ឆ្នាំ២០១៤ កម្លាំងសមត្ថកិច្ចចម្រុះបានបំបែកក្រុមប្រជាពលរដ្ឋចេញពីខាងមុខសាលាដំបូងខេត្តពោធិ៍សាត់ ដែលតវ៉ាឲ្យមានការដោះលែងស្ត្រីម្នាក់ឈ្មោះ ស៊ិន សៀន និងបញ្ឈប់សកម្មភាពបណ្ដេញពលរដ្ឋចេញពីលំនៅឋានដោយបង្ខំ។ ក្រោយពីនោះ ពួកគាត់បានរស់នៅបែកខ្ញែកគ្នា និងខ្លះពុំមានទីលំនៅពិតប្រាកដឡើយ។
ទាក់ទងនឹងបញ្ហានេះ អភិបាលស្រុកវាលវែង លោក ឆេ ឈីវ មានប្រសាសន៍ថា អាជ្ញាធរបានចលនាឲ្យប្រជាពលរដ្ឋទាំងនោះមករស់នៅជុំគ្នាក្នុងតំបន់ទួលក្រួស ដែលរដ្ឋបានកំណត់ជាទីតាំងផ្ដល់ដីសម្បទានសង្គមកិច្ចជូនពួកគាត់ ដើម្បីងាយស្រួលគ្រប់គ្រងផ្នែកសន្តិសុខ ជីវភាព និងសុខភាព។
លោក ឆេ ឈីវ៖ «ឃើញគេមក ប៉ុន្តែថាមកអាកន្លែងផ្លូវចូលហ្នឹង ហើយឥឡូវបំបែកគ្នា។ អ្នកខ្លះគេមានផ្ទះតាមដងផ្លូវ និងខ្លះមានផ្ទះបងប្អូនចូលជ្រៀតជ្រកនៅទៅ។ គេធ្វើស្រែក្បែរៗហ្នឹង ដាំដំណាំអីក៏គេរស់ ប៉ុន្តែគាត់មិនធ្វើ គាត់ដើរតែចោះត្រង់ណេះមួយកញ្ចុប ត្រង់ណោះមួយកញ្ចុប អាព្រៃស្រោងហ្នឹង»។
លោកបញ្ជាក់ថា កាលពីចុងឆ្នាំ២០១២ មានប្រជាពលរដ្ឋទទួលបានដី និងរស់នៅតំបន់ទួលក្រួស ជាង ៧០គ្រួសារ។ ប្រជាពលរដ្ឋទាំងនោះបានទទួលដីសម្រាប់បង្កបង្កើនផលចំនួន ១ហិកតារកន្លះ និងដីលំនៅឋានទំហំទទឹង ៣០ម៉ែត្រ បណ្ដោយ ៤០ម៉ែត្រ។ ចំពោះប្រជាពលរដ្ឋជាង ១០០គ្រួសារដែលអះអាងថា ខ្លួនបានចូលទៅរស់នៅចំណុចអូរធំ និងចម្ការចេក នៃឃុំក្រពើពីរ ជាយូរមកហើយនោះ ត្រូវបានអាជ្ញាធរបដិសេធ និងបញ្ជាក់ថា ពួកគាត់ទើបចូលមកកាប់រានដីព្រៃ និងរស់នៅក្នុងពេលពេលថ្មីៗទើបអាជ្ញាធរមានវិធានការបណ្ដេញចេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។